Punjab
ਪੰਜਾਬ ਦੇ ਮੁੱਖ ਮੰਤਰੀ ਦੀ ਰਿਹਾਇਸ਼ ਨੇੜੇ ਮਿਲਿਆ ਬੰਬ,ਅੱਜ ਇਸ ਨੂੰ ਕੀਤਾ ਜਾਵੇਗਾ ਡਿਫਿਊਜ਼
ਚੰਡੀਗੜ੍ਹ ‘ਚ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਕੋਠੀ ਤੋਂ ਕਰੀਬ 1 ਕਿਲੋਮੀਟਰ ਦੂਰ ਕਾਂਸਲ-ਨਿਆਗਾਓਂ ਟੀ-ਪੁਆਇੰਟ ਨੇੜੇ ਮਿਲੇ ਬੰਬ ਦੀ ਜਾਂਚ ਲਈ ਅੱਜ ਚੰਡੀਮੰਦਰ ਤੋਂ ਫੌਜ ਦੀ ਟੀਮ ਪਹੁੰਚੇਗੀ। ਇਸ ਦੌਰਾਨ ਬੰਬ ਨਿਰੋਧਕ ਟੀਮ ਇਸ ਨੂੰ ਡਿਫਿਊਜ਼ ਕਰੇਗੀ। ਚੰਡੀਗੜ੍ਹ ਪੁਲਿਸ ਨੇ ਸੋਮਵਾਰ ਸ਼ਾਮ ਨੂੰ ਇਸ ਦੀ ਜਾਣਕਾਰੀ ਫੌਜ ਨੂੰ ਦਿੱਤੀ ਸੀ।
ਹੈਲੀਪੈਡ ਵੀ ਨੇੜੇ ਹੀ ਹੈ
ਜਿਸ ਥਾਂ ਤੋਂ ਇਹ ਬੰਬ ਮਿਲਿਆ ਹੈ, ਉਸ ਥਾਂ ਤੋਂ ਕੁਝ ਦੂਰੀ ‘ਤੇ ਹੈਲੀਪੈਡ ਹੈ, ਜਿੱਥੇ ਸੀਐਮ ਭਗਵੰਤ ਮਾਨ ਦਾ ਹੈਲੀਕਾਪਟਰ ਉਤਰਦਾ ਹੈ। ਬੰਬ ਹੋਣ ਦੀ ਸੂਚਨਾ ਮਿਲਦਿਆਂ ਹੀ ਚੰਡੀਗੜ੍ਹ ਪੁਲੀਸ ਦੀ ਟੀਮ ਬੰਬ ਅਤੇ ਡਾਗ ਸਕੁਐਡ ਨਾਲ ਮੌਕੇ ’ਤੇ ਪਹੁੰਚ ਗਈ। ਇਸ ਦੇ ਨਾਲ ਹੀ ਯੂਟੀ ਪ੍ਰਸ਼ਾਸਨ ਦੀ ਡਿਜ਼ਾਸਟਰ ਮੈਨੇਜਮੈਂਟ ਟੀਮ ਅਤੇ ਫਾਇਰ ਬ੍ਰਿਗੇਡ ਵੀ ਆ ਗਈ।
ਇੱਕ ਫਾਈਬਰ ਡਰੱਮ ਵਿੱਚ ਰੱਖਿਆ ਬੰਬ
ਕਿਉਂਕਿ ਬੰਬ ਜ਼ਿੰਦਾ ਸੀ, ਪੁਲਿਸ ਨੇ ਤੁਰੰਤ ਇਸ ਨੂੰ ਇੱਕ ਫਾਈਬਰ ਡਰੱਮ ਵਿੱਚ ਪਾ ਦਿੱਤਾ ਅਤੇ ਇਸਦੇ ਆਲੇ ਦੁਆਲੇ ਰੇਤ ਦੀਆਂ ਬੋਰੀਆਂ ਰੱਖ ਦਿੱਤੀਆਂ ਤਾਂ ਜੋ ਬੰਬ ਫਟਣ ਦੀ ਸੂਰਤ ਵਿੱਚ ਆਲੇ ਦੁਆਲੇ ਦੇ ਖੇਤਰ ਨੂੰ ਜ਼ਿਆਦਾ ਨੁਕਸਾਨ ਨਾ ਹੋਵੇ।
ਫੌਜ ਦੱਸੇਗੀ, ਬੰਬ ਕਿੱਥੋਂ ਆਇਆ?
ਚੰਡੀਗੜ੍ਹ ਪੁਲੀਸ ਮੁਤਾਬਕ ਬੰਬ ਵਿੱਚ ਕੁਝ ਕੋਡ ਲਿਖੇ ਹੋਏ ਹਨ। ਜੋ ਫੌਜ ਵਰਗੀ ਲੱਗਦੀ ਹੈ। ਇਸ ਕਾਰਨ ਹੁਣ ਫੌਜ ਹੀ ਜਾਂਚ ਕਰੇਗੀ ਕਿ ਬੰਬ ਕਿੱਥੋਂ ਆਇਆ? ਪੁਲਿਸ ਨੇ ਇਸ ਸਬੰਧੀ ਜਾਣਕਾਰੀ ਦੇਣ ਲਈ ਫੌਜ ਦੇ ਅਧਿਕਾਰੀਆਂ ਤੋਂ ਵੀ ਮਦਦ ਮੰਗੀ ਹੈ।
