ਕੌਂਣ ਹੈ ਆਰਤੀ ਸਰੀਨ? ਜਿਸ ਨੇ ਆਰਮਡ ਫੋਰਸਿਜ਼ ਮੈਡੀਕਲ ਸੇਵਾਵਾਂ ਦੇ ਡਾਇਰੈਕਟਰ ਜਨਰਲ ਵਜੋਂ ਸੰਭਾਲਿਆ ਅਹੁਦਾ

ਵਾਈਸ ਐਡਮਿਰਲ ਆਰਤੀ ਸਰੀਨ ਨੇ ਅੱਜ ਆਰਮਡ ਫੋਰਸਿਜ਼ ਮੈਡੀਕਲ ਸਰਵਿਸਿਜ਼ (DGAFMS) ਦੇ ਡਾਇਰੈਕਟਰ ਜਨਰਲ ਵੱਜੋਂ ਅਹੁਦਾ ਸੰਭਾਲ ਲਿਆ ਹੈ। ਉਹ ਟ੍ਰਾਈ-ਸਰਵਿਸ ਆਰਮਡ ਫੋਰਸਿਜ਼ ਮੈਡੀਕਲ ਸਰਵਿਸ ਦੇ ਮੁਖੀ ਵਜੋਂ ਅਹੁਦਾ ਸੰਭਾਲਣ ਵਾਲੀ ਪਹਿਲੀ ਮਹਿਲਾ ਅਧਿਕਾਰੀ ਹੈ। ਭਾਰਤੀ ਫੌਜ ਦੇ ਅਧਿਕਾਰੀ ਨੇ ਕਿਹਾ ਕਿ ਡੀਜੀਏਐਫਐਮਐਸ ਹਥਿਆਰਬੰਦ ਬਲਾਂ ਨਾਲ ਸਬੰਧਤ ਸਮੁੱਚੇ ਮੈਡੀਕਲ ਨੀਤੀ ਮਾਮਲਿਆਂ ਲਈ ਸਿੱਧੇ ਤੌਰ ‘ਤੇ ਰੱਖਿਆ ਮੰਤਰਾਲੇ ਨੂੰ ਜ਼ਿੰਮੇਵਾਰ ਹੈ।ਦੱਸ ਦੇਈਏ ਕਿ ਸਰੀਨ ਭਾਰਤੀ ਹਥਿਆਰਬੰਦ ਸੈਨਾਵਾਂ ਵਿੱਚ ਸੇਵਾ ਕਰਨ ਵਾਲੀ ਉੱਚ ਦਰਜੇ ਦੀ ਮਹਿਲਾ ਅਧਿਕਾਰੀ ਬਣ ਗਈ ਹੈ।

ਤਿੰਨੋ ਸੈਨਾਵਾਂ ‘ਚ ਨਿਭਾ ਚੁੱਕੀ ਸੇਵਾਵਾਂ-
ਡੀਜੀਏਐਫਐਮਐਸ (DGAFMS) ਦੇ 46ਵੇਂ ਡਾਇਰੈਕਟਰ ਜਨਰਲ ਵਜੋਂ ਆਪਣੀ ਨਿਯੁਕਤੀ ਤੋਂ ਪਹਿਲਾਂ, ਉਸਨੇ ਡੀਜੀ ਮੈਡੀਕਲ ਸੇਵਾਵਾਂ (ਨੇਵੀ), ਡੀਜੀ ਮੈਡੀਕਲ ਸੇਵਾਵਾਂ (ਏਅਰ) ਅਤੇ ਆਰਮਡ ਫੋਰਸਿਜ਼ ਮੈਡੀਕਲ ਕਾਲਜ (ਏਐਫਐਮਸੀ), ਪੁਣੇ ਦੇ ਡਾਇਰੈਕਟਰ ਅਤੇ ਕਮਾਂਡੈਂਟ ਵਜੋਂ ਕੰਮ ਕੀਤਾ।

