ਪਾਵਰਕੌਮ ਦੇ 884 ਬੈਂਕ ਡਿਫਾਲਟਰਾਂ ਮੁਲਾਜ਼ਮਾਂ ਤੋਂ ਵਸੂਲੀ ਜਾਵੇਗੀ ਕਰੋੜਾਂ ਦੀ ‘ਕਰਜ਼ਾ ਰਾਸ਼ੀ’

24 ਦਸੰਬਰ 2023:  ਸਰਕਾਰੀ ਨੌਕਰੀ ਕਰਨ ਵਾਲਿਆਂ ਲਈ ਕਰਜ਼ਾ ਲੈਣਾ ਆਸਾਨ ਹੈ ਕਿਉਂਕਿ ਬੈਂਕਾਂ ਨੂੰ ਪਤਾ ਹੈ ਕਿ ਜੇਕਰ ਕਰਮਚਾਰੀ ਕਰਜ਼ੇ ਦੀ ਰਕਮ ਮੋੜਨ ਤੋਂ ਝਿਜਕਦੇ ਹਨ ਤਾਂ ਬੈਂਕ ਸਬੰਧਤ ਵਿਭਾਗ ਕੋਲ ਪਹੁੰਚ ਕਰ ਕੇ ਉਨ੍ਹਾਂ ਦੇ ਕਰਜ਼ੇ ਦੀ ਰਕਮ ਦੀ ਵਸੂਲੀ ਕਰ ਸਕਦਾ ਹੈ, ਇਸ ਲਈ ਸਰਕਾਰੀ ਮੁਲਾਜ਼ਮਾਂ ਨੂੰ ਤੁਰੰਤ ਕਰਜ਼ਾ ਮਿਲ ਸਕਦਾ ਹੈ। ਇਸੇ ਲੜੀ ਤਹਿਤ ਪੰਜਾਬ ਸਰਕਾਰ ਅਧੀਨ ਚੱਲ ਰਹੇ ਸਹਿਕਾਰੀ ਬੈਂਕ ਨੇ ਪਾਵਰਕੌਮ ਦੇ 884 ਡਿਫਾਲਟਰ ਮੁਲਾਜ਼ਮਾਂ ਤੋਂ 9.44 ਕਰੋੜ ਰੁਪਏ ਦੀ ਵਸੂਲੀ ਲਈ ਸਰਕਾਰ ਕੋਲ ਪਹੁੰਚ ਕੀਤੀ ਹੈ। ਇਸ ’ਤੇ ਸਖ਼ਤ ਕਾਰਵਾਈ ਕਰਦਿਆਂ ਸਰਕਾਰ ਨੇ ਪਾਵਰਕੌਮ ਨੂੰ ਹੁਕਮ ਜਾਰੀ ਕੀਤੇ ਹਨ ਕਿ ਬੈਂਕ ਦੇ ਡਿਫਾਲਟ ਹੋਣ ਵਾਲੇ ਪਾਵਰਕੌਮ ਮੁਲਾਜ਼ਮਾਂ ਦੀ ਤਨਖਾਹ ਜਾਂ ਪੈਨਸ਼ਨ ਵਿੱਚੋਂ ਕਰਜ਼ੇ ਦੀ ਰਾਸ਼ੀ ਵਸੂਲ ਕੀਤੀ ਜਾਵੇ ਤਾਂ ਜੋ ਇਹ ਪੈਸਾ ਬੈਂਕ ਨੂੰ ਦਿੱਤਾ ਜਾ ਸਕੇ। ਉਪਰੋਕਤ ਕਾਰਵਾਈ ਸੁਸਾਇਟੀ ਐਕਟ 1961 ਦੀ ਧਾਰਾ 39 ਤਹਿਤ ਕੀਤੀ ਜਾ ਰਹੀ ਹੈ।

