ਨਸਬੰਦੀ ਤੋਂ ਬਾਅਦ ਔਰਤ ਹੋਈ ਗਰਭਵਤੀ,ਹਾਈਕੋਰਟ ਨੇ ਕਿਹਾ ਮਹਿਲਾ ਦੇ ਹੱਕ ‘ਚ ਸੁਣਵਾਈਆਂ ਫ਼ੈਸਲਾ

ਟਿਊਬਕਟੋਮੀ ਕਰਵਾਉਣ ਦੇ ਬਾਵਜੂਦ ਇੱਕ ਔਰਤ ਦੇ ਗਰਭਵਤੀ ਹੋਣ ਦਾ ਮਾਮਲਾ ਮਦਰਾਸ ਹਾਈ ਕੋਰਟ ਵਿੱਚ ਪਹੁੰਚ ਗਿਆ ਹੈ। ਮਦਰਾਸ ਹਾਈ ਕੋਰਟ ਨੇ ਮਹਿਲਾ ਦੇ ਹੱਕ ਵਿੱਚ ਫੈਸਲਾ ਸੁਣਾਉਂਦੇ ਹੋਏ ਤਾਮਿਲਨਾਡੂ ਸਰਕਾਰ ਨੂੰ ਉਸ ਨੂੰ 3 ਲੱਖ ਰੁਪਏ ਦਾ ਮੁਆਵਜ਼ਾ ਦੇਣ ਦਾ ਹੁਕਮ ਦਿੱਤਾ ਹੈ।

ਮਦਰਾਸ ਹਾਈ ਕੋਰਟ ਦੀ ਮਦੁਰਾਈ ਬੈਂਚ ਨੇ ਸਰਕਾਰ ਨੂੰ ਕਿਸੇ ਸਰਕਾਰੀ ਜਾਂ ਨਿੱਜੀ ਅਦਾਰੇ ਵਿੱਚ ਔਰਤ ਦੇ ਤੀਜੇ ਬੱਚੇ ਦੀ ਪੜ੍ਹਾਈ ਦਾ ਖਰਚਾ ਚੁੱਕਣ ਦਾ ਵੀ ਨਿਰਦੇਸ਼ ਦਿੱਤਾ ਹੈ। ਹਾਈ ਕੋਰਟ ਨੇ ਸਰਕਾਰ ਨੂੰ ਕਿਹਾ ਕਿ ਉਹ ਪਹਿਲਾਂ ਤੋਂ ਅਦਾ ਕੀਤੀ ਗਈ ਕੋਈ ਵੀ ਫੀਸ ਵਾਪਸ ਕਰੇ ਅਤੇ ਕਿਤਾਬਾਂ, ਸਟੇਸ਼ਨਰੀ, ਪਹਿਰਾਵੇ ਅਤੇ ਹੋਰ ਵਿਦਿਅਕ ਲੋੜਾਂ ਨਾਲ ਸਬੰਧਤ ਸਾਰੇ ਭਵਿੱਖ ਦੇ ਖਰਚੇ ਸਹਿਣ ਕਰੇ।

ਜਸਟਿਸ ਬੀ ਪੁਗਾਲੇਂਧੀ ਦੇ ਬੈਂਚ ਨੇ ਬੱਚੇ ਦੇ ਰੱਖ-ਰਖਾਅ ਅਤੇ ਹੋਰ ਲੋੜਾਂ ਲਈ 1.20 ਲੱਖ ਰੁਪਏ ਸਾਲਾਨਾ ਜਾਂ 10,000 ਰੁਪਏ ਪ੍ਰਤੀ ਮਹੀਨਾ ਦੇਣ ਦਾ ਵੀ ਹੁਕਮ ਦਿੱਤਾ ਹੈ। ਇਹ ਰਕਮ ਬੱਚੇ ਦੇ ਗ੍ਰੈਜੂਏਟ ਹੋਣ ਜਾਂ 21 ਸਾਲ ਦੇ ਹੋਣ ਤੱਕ ਦਿੱਤੀ ਜਾਵੇਗੀ। ਇਹ ਫੈਸਲਾ 2016 ਵਿੱਚ ਮਦੁਰਾਈ ਬੈਂਚ ਵਿੱਚ ਥੂਥੂਕੁਡੀ ਦੀ ਇੱਕ ਔਰਤ ਦੁਆਰਾ ਦਾਇਰ ਪਟੀਸ਼ਨ ਉੱਤੇ ਜਾਰੀ ਕੀਤਾ ਗਿਆ ਸੀ।

ਪੀੜਤ ਔਰਤ ਘਰੇਲੂ ਔਰਤ ਹੈ ਅਤੇ ਉਸਦਾ ਪਤੀ ਖੇਤਾਂ ਵਿੱਚ ਮਜ਼ਦੂਰੀ ਕਰਦਾ ਹੈ। ਔਰਤ ਦੇ ਪਹਿਲਾਂ ਹੀ ਦੋ ਬੱਚੇ ਹਨ। 2013 ਵਿੱਚ, ਔਰਤ ਨੇ ਥੂਥੂਕੁਡੀ ਸਰਕਾਰੀ ਮੈਡੀਕਲ ਕਾਲਜ ਹਸਪਤਾਲ ਵਿੱਚ ਨਸਬੰਦੀ ਕਰਵਾਈ ਸੀ। ਹਾਲਾਂਕਿ ਡਾਕਟਰੀ ਅਣਗਹਿਲੀ ਕਾਰਨ ਮਾਰਚ 2014 ‘ਚ ਔਰਤ ਦੁਬਾਰਾ ਗਰਭਵਤੀ ਹੋ ਗਈ ਅਤੇ ਜਨਵਰੀ 2015 ‘ਚ ਆਪਣੇ ਤੀਜੇ ਬੱਚੇ ਨੂੰ ਜਨਮ ਦਿੱਤਾ।