ਦੀਪਿਕਾ ਕੁਮਾਰੀ ਨੇ ਹਾਸਿਲ ਕੀਤਾ ਟੋਕਿਓ ਓਲੰਪਿਕ ‘ਚ 9ਵਾਂ ਰੈਂਕ ਹਾਸਿਲ

ਭਾਰਤ ਨੇ ਸ਼ੁੱਕਰਵਾਰ ਨੂੰ ਟੋਕਿਓ ਓਲੰਪਿਕ ਵਿਚ ਆਪਣੀ ਮੁਹਿੰਮ ਦਾ ਆਗਾਜ਼ ਕੀਤਾ, ਜਦੋਂ ਤਗਮੇ ਦੀ ਉਮੀਦ ਵਾਲੀ ਤਜ਼ਰਬੇਕਾਰ ਤੀਰਅੰਦਾਜ਼ ਦੀਪਿਕਾ ਕੁਮਾਰੀ ਮਹਿਲਾ ਵਿਅਕਤੀਗਤ ਰੈਂਕਿੰਗ ਰਾਉਂਡ ਵਿਚ ਨੌਵੇਂ ਸਥਾਨ ’ਤੇ ਰਹੀ ਅਤੇ ਹੁਣ ਮੁੱਖ ਮੁਕਾਬਲੇ ਦੇ ਪਹਿਲੇ ਗੇੜ ਵਿਚ ਇਕ ਆਸਾਨ ਵਿਰੋਧੀ ਮਿਲਿਆ ਹੈ। ਯੁਮੇਨੋਸ਼ੀਮਾ ਪਾਰਕ ਵਿਖੇ ਹੋਏ ਮੁਕਾਬਲੇ ਵਿਚ ਵਿਸ਼ਵ ਦੀ ਨੰਬਰ ਇਕ ਤੀਰਅੰਦਾਜ਼ ਦੀਪਿਕਾ ਨੇ 663 ਸਕੋਰ ਬਣਾਏ, ਜਿਸ ਵਿਚ ਪਹਿਲੇ ਹਾਫ ਵਿਚ 334 ਅਤੇ ਦੂਜੇ ਹਾਫ ਵਿਚ 329 ਸਕੋਰ ਰਿਹਾ। ਉਨ੍ਹਾਂ ਨੇ 72 ਨਿਸ਼ਾਨਿਆਂ ਵਿਚੋਂ 30 ਵਾਰ ਪਰਫੈਕਟ 10 ਸਕੋਰ ਕੀਤਾ। ਦੀਪਿਕਾ ਦਾ ਸਾਹਮਣਾ ਹੁਣ ਵਿਸ਼ਵ ਦੇ 193ਵੇਂ ਨੰਬਰ ਦੀ ਤੀਰਅੰਦਾਜ਼ ਭੂਟਾਨ ਦੀ ਕਰਮਾ ਨਾਲ ਹੋਵੇਗਾ, ਜੋ ਰੈਂਕਿੰਗ ਰਾਉਂਡ ਵਿਚ 56ਵੇਂ ਸਥਾਨ ‘ਤੇ ਰਹੀ। ਪਹਿਲੇ ਤਿੰਨ ਸਥਾਨਾਂ ‘ਤੇ ਕੋਰੀਆਈ ਤੀਰਅੰਦਾਜ਼ਾਂ ਦਾ ਦਬਦਬਾ ਰਿਹਾ। ਕੋਰੀਆ ਦੀ 20 ਸਾਲਾ ਅਨ ਸਾਨ 680 ਦੇ ਸਕੋਰ ਨਾਲ ਸਿਖ਼ਰ ਸਥਾਨ ‘ਤੇ ਰਹੀ, ਜੋ ਇਕ ਓਲੰਪਿਕ ਰਿਕਾਰਡ ਵੀ ਹੈ। ਪਹਿਲਾਂ ਓਲੰਪਿਕ ਰਿਕਾਰਡ 673 ਸੀ, ਜਦੋਂ ਕਿ ਵਿਸ਼ਵ ਰਿਕਾਰਡ 692 ਦਾ ਹੈ, ਜੋ ਕਾਂਗ ਚੇਈ ਵੋਂਗ ਦੇ ਨਾਮ ਹੈ।

ਕੁਆਰਟਰ ਫਾਈਨਲ ਵਿਚ  ਦੀਪਿਕਾ ਦਾ ਮੁਕਾਬਲਾ ਅਨ ਸਾਨ ਨਾਲ ਹੋਣ ਦੀ ਸੰਭਾਵਨਾ ਹੈ। ਟੋਕਿਓ ਟੈਸਟ ਟੂਰਨਾਮੈਂਟ 2019 ਵਿਚ ਦੀਪਿਕਾ ਨੂੰ ਹਰਾਉਣ ਵਾਲੀ ਅਨ ਸਾਨ ਨੇ 36 ਵਾਰ 10 ਸਕੋਰ ਕੀਤਾ। ਜਾਂਗ ਮਿਨਹੀ 677 ਅੰਕਾਂ ਨਾਲ ਦੂਜੇ ਅਤੇ ਕਾਂਗ ਚੇਈ ਵੋਂਗ 675 ਅੰਕਾਂ ਨਾਲ ਤੀਜੇ ਸਥਾਨ ‘ਤੇ ਰਹੀ। ਦੀਪਿਕਾ 36 ਨਿਸ਼ਾਨਿਆਂ ਦੇ ਬਾਅਦ 334 ਅੰਕਾਂ ਨਾਲ ਚੌਥੇ ਸਥਾਨ ‘ਤੇ ਸੀ ਅਤੇ ਕੋਰੀਆ ਦੀ ਦਿੱਗਜ ਕਾਂਗ ਤੋਂ ਅੱਗੇ ਸੀ। ਇਸ ਤੋਂ ਬਾਅਦ ਦੂਜੇ ਹਾਫ ਵਿਚ ਦੀਪਿਕਾ ਦਾ ਪ੍ਰਦਰਸ਼ਨ ਖ਼ਰਾਬ ਹੋਇਆ। ਉਨ੍ਹਾਂ ਕਿਹਾ, ‘ਮੈਨੂੰ ਲੱਗਦਾ ਹੈ ਕਿ ਮੇਰਾ ਪ੍ਰਦਰਸ਼ਨ ਚੰਗਾ ਅਤੇ ਮਾੜਾ ਦੋਵੇਂ ਸੀ। ਇਹ ਵਿਚਕਾਰ ਦਾ ਰਿਹਾ।’ ਆਖਰੀ 6 ਸੈੱਟਾਂ ਵਿਚ ਮਾੜੇ ਪ੍ਰਦਰਸ਼ਨ ਬਾਰੇ ਉਨ੍ਹਾਂ ਕਿਹਾ,“ ਮੈਨੂੰ ਨਹੀਂ ਪਤਾ ਕਿ ਅਜਿਹਾ ਕਿਉਂ ਹੋਇਆ। ਮੈਂ ਆਪਣੇ ਸ਼ਾਟ ਨੂੰ ਨਿਯੰਤਰਿਤ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਸੀ ਤਾਂਕਿ ਮੈਂ ਬਿਹਤਰ ਖੇਡ ਸਕਾਂ।’