ਪੰਜਾਬੀ ਗਾਇਕ ਵੱਡਾ ਗਰੇਵਾਲ ਨਜਾਇਜ਼ ਅਫ਼ੀਮ ਸਮੇਤ ਗ੍ਰਿਫ਼ਤਾਰ

ਪੰਜਾਬੀ ਗਾਇਕ ਗੁਰਿੰਦਰ ਸਿੰਘ ਉਰਫ ਵੱਡਾ ਗਰੇਵਾਲ ਨੂੰ ਮੋਹਾਲੀ ਦੀ ਸੋਹਾਣਾ ਪੁਲਿਸ ਵੱਲੋਂ ਨਜਾਇਜ਼ ਤਰੀਕੇ ਨਾਲ ਅਫ਼ੀਮ ਰੱਖਣ ਦੇ ਜ਼ੁਰਮ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਜਾਣਕਾਰੀ ਲਈ ਦਸ ਦੇਈਏ ਕਿ ਗਾਇਕ ਵੱਡਾ ਗਰੇਵਾਲ ਦੀ ਨਸ਼ੇ ਦੀ ਓਵਰਡੋਜ਼ ਕਰਕੇ 13 ਅਪ੍ਰੈਲ ਨੂੰ ਹਾਲਾਤ ਖ਼ਰਾਬ ਹੋ ਗਈ ਸੀ ਜਿਸ ਤੋਂ ਬਾਅਦ ਉਸਨੂੰ ਸੋਹਾਣਾ ਹਸਪਤਾਲ ਵਿਖੇ ਭਰਤੀ ਕਰਵਾਇਆ ਗਿਆ ਜਿੱਥੇ ਉਸਨੂੰ ਵੈਂਟੀਲੇਟਰ ਉੱਪਰ ਰੱਖਣਾ ਪਿਆ।ਹਾਲਾਤਾਂ ਦੇ ਚੱਲਦੇ ਹਸਪਤਾਲ ਪ੍ਰਸ਼ਾਸਨ ਵੱਲੋਂ ਸੋਹਾਣਾ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ ਜਿਸ ਤੋਂ ਬਾਅਦ ਜਦੋਂ ਪੁਲਿਸ ਹਸਪਤਾਲ ‘ ਚ ਗਈ ਤਾਂ ਇਸ ਗਾਇਕ ਦੇ ਬੈਗ ‘ਚੋਂ 30 ਗ੍ਰਾਮ ਅਫੀਮ ਬਰਾਮਦ ਹੋਈ ਜਿਸ ਤੋਂ ਬਾਅਦ ਪੁਲਿਸ ਵੱਲੋਂ ਮਾਮਲਾ ਦਰਜ ਕਰ ਲਿਆ ਗਿਆ ਅਤੇ ਬੀਤੇ ਦਿਨ ਹਸਪਤਾਲ ਤੋਂ ਛੁੱਟੀ ਮਿਲਣ ਤੋਂ ਬਾਅਦ ਵੱਡਾ ਗਰੇਵਾਲ ਨੂੰ ਹਿਰਾਸਤ ਵਿੱਚ ਲੈਕੇ ਕੋਰਟ ਵਿੱਚ ਪੇਸ਼ ਕੀਤਾ ਗਿਆ ਜਿੱਥੇ ਅਦਾਲਤ ਵੱਲੋਂ ਗਰੇਵਾਲ ਨੂੰ ਬਰਨਾਲਾ ਜੇਲ੍ਹ ਨਿਆਇਕ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ ਹੈ।

ਮੁੱਢਲੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਵੱਡਾ ਗਰੇਵਾਲ ਕੁੱਝ ਦਿਨ ਪਹਿਲਾਂ 51 ਸੈਕਟਰ ਆਪਣੇ ਦੋਸਤ ਕੋਲ ਆਇਆ ਸੀ ਅਤੇ ਉਹ ਅਲੱਗ ਅਲੱਗ ਹੋਟਲਾਂ ਵਿੱਚ ਵੀ ਰੁਕ ਰਿਹਾ ਸੀ । ਪਰ ਹਾਲੇ ਤੱਕ ਪੁਲਿਸ ਇਹ ਨਹੀਂ ਪਤਾ ਲਗਾ ਪਾਈ ਹੈ ਕਿ ਵੱਡਾ ਗਰੇਵਾਲ ਦੀ ਹਾਲਾਤ ਕਿਹੜੇ ਨਸ਼ੇ ਦੀ ਓਵਰਡੋਜ ਨਾਲ ਖ਼ਰਾਬ ਹੋਈ ਹੈ ਕਿਉਂਕਿ ਮਾਹਿਰਾਂ ਦਾ ਮੰਨਣਾ ਹੈ ਕਿ ਅਫ਼ੀਮ ਨਾਲ ਇੰਨੀ ਓਵਰਡੋਜ਼ ਨਹੀਂ ਹੋ ਸਕਦੀ ਕਿ ਕਿਸੇ ਨੂੰ ਵੈਂਟੀਲੇਟਰ ਦੀ ਲੋੜ ਪਵੇ ਬਾਕੀ ਹਸਪਤਾਲ ਵੱਲੋਂ ਇਸ ਲਈ ਖੂਨ ਦੇ ਸੈਂਪਲ ਲਏ ਗਏ ਹਨ ਜਿਸ ਤੋਂ ਪਤਾ ਲੱਗ ਜਾਵੇਗਾ ਕਿ ਗਾਇਕ ਨੇ ਕਿਹੜਾ ਨਸ਼ਾ ਕਿੰਨੀ ਮਾਤਰਾ ‘ਚ ਲਿਆ ਸੀ।