ਅਫਗਾਨਿਸਤਾਨ ‘ਚ ਬਿਊਟੀ ਪਾਰਲਰ ‘ਤੇ ਲੱਗੀ ਪਾਬੰਦੀ, ਤਾਲਿਬਾਨ ਨੇ ਕਿਹਾ- ਇਕ ਮਹੀਨੇ ‘ਚ ਸਾਰੇ ਬਿਊਟੀ ਸੈਲੂਨ ਕਰੋ ਬੰਦ

ਅਫਗਾਨਿਸਤਾਨ ਦੀ ਸਰਕਾਰ ‘ਤੇ ਕਬਜ਼ਾ ਕਰਨ ਵਾਲੇ ਅੱਤਵਾਦੀ ਸੰਗਠਨ ਤਾਲਿਬਾਨ ਨੇ ਦੇਸ਼ ਦੇ ਸਾਰੇ ਬਿਊਟੀ ਪਾਰਲਰ ਬੰਦ ਕਰਨ ਦਾ ਹੁਕਮ ਜਾਰੀ ਕਰ ਦਿੱਤਾ ਹੈ। ਬਿਊਟੀ ਪਾਰਲਰ ਚਲਾਉਣ ਵਾਲੀਆਂ ਔਰਤਾਂ ਨੂੰ ਇੱਕ ਮਹੀਨੇ ਦਾ ਸਮਾਂ ਦਿੱਤਾ ਗਿਆ ਹੈ। ਹਾਲਾਂਕਿ ਹਜੇ ਤੱਕ ਇਸ ਪਾਬੰਦੀ ਦਾ ਕੋਈ ਵੀ ਖ਼ਾਸ ਕਾਰਨ ਨਹੀਂ ਦੱਸਿਆ ਗਿਆ ਹੈ।

ਤਾਲਿਬਾਨ ਨੇ 15 ਅਗਸਤ 2021 ਨੂੰ ਕਾਬੁਲ ਦੇ ਨਾਲ-ਨਾਲ ਪੂਰੇ ਅਫਗਾਨਿਸਤਾਨ ‘ਤੇ ਕਬਜ਼ਾ ਕਰ ਲਿਆ। ਉਦੋਂ ਤੋਂ ਲੈ ਕੇ ਹੁਣ ਤੱਕ ਇਸ ਨੇ ਲੜਕੀਆਂ ਅਤੇ ਔਰਤਾਂ ਦੇ ਸਿੱਖਿਆ ਅਤੇ ਨੌਕਰੀਆਂ ਨਾਲ ਸਬੰਧਤ ਸਾਰੇ ਅਧਿਕਾਰ ਖੋਹ ਲਏ ਹਨ।

ਤਾਲਿਬਾਨ ਨੇ ਕਿਹਾ- ਇਹ ਅਹਿਮ ਫੈਸਲਾ ਹੈ

ਤਾਲਿਬਾਨ ਦੇ ਗ੍ਰਹਿ ਮੰਤਰਾਲੇ ਨੇ ਬਿਊਟੀ ਪਾਰਲਰ ‘ਤੇ ਪਾਬੰਦੀ ਲਗਾਉਣ ਦੇ ਹੁਕਮ ਦੀ ਪੁਸ਼ਟੀ ਕੀਤੀ ਹੈ। ਅਫਗਾਨਿਸਤਾਨ ਵਿੱਚ ਹਜ਼ਾਰਾਂ ਬਿਊਟੀ ਪਾਰਲਰ ਹਨ। ਇਨ੍ਹਾਂ ਦੀ ਮਲਕੀਅਤ ਸਿਰਫ਼ ਔਰਤਾਂ ਕੋਲ ਹੈ। ਇਸ ਫ਼ਰਮਾਨ ਨਾਲ ਇਨ੍ਹਾਂ ਔਰਤਾਂ ਦਾ ਰੁਜ਼ਗਾਰ ਖੋਹ ਲਿਆ ਜਾਵੇਗਾ। ਜ਼ਿਆਦਾਤਰ ਪਾਰਲਰ ਘਰਾਂ ਵਿੱਚ ਔਰਤਾਂ ਵੱਲੋਂ ਖੋਲ੍ਹੇ ਗਏ ਸਨ ਅਤੇ ਇੱਥੇ ਕਿਸੇ ਵੀ ਮਰਦ ਦੇ ਦਾਖ਼ਲੇ ‘ਤੇ ਸਖ਼ਤ ਪਾਬੰਦੀ ਸੀ।
ਹੈਰਾਨੀ ਦੀ ਗੱਲ ਹੈ ਕਿ ਤਾਲਿਬਾਨ ਸਰਕਾਰ ਨੇ ਅਜੇ ਤੱਕ ਬਿਊਟੀ ਪਾਰਲਰ ਨੂੰ ਬੰਦ ਕਰਨ ਦੇ ਫੈਸਲੇ ਦਾ ਕਾਰਨ ਨਹੀਂ ਦੱਸਿਆ ਹੈ।ਤਾਲਿਬਾਨ ਦੀ ਤਰਫੋਂ ਕਿਹਾ ਗਿਆ- ਇਕ ਮਹੀਨਾ ਲੰਘਣ ਦਿਓ, ਕਾਰਨ ਉਸ ਤੋਂ ਬਾਅਦ ਹੀ ਦੱਸਿਆ ਜਾਵੇਗਾ।
20 ਸਾਲਾਂ ਤੋਂ ਅਫਗਾਨਿਸਤਾਨ ਵਿੱਚ ਹਜ਼ਾਰਾਂ ਬਿਊਟੀ ਪਾਰਲਰ ਸਨ। ਉਦੋਂ ਤਾਲਿਬਾਨ ਨੇ ਕਈ ਵਾਰ ਕਿਹਾ ਸੀ ਕਿ ਇਹ ਪਾਰਲਰ ਬੇਕਾਰ ਗੱਲਾਂ ਅਤੇ ਗੱਪਾਂ ਲਈ ਵਰਤੇ ਜਾਂਦੇ ਹਨ।

