ਲੁਧਿਆਣਾ ਦੇ ਹੋਟਲ ਬੰਦ ਹੋਣ ਕੰਢੇ, ਕੋਰੋਨਾ ਕਾਰਨ ਹੋਟਲਾਂ ਦਾ ਹੋਇਆ ਕੋਰੋੜਾਂ ਦਾ ਨੁਕਸਾਨ

ਲੁਧਿਆਣਾ, 25 ਮਈ(ਸੰਜੀਵ ਸੂਦ): ਪੰਜਾਬ ਭਰ ਦੇ ਵਿੱਚ ਹੋਟਲ ਮੰਦੀ ਦੇ ਦੌਰ ਚੋਂ ਲੰਘ ਰਹੇ ਨੇ ਹਾਲਾਤ ਇਥੋਂ ਤੱਕ ਪਹੁੰਚ ਗਏ ਨੇ ਕਿ ਆਉਂਦੇ ਇੱਕ ਮਹੀਨੇ ਤੱਕ ਜੇਕਰ ਇਨ੍ਹਾਂ ਦੀ ਸਰਕਾਰ ਨੇ ਬਾਂਹ ਨਾ ਫੜੀ ਤਾਂ ਇਹ ਬੰਦ ਹੋ ਜਾਣਗੇ। ਇਹ ਕਹਿਣਾ ਹੈ ਪੰਜਾਬ ਹੋਟਲ ਐਸੋਸੀਏਸ਼ਨ ਦੇ ਪ੍ਰਧਾਨ ਅਮਰਵੀਰ ਸਿੰਘ ਦਾ, ਦਰਅਸਲ ਸਰਕਾਰ ਵੱਲੋਂ ਵਿਦੇਸ਼ਾਂ ਤੋਂ ਆਉਣ ਵਾਲੇ ਲੋਕਾਂ ਨੂੰ ਇਕਾਂਤ ਵਾਸ ‘ਚ ਰੱਖਣ ਲਈ ਹੋਟਲ ਐਸੋਸੀਏਸ਼ਨ ਨਾਲ ਰਾਬਤਾ ਕਾਇਮ ਕਰਕੇ ਲੁਧਿਆਣਾ ਦੇ ਹੋਟਲਾਂ ਤੋਂ 800 ਕਮਰਿਆਂ ਦੀ ਮੰਗ ਕੀਤੀ ਗਈ ਸੀ, ਪਰ ਲੁਧਿਆਣਾ ਵਿੱਚ ਸਿਰਫ਼ ਹੁਣ ਤੱਕ 20 ਲੋਕ ਹੀ ਹੋਟਲਾਂ ‘ਚ ਰਹਿਣ ਨੂੰ ਰਾਜ਼ੀ ਹੋਏ ਨੇ ਜਦੋਂ ਕਿ 23 ਮਈ ਤੱਕ ਸਰਕਾਰ ਨੇ ਸਾਰੇ ਕਮਰੇ ਬੁੱਕ ਹੋ ਜਾਣ ਦਾ ਦਾਅਵਾ ਕੀਤਾ ਸੀ।

ਪਹਿਲਾਂ ਹੀ ਮੰਦੀ ਦੀ ਮਾਰ ਝੱਲ ਰਹੇ ਹੋਟਲ ਕਾਰੋਬਾਰੀਆਂ ਨੂੰ ਰੈਸਟੋਰੈਂਟ ਬਾਰ ਆਦਿ ਦਾ ਟੈਕਸ ਦੇਣਾ ਪੈ ਰਿਹਾ ਸੀ ਅਤੇ ਹੁਣ ਸਰਕਾਰ ਵੱਲੋਂ ਖ਼ੁਦ ਉਨ੍ਹਾਂ ਨੂੰ ਪੇਸ਼ਕਸ਼ ਕਰਨ ਅਤੇ ਫਿਰ ਹੋਟਲ ਮੈਨੇਜਮੈਂਟ ਵੱਲੋਂ ਸਾਰੇ ਸਟਾਫ਼ ਨੂੰ ਵਾਪਸ ਸੱਦ ਕੇ ਕੰਮ ਸ਼ੁਰੂ ਕਰਵਾਉਣ ਕਰਕੇ ਹੋਟਲਾਂ ਦਾ ਮੁੜ ਤੋਂ ਵੱਡਾ ਨੁਕਸਾਨ ਹੋ ਗਿਆ ਹੈ। ਹੋਟਲ ਐਸੋਸੀਏਸ਼ਨ ਪੰਜਾਬ ਪ੍ਰਧਾਨ ਅਮਰਵੀਰ ਸਿੰਘਨੇ ਦੱਸਿਆ ਕਿ ਲੁਧਿਆਣਾ ਦੇ 30 ਫੀਸਦੀ ਹੋਟਲ ਬੰਦ ਹੋ ਚੁੱਕੇ ਹਨ। ਹਰ ਮਹੀਨੇ ਛੇ ਤੋਂ ਸੱਤ ਕਰੋੜ ਦਾ ਨੁਕਸਾਨ ਸਿਰਫ ਲੁਧਿਆਣਾ ‘ਚ ਹੀ ਹੋ ਰਿਹਾ ਹੈ, ਅਤੇ ਜੇਕਰ ਇਹੀ ਹਾਲ ਰਿਹਾ ਤਾਂ ਆਉਂਦੇ ਦਿਨਾਂ ‘ਚ 70-80 ਫੀਸਦੀ ਹੋਟਲ ਪੰਜਾਬ ‘ਚ ਬੰਦ ਹੋਣ ਦੀ ਉਨ੍ਹਾਂ ਗੱਲ ਕਹੀ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਬੁੱਕ ਕੀਤੇ ਗਏ ਹੋਟਲਾਂ ਦੇ ਵਿੱਚ ਕੋਈ ਰਹਿਣ ਨੂੰ ਤਿਆਰ ਨਹੀਂ, ਬਾਹਰੋਂ ਆਏ ਲੋਕ ਵੀ ਆਪਣੇ ਘਰ ਵਿੱਚ ਜਾਂ ਮੁਫਤ ਸਰਕਾਰੀ ਖਰਚੇ ‘ਤੇ ਹੀ ਰਹਿਣਾ ਚਾਹੁੰਦੇ ਹਨ।