PGI ‘ਚ ਸੁਰੱਖਿਆ ਗਾਰਡ ਨੇ ਮਹਿਲਾ ਨੂੰ ਮਾਰਿਆ ਥੱਪੜ

ਚੰਡੀਗੜ੍ਹ 16 ਨਵੰਬਰ 2023 : ਪੀ.ਜੀ.ਆਈ. ਗਾਇਨੀਕੋਲਾਜੀ ਵਾਰਡ ‘ਚ ਦਾਖਲ ਔਰਤ ਨੂੰ ਮਿਲਣ ਲਈ ਆਏ ਮਾਂ-ਪੁੱਤ ਦੀ ਸੁਰੱਖਿਆ ਗਾਰਡ ਨਾਲ ਉਸ ਨੂੰ ਅੰਦਰ ਜਾਣ ਨੂੰ ਲੈ ਕੇ ਬਹਿਸ ਹੋ ਗਈ। ਮਾਮਲਾ ਵਧ ਗਿਆ ਅਤੇ ਸੁਰੱਖਿਆ ਗਾਰਡ ਨੇ ਮਹਿਲਾ ਨੂੰ ਥੱਪੜ ਮਾਰ ਦਿੱਤਾ। ਸੂਚਨਾ ਮਿਲਦਿਆਂ ਹੀ ਪੀ.ਜੀ.ਆਈ. ਡਾਕਟਰ ਅਤੇ ਪੁਲਿਸ ਪਹੁੰਚ ਗਈ।

ਸੁਰੱਖਿਆ ਗਾਰਡ ਨੂੰ ਮਹਿਲਾ ਤੋਂ ਮੁਆਫੀ ਮੰਗਣੀ ਪਈ। ਇਸ ਤੋਂ ਬਾਅਦ ਸੀਨੀਅਰ ਡਾਕਟਰਾਂ ਅਤੇ ਪੁਲਸ ਨੇ ਮਿਲ ਕੇ ਦੋਵਾਂ ਵਿਚਾਲੇ ਸਮਝੌਤਾ ਕਰਵਾਇਆ। ਇਸ ਦੌਰਾਨ ਇਹ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਗਿਆ। ਪੀ.ਜੀ.ਆਈ ਚੌਕੀ ਇੰਚਾਰਜ ਸਬ-ਇੰਸਪੈਕਟਰ ਬਬੀਤਾ ਨੇ ਦੱਸਿਆ ਕਿ ਮਰੀਜ਼ ਨੂੰ ਮੰਗਲਵਾਰ ਨੂੰ ਗਾਇਨੀਕੋਲਾਜੀ ਵਾਰਡ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਦੋ-ਤਿੰਨ ਰਿਸ਼ਤੇਦਾਰ ਉਸ ਨੂੰ ਮਿਲਣ ਆਏ।

ਸੁਰੱਖਿਆ ਗਾਰਡ ਨੇ ਇਕ ਰਿਸ਼ਤੇਦਾਰ ਨੂੰ ਮਿਲਣ ਲਈ ਭੇਜਿਆ ਜਦੋਂ ਕਿ ਔਰਤ ਨੂੰ ਰੋਕਿਆ ਗਿਆ। ਬੇਟਾ ਕਾਰ ਪਾਰਕ ਕਰ ਰਿਹਾ ਸੀ। ਔਰਤ ਨੇ ਸੁਰੱਖਿਆ ਗਾਰਡ ਨਾਲ ਬਹਿਸ ਕਰਨੀ ਸ਼ੁਰੂ ਕਰ ਦਿੱਤੀ, ਪਰ ਉਸ ਨੇ ਇਹ ਕਹਿ ਕੇ ਇਨਕਾਰ ਕਰ ਦਿੱਤਾ ਕਿ ਸਿਰਫ਼ ਇੱਕ ਹੀ ਮਿਲ ਸਕਦਾ ਹੈ। ਔਰਤ ਨਹੀਂ ਮੰਨੀ ਅਤੇ ਗਾਰਡ ਨਾਲ ਬਹਿਸ ਤੋਂ ਬਾਅਦ ਹੱਥੋਪਾਈ ਹੋ ਗਈ। ਗਾਇਨੀਕੋਲਾਜੀ ਵਾਰਡ ਦੇ ਬਾਹਰ ਤਾਇਨਾਤ ਸੁਰੱਖਿਆ ਗਾਰਡ ਨੇ ਮਹਿਲਾ ਨੂੰ ਥੱਪੜ ਮਾਰ ਦਿੱਤਾ। ਉਸੇ ਸਮੇਂ ਬੇਟਾ ਵੀ ਆ ਗਿਆ ਅਤੇ ਸੁਰੱਖਿਆ ਗਾਰਡ ਨਾਲ ਹੱਥੋਪਾਈ ਹੋ ਗਈ, ਸੁਰੱਖਿਆ ਗਾਰਡ ਨੇ ਔਰਤ ਤੋਂ ਮਾਫੀ ਮੰਗੀ। ਇਸ ਤੋਂ ਬਾਅਦ ਦੋਵਾਂ ਧਿਰਾਂ ਵਿਚਾਲੇ ਸਮਝੌਤਾ ਹੋ ਗਿਆ।