‘ਇੱਥੇ ਔਰਤਾਂ ਨਾ ਹੁੰਦੀਆਂ ਤਾਂ ਚੰਗਾ ਹੁੰਦਾ’

ਤਾਲਿਬਾਨ ਦੇ ਫੈਸਲੇ ਤੋਂ ਬਾਅਦ ਕਾਬੁਲ ਦੇ ਇੱਕ ਬਿਊਟੀ ਪਾਰਲਰ ਦੇ ਮੈਨੇਜਰ ਨੇ ਕਿਹਾ- ਤਾਲਿਬਾਨ ਅਫਗਾਨਿਸਤਾਨ ਤੋਂ ਔਰਤਾਂ ਨੂੰ ਬਾਹਰ ਕੱਢ ਦਿੰਦਾ ਤਾਂ ਚੰਗਾ ਹੁੰਦਾ। ਉਨ੍ਹਾਂ ਦੀ ਹੋਂਦ ਹੀ ਖਤਮ ਹੋ ਜਾਂਦੀ। ਹੁਣ ਮੌਤ ਬਿਹਤਰ ਹੈ। ਚੰਗਾ ਹੁੰਦਾ ਜੇ ਅਸੀਂ ਅਫਗਾਨਿਸਤਾਨ ਵਿਚ ਜਨਮ ਨਾ ਲਿਆ ਹੁੰਦਾ।
ਹਾਲ ਹੀ ‘ਚ ਤਾਲਿਬਾਨ ਨੇ ਇਕ ਹੁਕਮ ‘ਚ ਕਿਹਾ ਸੀ ਕਿ ਸੰਯੁਕਤ ਰਾਸ਼ਟਰ ਨਾਲ ਜੁੜੇ ਗੈਰ ਸਰਕਾਰੀ ਸੰਗਠਨਾਂ ‘ਚ ਔਰਤਾਂ ਕੰਮ ਨਹੀਂ ਕਰ ਸਕਣਗੀਆਂ। ਇਸ ਤੋਂ ਬਾਅਦ ਸਰਕਾਰੀ ਨੌਕਰੀਆਂ ਵਿੱਚ ਰਹਿ ਗਈਆਂ ਔਰਤਾਂ ਨੂੰ ਵੀ ਬਹੁਤ ਹੀ ਗੁਪਤ ਤਰੀਕੇ ਨਾਲ ਨੌਕਰੀ ਤੋਂ ਹਟਾ ਦਿੱਤਾ ਗਿਆ।
ਤਾਲਿਬਾਨ ਸਰਕਾਰ ਨੇ ਬਿਊਟੀ ਪਾਰਲਰ ਬੰਦ ਕਰਨ ਲਈ ਲੈਟਰ ਹੈੱਡ ‘ਤੇ ਹੁਕਮ ਜਾਰੀ ਕੀਤਾ ਹੈ। ਇਸ ‘ਤੇ ਸੁਪਰੀਮ ਲੀਡਰ ਹਿਬਤੁੱਲਾ ਅਖੁੰਦਜ਼ਾਦਾ ਦੇ ਦਸਤਖਤ ਹਨ।