ਹੁਣ ਸਹਿਕਾਰੀ ਬੈਂਕ ਤੋਂ ਕਰਜ਼ਾ ਲੈ ਕੇ ਰਕਮ ਨਾ ਮੋੜਨ ਵਾਲੇ ਮੁਲਾਜ਼ਮਾਂ ਤੋਂ ਵਿਆਜ ਸਮੇਤ ਇਹ ਰਕਮ ਵਸੂਲੀ ਜਾਵੇਗੀ, ਜਿਸ ਕਾਰਨ ਉਨ੍ਹਾਂ ਨੂੰ ਤੈਅ ਰਕਮ ਤੋਂ ਵੱਧ ਰਕਮ ਅਦਾ ਕਰਨੀ ਪਵੇਗੀ। ਉਕਤ ਕਾਰਵਾਈ ਸ਼ਬਦਾਂ ਵਿਚ ਨਹੀਂ ਸਗੋਂ ਲਿਖਤੀ ਰੂਪ ਵਿਚ ਵੀ ਕੀਤੀ ਜਾਣ ਲੱਗੀ ਹੈ। ਬੈਂਕ ਨੇ ਇਸ ਸਬੰਧੀ ਸਰਕਾਰ ਤੱਕ ਪਹੁੰਚ ਕੀਤੀ ਸੀ ਅਤੇ ਮਿਤੀ 12-09-23 ਨੂੰ ਪੱਤਰ ਨੰਬਰ 6289 ਰਾਹੀਂ ਪੈਸੇ ਦੀ ਵਸੂਲੀ ਬਾਰੇ ਜਾਣੂ ਕਰਵਾਇਆ ਗਿਆ ਸੀ। ਇਸ ’ਤੇ ਸਰਕਾਰ ਨੇ ਕਿਸ਼ਤਾਂ ਤੋੜਨ ਵਾਲੇ ਪਾਵਰਕੌਮ ਦੇ 884 ਮੁਲਾਜ਼ਮਾਂ ਖ਼ਿਲਾਫ਼ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੰਜਾਬ ਸਰਕਾਰ ਦੇ ਮੁੱਖ ਸਕੱਤਰ ਵੱਲੋਂ ਪਾਵਰਕੌਮ ਦੇ ਪ੍ਰਮੁੱਖ ਸਕੱਤਰ ਨੂੰ ਜਾਰੀ ਪੱਤਰ 7695 ਮਿਤੀ 18-10-23 ਵਿੱਚ ਪੈਸੇ ਦੀ ਵਸੂਲੀ ਬਾਰੇ ਲਿਖਿਆ ਗਿਆ ਹੈ।

ਪੰਜਾਬ ਸਰਕਾਰ ਦੇ ਮੁੱਖ ਸਕੱਤਰ ਅਨੁਰਾਗ ਅਗਰਵਾਲ ਵੱਲੋਂ ਪਾਵਰਕੌਮ ਦੇ ਪ੍ਰਮੁੱਖ ਸਕੱਤਰ ਤੇਜਵੀਰ ਸਿੰਘ ਨੂੰ ਪੱਤਰ ਭੇਜਿਆ ਗਿਆ ਹੈ, ਜਿਸ ’ਤੇ ਪਾਵਰਕੌਮ ਨੇ ਹਰਕਤ ਵਿੱਚ ਆ ਕੇ ਵਿਭਾਗੀ ਕਾਰਵਾਈ ਦੇ ਹੁਕਮ ਦਿੱਤੇ ਹਨ। ਪਾਵਰਕੌਮ ਦੇ ਮੁੱਖ ਲੇਖਾ ਅਫਸਰ ਵੱਲੋਂ 22 ਦਸੰਬਰ 23 (ਸ਼ੁੱਕਰਵਾਰ) ਨੂੰ ਡੀ.ਡੀ.ਓਜ਼ ਨੂੰ ਜਾਰੀ ਪੱਤਰ ਨੰਬਰ 7481/7660 ਵਿੱਚ ਹਦਾਇਤਾਂ ਦਿੱਤੀਆਂ ਗਈਆਂ ਹਨ ਤਾਂ ਜੋ ਕਰਜ਼ੇ ਦੀ ਰਕਮ ਵਸੂਲੀ ਜਾ ਸਕੇ।