ਪੜ੍ਹਾਈ ਅਤੇ ਸਿਖਲਾਈ-
ਆਰਤੀ ਸਰੀਨ AFMC, ਪੁਣੇ ਦੀ ਇੱਕ ਸਾਬਕਾ ਵਿਦਿਆਰਥੀ ਹੈ ਅਤੇ ਦਸੰਬਰ 1985 ਵਿੱਚ ਆਰਮਡ ਫੋਰਸਿਜ਼ ਮੈਡੀਕਲ ਸੇਵਾਵਾਂ ਵਿੱਚ ਸ਼ਾਮਲ ਹੋਈ ਸੀ। ਉਸਨੇ AFMC ਤੋਂ ਰੇਡੀਓਡਾਇਗਨੋਸਿਸ ਵਿੱਚ ਐਮਡੀ ਅਤੇ ਟਾਟਾ ਮੈਮੋਰੀਅਲ ਹਸਪਤਾਲ, ਮੁੰਬਈ ਤੋਂ ਰੇਡੀਏਸ਼ਨ ਓਨਕੋਲੋਜੀ ਵਿੱਚ ਨੈਸ਼ਨਲ ਬੋਰਡ ਡਿਪਲੋਮਾ ਦੇ ਨਾਲ-ਨਾਲ ਪਿਟਸਬਰਗ ਯੂਨੀਵਰਸਿਟੀ ਤੋਂ ਗਾਮਾ ਨਾਈਫ ਸਰਜਰੀ ਵਿੱਚ ਸਿਖਲਾਈ ਪ੍ਰਾਪਤ ਕੀਤੀ ਹੈ।

38 ਸਾਲ ਦੇ ਕਰੀਅਰ ਵਿੱਚ ਕਈ ਅਹੁਦਿਆਂ ‘ਤੇ ਨਿਭਾਈ ਜ਼ਿੰਮੇਵਾਰੀ-
38 ਸਾਲਾਂ ਦੇ ਕਰੀਅਰ ਵਿੱਚ, ਵਾਈਸ ਐਡਮਿਰਲ ਨੇ ਆਰਮੀ ਹਸਪਤਾਲ (ਆਰ ਐਂਡ ਆਰ) ਅਤੇ ਕਮਾਂਡ ਹਸਪਤਾਲ (ਦੱਖਣੀ ਕਮਾਨ)/ਏਐਫਐਮਸੀ ਪੁਣੇ ਵਿੱਚ ਪ੍ਰੋਫੈਸਰ ਅਤੇ ਚੀਫ਼, ਰੇਡੀਏਸ਼ਨ ਓਨਕੋਲੋਜੀ ਸਮੇਤ ਵੱਕਾਰੀ ਅਕਾਦਮਿਕ ਅਤੇ ਪ੍ਰਸ਼ਾਸਨਿਕ ਅਹੁਦਿਆਂ ‘ਤੇ ਕੰਮ ਕੀਤਾ ਹੈ। ਉਸਨੇ INHS ਅਸਵਿਨੀ ਦੇ ਕਮਾਂਡਿੰਗ ਅਫਸਰ ਅਤੇ ਭਾਰਤੀ ਜਲ ਸੈਨਾ ਦੀ ਦੱਖਣੀ ਅਤੇ ਪੱਛਮੀ ਸਮੁੰਦਰੀ ਕਮਾਂਡ ‘ਚ ਕਮਾਂਡ ਮੈਡੀਕਲ ਅਫਸਰ ਵਜੋਂ ਵੀ ਕੰਮ ਕੀਤਾ ਹੈ।

ਲੈਫਟੀਨੈਂਟ ਤੋਂ ਲੈ ਕੇ ਏਅਰ ਮਾਰਸ਼ਲ ਵਜੋਂ ਨਿਭਾਈ ਸੇਵਾ-
ਉਸਨੂੰ ਭਾਰਤੀ ਹਥਿਆਰਬੰਦ ਸੈਨਾਵਾਂ ਦੀਆਂ ਤਿੰਨੋਂ ਸ਼ਾਖਾਵਾਂ ਵਿੱਚ ਸੇਵਾ ਕਰਨ ਦਾ ਦੁਰਲੱਭ ਸਨਮਾਨ ਪ੍ਰਾਪਤ ਹੈ। ਉਸਨੇ ਭਾਰਤੀ ਫੌਜ ਵਿੱਚ ਲੈਫਟੀਨੈਂਟ ਤੋਂ ਕੈਪਟਨ ਤੱਕ, ਭਾਰਤੀ ਜਲ ਸੈਨਾ ਵਿੱਚ ਸਰਜਨ ਲੈਫਟੀਨੈਂਟ ਤੋਂ ਸਰਜਨ ਵਾਈਸ ਐਡਮਿਰਲ ਤੱਕ ਅਤੇ ਭਾਰਤੀ ਹਵਾਈ ਸੈਨਾ ਵਿੱਚ ਏਅਰ ਮਾਰਸ਼ਲ ਵਜੋਂ ਸੇਵਾ ਨਿਭਾਈ ਹੈ।

