ਮੁੰਡੇ ਦੇ ਅਮਰੀਕਾ ਜਾਣ ਦੀ ਖ਼ੁਸ਼ੀ ‘ਚ ਘਰੇ ਰੱਖੀ ਪਾਰਟੀ ਦੌਰਾਨ ਪਟਾਕਿਆਂ ਭੁਲੇਖੇ ਚਲਾ ਦਿੱਤੀਆਂ ਗੋਲੀਆਂ! ਇਕ ਨੌਜਵਾਨ ਦੀ ਮੌਤ

ਜਸ਼ਨ ਦੇ ਮਾਹੌਲ ਵਿੱਚ ਇੰਨਾ ਵੀ ਨਾ ਡੁੱਬ ਜਾਓ ਕਿ ਤੁਹਾਨੂੰ ਕਿਸੇ ਚੀਜ਼ ਬਾਰੇ ਵੀ ਪਤਾ ਹੀ ਨਾ ਲੱਗੇ। ਖ਼ਬਰ ਤਰਨਤਾਰਨ ਦੇ ਪਿੰਡ ਖਾਲੜਾ ਤੋਂ ਸਾਹਮਣੇ ਆਈ ਹੈ, ਜਿੱਥੇ ਇਕ ਨੌਜਵਾਨ ਦੇ ਅਮਰੀਕਾ ਜਾਣ ਦੀ ਖੁਸ਼ੀ ਵਿੱਚ ਖੀਵੇ ਹੋ ਗਏ ਸਨ ਕਿ ਇਸ ਦੌਰਾਨ ਵੱਡਾ ਹਾਦਸਾ ਵਾਪਰ ਗਿਆ, ਇੰਨਾ ਹੀ ਨਹੀਂ ਇਸ ਹਾਦਸੇ ਦੌਰਾਨ ਇਕ ਨੌਜਵਾਨ ਨੂੰ ਆਪਣੀ ਜਾਨ ਤੱਕ ਗੁਆਉਣੀ ਪਈ।

ਦਰਅਸਲ ਇੱਥੇ ਗੁਰਲਾਲ ਸਿੰਘ ਨਾਂ ਦੇ ਨੌਜਵਾਨ ਨੇ ਅਮਰੀਕਾ ਜਾਣਾ ਸੀ। ਇਸੇ ਖੁਸ਼ੀ ਵਿੱਚ ਘਰ ਵਿੱਚ ਗੁਰਲਾਲ ਦੇ ਭਰਾ ਗੁਰਦੇਵ ਸਿੰਘ ਵੱਲੋਂ ਪਾਰਟੀ ਰੱਖੀ ਗਈ। ਇਸ ਪਾਰਟੀ ਵਿੱਚ ਗੁਰਦੇਵ ਸਿੰਘ ਦੇ ਕੁੱਝ ਦੋਸਤ ਵੀ ਆਏ ਹੋਏ ਸਨ। ਪਾਰਟੀ ‘ਚ ਪਟਾਕੇ ਚਲਾਏ ਜਾ ਰਹੇ ਸੀ ਪਰ ਇਸ ਦੌਰਾਨ ਗੁਰਦੇਵ ਸਿੰਘ ਦੇ ਦੋਸਤਾਂ ਵੱਲੋਂ ਗੋਲੀਆਂ ਚਲਾਈਆਂ ਗਈਆਂ , ਇਨ੍ਹਾਂ ਵਿੱਚੋਂ ਇਕ ਗੋਲੀ ਨਿਸ਼ਾਨ ਸਿੰਘ ਪੁੱਤਰ ਰੂਪ ਸਿੰਘ ਵਾਸੀ ਖੇਮਕਰਨ ਦੇ ਲੱਗ ਗਈ, ਜਿਸ ਦੀ ਮੌਕੇ ਤੇ ਹੀ ਮੌਤ ਹੋ ਗਈ।

ਇਹ ਵੀ ਪਤਾ ਲੱਗਿਆ ਹੈ ਕਿ ਮ੍ਰਿਤਕ ਨਿਸ਼ਾਨ ਸਿੰਘ ਗੁਰਦੇਵ ਸਿੰਘ ਦਾ ਰਿਸ਼ਤੇਦਾਰ ਹੀ ਹੈ। ਫਿਲਹਾਲ ਮੌਕੇ ‘ਤੇ ਪਹੁੰਚੀ ਪੁਲਿਸ ਵੱਲੋਂ ਮਾਮਲਾ ਦਰਜ ਕਰਕੇ ਜਾਂਚ ਕੀਤਾ ਜਾ ਰਹੀ ਹੈ।