ਕੀ ਪੰਜਾਬ ਦੇ ਬੰਦ ਪਏ 50 ਹਜ਼ਾਰ ਆਈਲੈਟਸ ਸੈਂਟਰ ਖੁੱਲ੍ਹਣਗੇ ?

ਨਾਭਾ,4 ਸਤੰਬਰ :(ਭੁਪਿੰਦਰ ਸਿੰਘ), ਆਈਲੈਟਸ ਸੈਂਟਰਾਂ ਦਾ ਕੰਮ ਇਸ ਵੇਲੇ ਬਿਲਕੁੱਲ ਠੱਪ ਹੋ ਗਿਆ ਹੈ,ਇਸ ਕਰਕੇ ਆਈਲੈਟਸ ਸੈਂਟਰ ਮਾਲਕਾਂ ਨੇ ਆਪਣੇ ਕਾਰੋਬਾਰ ਦੀ ਮੁੜ ਬਹਾਲੀ ਲਈ ਇੱਕਜੁੱਟ ਹੋ ਕੇ ਆਵਾਜ਼ ਉਠਾਈ ਹੈ ਅਤੇ ਪੰਜਾਬ ਸਰਕਾਰ ਨੂੰ ਗੁਹਾਰ ਲਗਾਈ। ਕਰੋਨਾ ਵਾਇਰਸ ਦੀ ਮਹਾਂਮਾਰੀ ਨੂੰ ਵੇਖਦੇ ਹੋਏ ਜਿੱਥੇ ਪੰਜਾਬ ਸਰਕਾਰ ਵੱਲੋਂ ਵੱਖ-ਵੱਖ ਸੰਸਥਾਵਾਂ ਨੂੰ ਰਿਆਇਤਾਂ ਦਿੱਤੀਆਂ ਗਈ ਹਨ। ਪਰ ਉੱਥੇ ਹੀ ਆਈਲੈਟਸ ਅਤੇ ਕੰਪਿਊਟਰ ਸੈਂਟਰ ਮਾਲਕ ਪੰਜਾਬ ਸਰਕਾਰ ਤੋਂ ਖ਼ਫ਼ਾ ਵਿਖਾਈ ਦੇ ਰਹੇ ਕਿਉਂਕਿ ਅਜੇ ਤੱਕ ਪੰਜਾਬ ਸਰਕਾਰ ਨੇ ਆਈਲੈਟਸ ਅਤੇ ਕੰਪਿਊਟਰ ਸੈਂਟਰਾਂ ਨੂੰ ਕੋਈ ਛੋਟ ਨਹੀਂ ਦਿੱਤੀ ਗਈ। ਜਿਸ ਕਰਕੇ ਪੰਜਾਬ ਦੇ 50 ਹਜ਼ਾਰ ਆਈਲੈਟਸ ਸੈਂਟਰ ਬੰਦ ਪਏ ਹਨ। ਜਿਸ ਦੇ ਤਹਿਤ ਨਾਭਾ ਦੇ ਆਈਲੈਟਸ ਤੇ ਕੰਪਿਊਟਰ ਸੈਂਟਰ ਮਾਲਕਾਂ ਦੀ ਮੀਟਿੰਗ ਦੀ ਦੀ ਅਗਵਾਈ ਪ੍ਰਧਾਨ ਇਕਬਾਲ ਸਿੱਧੂ ਦੁਆਰਾ ਕੀਤੀ ਗਈ। ਇਸ ਮੌਕੇ ਤੇ ਐਸੋਸੀਏਸ਼ਨ ਦੇ ਪ੍ਰਧਾਨ ਇਕਬਾਲ ਸਿੱਧੂ, ਹਰੀਸ ਡੁਡੇਜਾ ਆਈਲੈਟਸ ਸੈਂਟਰ ਮਾਲਕ ਨੇ ਕਿਹਾ ਕਿ ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਮਾਰਚ ਮਹੀਨੇ ਤੋਂ ਬੰਦ ਪਏ ਆਈਲੈਟਸ ਤੇ ਕੰਪਿਊਟਰ ਸੈਂਟਰਾਂ ਵੱਲ ਧਿਆਨ ਦੇਵੇ ਕਿਉਂਕਿ ਇਹ ਕਿੱਤਾ ਬਹੁਤ ਮੰਦੀ ਵਿੱਚੋਂ ਗੁਜ਼ਰ ਰਹੇ ਹਨ। ਪ੍ਰਧਾਨ ਸਿੱਧੂ ਨੇ ਕਿਹਾ ਕਿ ਕਈ ਸੈਂਟਰ ਮਾਲਕ ਬਿਲਡਿੰਗਾਂ ਦਾ ਕਿਰਾਇਆ ਦੇਣ ਦੇ ਨਾਲ-ਨਾਲ ਪ੍ਰਾਈਵੇਟ ਟੀਚਰਾਂ ਨੂੰ ਪਿਛਲੇ 6-7 ਮਹੀਨਿਆਂ ਤੋਂ ਪੱਲਿਓ ਤਨਖਾਹ ਦੇ ਰਹੇ ਹਨ, ਸਿਰਫ ਇਹ ਸੋਚ ਕੇ ਕਿ ਸ਼ਾਇਦ ਸਰਕਾਰ ਜਲਦੀ ਹੀ ਕੋਈ ਰਾਹਤ ਦਾ ਐਲਾਨ ਕਰ ਦੇਵੇ, ਜਿਸ ਦੇ ਬਾਵਜੂਦ ਹੁਣ ਆਈਲੈਟਸ ਤੇ ਕੰਪਿਊਟਰ ਸੈਂਟਰ ਮਾਲਕਾਂ ਦੇ ਹਾਲਾਤ ਬਹੁਤ ਹੀ ਮਾੜੇ ਹੋ ਗਏ ਹਨ। 

