ਵੱਡੀ ਖ਼ਬਰ : ਪੰਜਾਬ ਦੇ ਕਿਸਾਨਾਂ ਲਈ ਵੱਜੀ ਖ਼ਤਰੇ ਦੀ ਘੰਟੀ, 10 ਸਾਲਾਂ ਬਾਅਦ 300 ਮੀਟਰ ਤੱਕ ਪਹੁੰਚੇਗਾ ਪਾਣੀ

30 ਦਸੰਬਰ 2023: ਸੰਸਦ ਦੇ ਸਰਦ ਰੁੱਤ ਇਜਲਾਸ ਦੌਰਾਨ ਲੋਕ ਸਭਾ ’ਚ ਪੇਸ਼ ਕੀਤੀ ਗਈ ‘ਡਾਇਨਾਮਿਕ ਗਰਾਊਂਡ ਵਾਟਰ ਰਿਸੋਰਸ ਆਫ ਇੰਡੀਆ ਰੀਪੋਰਟ’ ਅਨੁਸਾਰ ਪੰਜਾਬ ’ਚ ਧਰਤੀ ਹੇਠਲੇ ਪਾਣੀ ਦਾ ਪ੍ਰਯੋਗ ਇਸ ਦੀ ਭਰਪਾਈ ਨਾਲੋਂ 163 ਫ਼ੀ ਸਦੀ ਵੱਧ ਹੈ, ਜਿਸ ਨਾਲ ਪੰਜਾਬ ਸੂਬਾ ਦੇਸ਼ ’ਚ ਸੱਭ ਤੋਂ ਖਰਾਬ ਸਥਿਤੀ ’ਚ ਹੈ। ਰਾਜਸਥਾਨ 148.77 ਫੀ ਸਦੀ ਵਰਤੋਂ ਦੂਜੇ ਨੰਬਰ ’ਤੇ ਹੈ, ਇਸ ਤੋਂ ਬਾਅਦ ਹਰਿਆਣਾ (135.74 ਫੀ ਸਦੀ) ਹੈ। ਕੌਮੀ ਔਸਤ ਲਗਭਗ 59 ਫ਼ੀ ਸਦੀ ਹੈ।ਕੇਂਦਰੀ ਭੂਮੀ ਜਲ ਬੋਰਡ ਨੇ ਚੇਤਾਵਨੀ ਦਿਤੀ ਹੈ ਕਿ ਸੋਸ਼ਣ ਦੀ ਮੌਜੂਦਾ ਦਰ ਨਾਲ 2029 ਤਕ ਪੰਜਾਬ ’ਚ ਧਰਤੀ ਹੇਠਲਾ ਪਾਣੀ ਔਸਤਨ 100 ਮੀਟਰ ਤਕ ਦੀ ਡੂੰਘਾਈ ’ਤੇ ਖਤਮ ਹੋ ਜਾਵੇਗਾ ਅਤੇ 10 ਸਾਲਾਂ ਬਾਅਦ 300 ਮੀਟਰ ਤੋਂ ਹੇਠਾਂ ਚਲਾ ਜਾਵੇਗਾ। ਇੱਥੋਂ ਤਕ ਕਿ ਸੂਬੇ ਦੇ ਕਈ ਹਿੱਸਿਆਂ ’ਚ ਇਹ ਪਹਿਲਾਂ ਹੀ 150-200 ਮੀਟਰ ਡੂੰਘਾ ਪਹੁੰਚ ਗਿਆ ਹੈ। ਪਾਣੀ ਦੇ ਪੱਧਰ ’ਚ ਇਸ ਗਿਰਾਵਟ ਨੂੰ ਤੁਰਤ ਰੋਕਿਆ ਜਾਣਾ ਚਾਹੀਦਾ ਹੈ ਕਿਉਂਕਿ ਇਸ ਪੱਧਰ ਤੋਂ ਹੇਠਾਂ ਦਾ ਪਾਣੀ ਪੀਣ ਅਤੇ ਸਿੰਚਾਈ ਦੋਹਾਂ ਲਈ ਅਯੋਗ ਮੰਨਿਆ ਜਾਂਦਾ ਹੈ।ਇਹ ਚੰਗੀ ਤਰ੍ਹਾਂ ਸਾਬਤ ਹੋ ਚੁਕਾ ਹੈ ਕਿ ਇਹ ਗੰਭੀਰ ਸਥਿਤੀ ਝੋਨੇ ਦੀ ਕਾਸ਼ਤ ਤੋਂ ਪੈਦਾ ਹੁੰਦੀ ਹੈ, ਜੋ ਪਾਣੀ ਦੀ ਖਪਤ ਕਰਨ ਵਾਲੀ ਫਸਲ ਹੈ ਜੋ ਵਧੇਰੇ ਪਾਣੀ ਦੀ ਖਪਤ ਕਰਦੀ ਹੈ। ਮਜ਼ਬੂਤ ਖਰੀਦ ਪ੍ਰਣਾਲੀ ਅਤੇ ਬਾਜਰੇ ਵਰਗੇ ਵਿਹਾਰਕ ਬਦਲਾਂ ਨੂੰ ਉਤਸ਼ਾਹਤ ਕਰਨ ’ਚ ਸੂਬੇ ਅਤੇ ਕੇਂਦਰ ਸਰਕਾਰਾਂ ਦੀ ਅਸਮਰੱਥਾ ਨੂੰ ਵੇਖਦੇ ਹੋਏ, ਕਿਸਾਨ ਝੋਨੇ ਦੀ ਚੋਣ ਕਰਦੇ ਹਨ।