ਕਾਂਸੀ ਤਮਗੇ ਤੋਂ ਖੁੰਝੀ ਭਾਰਤੀ ਮਹਿਲਾ ਹਾਕੀ ਟੀਮ, PM ਮੋਦੀ ਨੇ ਟਵੀਟ ਕਰ ਕਹੀ ਇਹ ਵੱਡੀ ਗੱਲ

ਨਵੀਂ ਦਿੱਲੀ : ਭਾਰਤ ਦੀ ਮਹਿਲਾ ਹਾਕੀ ਟੀਮ ਦਾ ਓਲੰਪਿਕ ਵਿੱਚ ਪਹਿਲੀ ਵਾਰ ਤਮਗਾ ਜਿੱਤਣ ਦਾ ਸੁਪਨਾ ਚਕਨਾਚੂਰ ਹੋ ਗਿਆ ਹੈ। ਭਾਰਤ ਨੂੰ ਸ਼ੁੱਕਰਵਾਰ ਨੂੰ ਖੇਡੇ ਗਏ ਕਾਂਸੀ ਤਮਗੇ ਦੇ ਮੁਕਾਬਲੇ ਵਿੱਚ ਰੀਓ ਓਲੰਪਿਕ ਦੀ ਸੋਨ ਤਮਗਾ ਜੇਤੂ ਗ੍ਰੇਟ ਬ੍ਰਿਟੇਨ ਨੇ 4-3 ਨਾਲ ਹਰਾਇਆ। ਭਾਰਤ ਲਈ ਗੁਰਜੀਤ ਕੌਰ (Gurjeet Kaur) ਨੇ ਸਭ ਤੋਂ ਵੱਧ ਦੋ ਗੋਲ ਕੀਤੇ। ਗੁਰਜੀਤ (25 ਵੇਂ ਅਤੇ 26 ਵੇਂ ਮਿੰਟ) ਤੋਂ ਇਲਾਵਾ ਵੰਦਨਾ ਕਟਾਰੀਆ ਨੇ 29 ਵੇਂ ਮਿੰਟ ਵਿੱਚ ਗੋਲ ਕੀਤਾ। ਗ੍ਰੇਟ ਬ੍ਰਿਟੇਨ ਲਈ ਐਲੇਨਾ ਰਾਇਰ (16 ਵੇਂ), ਸਾਰਾਹ ਰੌਬਰਟਸਨ (24 ਵੇਂ), ਹੋਲੀ ਪੀਅਰਨੇ ਵੈਬ (35 ਵੇਂ) ਅਤੇ ਗ੍ਰੇਸ ਬਾਲਸਡਨ ਨੇ 48 ਵੇਂ ਮਿੰਟ ਵਿੱਚ ਗੋਲ ਕੀਤੇ।

ਹਮੇਸ਼ਾ ਯਾਦ ਰਹੇਗਾ ਮਹਿਲਾ ਹਾਕੀ ਟੀਮ ਦਾ ਸ਼ਾਨਦਾਰ ਪ੍ਰਦਰਸ਼ਨ

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਟਵੀਟ ਕਰਕੇ ਕਿਹਾ, ‘ਅਸੀਂ ਟੋਕੀਓ ਓਲੰਪਿਕਸ ਵਿੱਚ ਆਪਣੀ ਮਹਿਲਾ ਹਾਕੀ ਟੀਮ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨੂੰ ਹਮੇਸ਼ਾ ਯਾਦ ਰੱਖਾਂਗੇ। ਉਨ੍ਹਾਂ ਨੇ ਆਪਣਾ ਸਰਬੋਤਮ ਦਿੱਤਾ । ਟੀਮ ਦੇ ਹਰ ਮੈਂਬਰ ਨੇ ਦਲੇਰੀ, ਹੁਨਰ ਅਤੇ ਲਚਕੀਲੇਪਣ ਦਾ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ । ਭਾਰਤ ਨੂੰ ਇਸ ਸ਼ਾਨਦਾਰ ਟੀਮ ‘ਤੇ ਮਾਣ ਹੈ ।

ਨਵੇਂ ਭਾਰਤ ਦੀ ਭਾਵਨਾ ਨੂੰ ਦਰਸਾਉਂਦੀ ਹੈ ਟੀਮ : ਪ੍ਰਧਾਨ ਮੰਤਰੀ
ਇਕ ਹੋਰ ਟਵੀਟ ‘ਚ ਪੀਐਮ ਮੋਦੀ ਨੇ ਕਿਹਾ,’ ਅਸੀਂ ਮਹਿਲਾ ਹਾਕੀ ‘ਚ ਤਮਗੇ ਤੋਂ ਖੁੰਝ ਗਏ, ਪਰ ਇਹ ਟੀਮ ਨਿਊ ਇੰਡੀਆ ਦੀ ਭਾਵਨਾ ਨੂੰ ਦਰਸਾਉਂਦੀ ਹੈ, ਜਿੱਥੇ ਅਸੀਂ ਆਪਣਾ ਸਰਬੋਤਮ ਪ੍ਰਦਰਸ਼ਨ ਕਰਦੇ ਹਾਂ ਅਤੇ ਨਵੇਂ ਮੋਰਚੇ ਬਣਾਉਂਦੇ ਹਾਂ। ਇਸ ਤੋਂ ਵੀ ਮਹੱਤਵਪੂਰਨ ਗੱਲ ਇਹ ਹੈ ਕਿ ਓਲੰਪਿਕ ਵਿੱਚ ਟੀਮ ਦੀ ਸਫਲਤਾ ਭਾਰਤ ਦੀਆਂ ਜਵਾਨ ਧੀਆਂ ਨੂੰ ਹਾਕੀ ਖੇਡਣ ਅਤੇ ਇਸ ਵਿੱਚ ਉੱਤਮ ਹੋਣ ਲਈ ਪ੍ਰੇਰਿਤ ਕਰੇਗੀ। ਇਸ ਟੀਮ ‘ਤੇ ਮਾਣ ਹੈ।