ਪੰਜਾਬ ਦੇ 50 ਹਜ਼ਾਰ ਆਈਲੈਟਸ ਸੈਂਟਰ ਪਿਛਲੇ ਛੇ ਮਹੀਨਿਆਂ ਤੋਂ ਬੰਦ ਪਏ ਹਨ ਅਤੇ ਜਿਸ ਦਾ ਕਿਰਾਇਆ ਹੁਣ ਆਈਲੈਟਸ ਸੈਂਟਰ ਮਾਲਕ ਆਪਣੇ ਪੱਲਿਉਂ ਦੇ ਰਹੇ ਹਨ। ਇਸ ਦੇ ਨਾਲ ਨਾਲ ਹੀ ਉਹ ਟੀਚਰਾਂ ਦੀ ਤਨਖਾਹ ਤੋਂ ਇਲਾਵਾ ਉਹਨਾਂ ਨੂੰ ਆਪਣੇ ਘਰ ਦਾ ਗੁਜ਼ਾਰਾ ਕਰਨਾ ਬਹੁਤ ਔਖਾ ਹੋ ਗਿਆ ਹੈ ।ਇਸ ਮਹਾਂਮਾਰੀ ਦੇ ਦੌਰਾਨ ਕਈ ਆਈਲੈਟਸ ਸੈਂਟਰ ਦੇ ਮਾਲਕ ਆਪਣੇ ਸੈਂਟਰ ਬੰਦ ਕਰ ਚੁੱਕੇ ਹਨ, ਕਿਉਂ ਜੋ ਉਨ੍ਹਾਂ ਦੇ ਸੈਂਟਰਾਂ ਦਾ ਖਰਚਾ ਪੂਰਾ ਨਹੀਂ ਹੋ ਰਿਹਾ, ਸਗੋਂ ਘਰੋਂ ਪੈਸੇ ਲਿਜਾ-ਲਿਜਾ ਕੇ ਘਰ ਦੇ ਹਾਲਾਤ ਵੀ ਮਾੜੇ ਹੋ ਗਏ ਹਨ।

ਇਸ ਮੌਕੇ ਤੇ ਐਸੋ: ਦੇ ਪ੍ਰਧਾਨ ਇਕਬਾਲ ਸਿੱਧੂ, ਆਈਲੈਟਸ ਸੈਂਟਰ ਮਾਲਕ ਹਰੀਸ ਡੁਡੇਜਾ ਨੇ ਕਿਹਾ ਅਸੀਂ ਪੰਜਾਬ ਸਰਕਾਰ ਤੋਂ ਮੰਗ ਕਰਦੇ ਹਾਂ ਕਿ ਆਈਲੈਟਸ ਸੈਂਟਰਾਂ ਅਤੇ ਕੰਪਿਊਟਰ ਸੈਂਟਰਾਂ ਨੂੰ ਰਾਹਤ ਦੇਵੇ,ਤਾਂ ਜੋ ਆਈਲੈਟਸ ਸੈਂਟਰਾਂ ਵਿੱਚ ਜਿਆਦਾਤਰ ਬਾਰਵੀਂ ਤੋਂ ਬਾਅਦ ਵਾਲੇ ਵਿਦਿਆਰਥੀ ਹੀ ਟ੍ਰੈਨਿੰਗ ਲੈਣ ਲਈ ਆਉਂਦੇ ਹਨ, ਜੋ ਕਿ ਪੜ੍ਹੇ ਲਿਖੇ ਹਨ ਅਤੇ ਉਹ ਸਰਕਾਰੀ ਹਦਾਇਤਾਂ ਦੀ ਪਾਲਣਾ ਵੀ ਵਧੀਆ ਢੰਗ ਨਾਲ ਕਰ ਸਕਦੇ ਹਨ।  ਪ੍ਰਧਾਨ ਸਿੱਧੂ ਨੇ ਕਿਹਾ ਕਿ ਇੱਕ ਪਾਸੇ ਸਰਕਾਰ ਵੱਲੋਂ ਜਿੰਮ, ਹੋਟਲ, ਰੈਸਟੋਰੈਂਟ ਆਦਿ ਨੂੰ ਰਾਹਤ ਦੇ ਦਿੱਤੀ ਹੈ ਜਿਸ ਕਰਕੇ ਸਾਨੂੰ ਵੀ ਸਰਕਾਰ ਰਾਹਤ ਦੇਵੇ ਤਾਂ ਜੋ ਸਾਡੇ ਬੰਦ ਪਏ ਕਾਰੋਬਾਰ ਮੁੜ ਤੋਂ ਸ਼ੁਰੂ ਹੋ ਸਕਣ। ਸਮੂਹ ਸੈਂਟਰ ਮਾਲਕਾਂ ਨੇ ਕਿਹਾ ਕਿ ਜੇਕਰ ਸਰਕਾਰ ਨੇ ਸਾਡੇ ਕਾਰੋਬਾਰ ਵੱਲ ਜਲਦ ਧਿਆਨ ਨਾ ਦਿੱਤਾ ਤਾਂ ਅਸੀਂ ਸੜਕਾਂ ਤੇ ਉਤਰਨ ਲਈ ਮਜਬੂਰ ਹੋਵਾਂਗੇ।