BREAKING: ਨੂਹ ‘ਚ ਬੁਲਡੋਜ਼ਰ ਦੀ ਕਾਰਵਾਈ ‘ਤੇ ਹਾਈਕੋਰਟ ਦੀ ਰੋਕ,3 ਦਿਨਾਂ ‘ਚ ਹੋਟਲ-ਸ਼ੋਰੂਮ ਸਣੇ 753 ਨਾਜਾਇਜ਼ ਉਸਾਰੀਆਂ ਢਾਹੀਆਂ

7 AUGUST 2023: ਹਰਿਆਣਾ ਦੇ ਨੂਹ ਵਿੱਚ ਸਰਕਾਰ ਦੀ ਬੁਲਡੋਜ਼ਰ ਦੀ ਕਾਰਵਾਈ ‘ਤੇ ਹਾਈਕੋਰਟ ਨੇ ਰੋਕ ਲਗਾ ਦਿੱਤੀ ਹੈ। ਹਾਈ ਕੋਰਟ ਦਾ ਹੁਕਮ ਆਉਂਦੇ ਹੀ ਡਿਪਟੀ ਕਮਿਸ਼ਨਰ ਧੀਰੇਂਦਰ ਖਰਗਟਾ ਨੇ ਤੁਰੰਤ ਅਧਿਕਾਰੀਆਂ ਨੂੰ ਕਾਰਵਾਈ ਕਰਨ ਤੋਂ ਰੋਕ ਦਿੱਤਾ। ਸਰਕਾਰ ਦੀ ਢਾਹੁਣ ਮੁਹਿੰਮ ਖਿਲਾਫ 3 ਵਕੀਲ ਹਾਈਕੋਰਟ ਗਏ। ਇਸ ਬਾਰੇ ਪੂਰੀ ਜਾਣਕਾਰੀ ਆਉਣੀ ਬਾਕੀ ਹੈ। ਢਾਹੁਣ ਦਾ ਕੰਮ ਪਿਛਲੇ 4 ਦਿਨਾਂ ਤੋਂ ਚੱਲ ਰਿਹਾ ਸੀ।

ਇਸ ਤੋਂ ਪਹਿਲਾਂ ਪਿਛਲੇ 3 ਦਿਨਾਂ ਵਿੱਚ ਪ੍ਰਸ਼ਾਸਨ ਨੇ ਨੂਹ ਵਿੱਚ 753 ਤੋਂ ਵੱਧ ਘਰਾਂ, ਦੁਕਾਨਾਂ, ਸ਼ੋਅਰੂਮਾਂ, ਝੁੱਗੀਆਂ ਅਤੇ ਹੋਟਲਾਂ ਨੂੰ ਢਾਹ ਦਿੱਤਾ ਹੈ। ਪ੍ਰਸ਼ਾਸਨ ਨੇ ਇਨ੍ਹਾਂ ਨੂੰ ਗੈਰ-ਕਾਨੂੰਨੀ ਦੱਸਦੇ ਹੋਏ ਕਿਹਾ ਕਿ ਇਨ੍ਹਾਂ ‘ਚ ਰਹਿਣ ਵਾਲੇ ਲੋਕ 31 ਜੁਲਾਈ ਦੀ ਹਿੰਸਾ ‘ਚ ਸ਼ਾਮਲ ਸਨ। ਕੱਲ੍ਹ ਪ੍ਰਸ਼ਾਸਨ ਨੇ 3 ਮੰਜ਼ਿਲਾ ਸਹਾਰਾ ਹੋਟਲ ਨੂੰ ਵੀ ਢਾਹ ਦਿੱਤਾ ਸੀ ਜਿੱਥੋਂ ਹਿੰਸਾ ਵਾਲੇ ਦਿਨ ਪਥਰਾਅ ਕੀਤਾ ਗਿਆ ਸੀ। ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਹੋਟਲ ਮਾਲਕ ਨੂੰ ਸਭ ਕੁਝ ਪਤਾ ਸੀ ਪਰ ਉਸ ਨੇ ਦੰਗਾਕਾਰੀਆਂ ਨੂੰ ਪੱਥਰ ਇਕੱਠੇ ਕਰਨ ਤੋਂ ਨਹੀਂ ਰੋਕਿਆ।

ਨੂਹ ਵਿੱਚ ਹੁਣ ਤੱਕ ਪ੍ਰਸ਼ਾਸਨ ਨੇ 37 ਥਾਵਾਂ ’ਤੇ ਕਾਰਵਾਈ ਕਰਕੇ 57.5 ਏਕੜ ਜ਼ਮੀਨ ਖਾਲੀ ਕਰਵਾਈ ਹੈ। ਇਨ੍ਹਾਂ ਵਿੱਚੋਂ 162 ਸਥਾਈ ਅਤੇ 591 ਅਸਥਾਈ ਢਾਂਚੇ ਢਾਹ ਦਿੱਤੇ ਗਏ। ਨੂਹ ਕਸਬੇ ਤੋਂ ਇਲਾਵਾ ਪੁਨਹਾਣਾ, ਨਗੀਨਾ, ਫਿਰੋਜ਼ਪੁਰ ਝਿਰਕਾ ਅਤੇ ਪਿੰਗਣਵਾ ਆਦਿ ਇਲਾਕਿਆਂ ਵਿੱਚ ਵੀ ਕਬਜ਼ੇ ਹਟਾਏ ਗਏ।