ਕਈ ਪ੍ਰਾਪਤੀਆਂ ਅਤੇ ਮਿਲ ਚੁੱਕੇ ਪੁਰਸਕਾਰ-
ਉਸ ਨੂੰ ਮਰੀਜ਼ਾਂ ਦੀ ਦੇਖਭਾਲ ਪ੍ਰਤੀ ਸਮਰਪਣ ਅਤੇ ਵਚਨਬੱਧਤਾ ਲਈ 2024 ਵਿੱਚ ਅਤਿ ਵਿਸ਼ਿਸ਼ਟ ਸੇਵਾ ਮੈਡਲ ਅਤੇ 2021 ਵਿੱਚ ਵਿਸ਼ਿਸ਼ਟ ਸੇਵਾ ਮੈਡਲ ਨਾਲ ਸਨਮਾਨਿਤ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ, ਉਸਨੂੰ 2017 ਵਿੱਚ ਸੈਨਾ ਦੇ ਮੁਖੀ ਦੁਆਰਾ ਪ੍ਰਸ਼ੰਸਾ ਦਾ ਪ੍ਰਮਾਣ ਪੱਤਰ, 2001 ਵਿੱਚ ਜਲ ਸੈਨਾ ਦੇ ਮੁਖੀ ਦੁਆਰਾ ਪ੍ਰਸ਼ੰਸਾ ਦਾ ਪ੍ਰਮਾਣ ਪੱਤਰ ਅਤੇ 2013 ਵਿੱਚ ਜਨਰਲ ਅਫਸਰ ਕਮਾਂਡਿੰਗ-ਇਨ-ਚੀਫ਼ ਦੁਆਰਾ ਪ੍ਰਸ਼ੰਸਾ ਦਾ ਸਰਟੀਫਿਕੇਟ ਪ੍ਰਾਪਤ ਹੋਇਆ ਹੈ।

ਨਾਰੀ ਸ਼ਕਤੀ ਪਹਿਲਕਦਮੀ ਦੀ ਇਕ ਪ੍ਰੇਰਣਾਦਾਇਕ ਉਦਾਹਰਣ-
ਹਾਲ ਹੀ ਵਿੱਚ, ਉਸਨੂੰ ਸੁਪਰੀਮ ਕੋਰਟ ਦੁਆਰਾ ਮੈਡੀਕਲ ਪੇਸ਼ੇਵਰਾਂ ਲਈ ਸੁਰੱਖਿਅਤ ਕੰਮ ਦੀਆਂ ਸਥਿਤੀਆਂ ਅਤੇ ਪ੍ਰੋਟੋਕੋਲ ਤਿਆਰ ਕਰਨ ਲਈ ਰਾਸ਼ਟਰੀ ਟਾਸਕ ਫੋਰਸ ਦੇ ਮੈਂਬਰ ਵਜੋਂ ਨਿਯੁਕਤ ਕੀਤਾ ਗਿਆ ਹੈ। ਉਹ ਜਵਾਨ ਔਰਤਾਂ ਨੂੰ ਹਥਿਆਰਬੰਦ ਬਲਾਂ ਵਿੱਚ ਸ਼ਾਮਲ ਹੋਣ ਲਈ ਪ੍ਰੇਰਿਤ ਕਰਨ ਵਿੱਚ ਮੋਹਰੀ ਰਹੀ ਹੈ ਅਤੇ ਸਰਕਾਰ ਦੀ ਨਾਰੀ ਸ਼ਕਤੀ ਪਹਿਲਕਦਮੀ ਦੀ ਇੱਕ ਪ੍ਰੇਰਣਾਦਾਇਕ ਉਦਾਹਰਣ ਹੈ।