ਚੱਕਰਵਾਤ ਹਿਲੇਰੀ ਮੈਕਸੀਕੋ-ਕੈਲੀਫੋਰਨੀਆ ਵੱਲ ਰਿਹਾ ਵਧ, ਅਗਲੇ 2 ਦਿਨਾਂ ‘ਚ 10 ਇੰਚ ਮੀਂਹ ਦੀ ਸੰਭਾਵਨਾ…

19ਅਗਸਤ 2023:  ਉੱਤਰੀ ਚੱਕਰਵਾਤ ਅਗਲੇ ਕੁਝ ਦਿਨਾਂ ਵਿੱਚ ਅਮਰੀਕਾ ਦੇ ਕੈਲੀਫੋਰਨੀਆ ਨਾਲ ਟਕਰਾਉਣ ਵਾਲਾ ਹੈ। ਇਸ ਨੂੰ ਹਿਲੇਰੀ ਦਾ ਨਾਂ ਦਿੱਤਾ ਗਿਆ ਹੈ, ਜੋ ਇਸ ਸਮੇਂ ਮੈਕਸੀਕੋ ਵੱਲ ਜਾ ਰਹੀ ਹੈ। ਰਾਇਟਰਜ਼ ਮੁਤਾਬਕ ਹਿਲੇਰੀ ਸ਼੍ਰੇਣੀ 4 ਦਾ ਚੱਕਰਵਾਤ ਹੈ। ਅਮਰੀਕੀ ਤੱਟ ਨਾਲ ਟਕਰਾਉਣ ਤੋਂ ਬਾਅਦ ਇਹ ਖਦਸ਼ਾ ਜਤਾਇਆ ਜਾ ਰਿਹਾ ਹੈ ਕਿ ਇਸ ਕਾਰਨ ਅਮਰੀਕਾ ਦੇ 3 ਰਾਜਾਂ ਕੈਲੀਫੋਰਨੀਆ, ਐਰੀਜ਼ੋਨਾ ਅਤੇ ਨੇਵਾਡਾ ਵਿੱਚ ਇੱਕ ਦਿਨ ਵਿੱਚ ਇੱਕ ਸਾਲ ਜਿੰਨੀ ਬਾਰਿਸ਼ ਹੋ ਸਕਦੀ ਹੈ।

ਨਿਊਯਾਰਕ ਟਾਈਮਜ਼ ਮੁਤਾਬਕ ਮੈਕਸੀਕੋ ਦੇ ਬਾਜਾ ਕੈਲੀਫੋਰਨੀਆ ‘ਚ ਅਗਲੇ 2 ਦਿਨਾਂ ‘ਚ 10 ਇੰਚ ਮੀਂਹ ਦੀ ਚਿਤਾਵਨੀ ਦਿੱਤੀ ਗਈ ਹੈ। ਇਸ ਕਾਰਨ ਮੈਕਸੀਕੋ ਅਤੇ ਕੈਲੀਫੋਰਨੀਆ ਵਿਚ ਵੀ ਹੜ੍ਹ ਆਉਣ ਦੀ ਸੰਭਾਵਨਾ ਬਣ ਗਈ ਹੈ। ਅਮਰੀਕਾ ਦੇ ਰਾਸ਼ਟਰੀ ਸਮੁੰਦਰੀ ਅਤੇ ਵਾਯੂਮੰਡਲ ਪ੍ਰਸ਼ਾਸਨ ਦੇ ਅਨੁਸਾਰ, ਇਹ ਤੂਫਾਨ ਪਹਿਲਾਂ ਮੈਕਸੀਕੋ ਨਾਲ ਟਕਰਾਏਗਾ ਅਤੇ ਫਿਰ ਕੈਲੀਫੋਰਨੀਆ ਵੱਲ ਵਧੇਗਾ।

ਹਾਲਾਂਕਿ ਇਹ ਤੂਫਾਨ ਲਗਾਤਾਰ ਉੱਤਰ ਵੱਲ ਵਧ ਰਿਹਾ ਹੈ। ਅਜਿਹੇ ‘ਚ ਜੇਕਰ ਇਹ ਸਭ ਤੋਂ ਪਹਿਲਾਂ ਕੈਲੀਫੋਰਨੀਆ ਨਾਲ ਟਕਰਾਉਂਦਾ ਹੈ ਤਾਂ ਇਹ ਪਿਛਲੇ 84 ਸਾਲਾਂ ‘ਚ ਸਭ ਤੋਂ ਵੱਡਾ ਉੱਤਰੀ ਤੂਫਾਨ ਹੋਵੇਗਾ। ਪਹਿਲੀ ਵਾਰ, ਦੱਖਣੀ ਕੈਲੀਫੋਰਨੀਆ ਲਈ ਸ਼੍ਰੇਣੀ 4 ਤੂਫਾਨ ਦੀ ਚੇਤਾਵਨੀ ਜਾਰੀ ਕੀਤੀ ਗਈ ਹੈ।