ਕਸ਼ਮੀਰ ਘਾਟੀ ‘ਚ ਅੱਜ ਤੋਂ ਚੱਲੇਗੀ ਵਿਸਟਾਡੋਮ ਕੋਚ ਟਰੇਨ

19 ਅਕਤੂਬਰ 2023: ਯਾਤਰੀਆਂ ਦੀ ਮੰਗ ਨੂੰ ਪੂਰਾ ਕਰਨ ਅਤੇ ਸੈਲਾਨੀਆਂ ਨੂੰ ਆਕਰਸ਼ਿਤ ਕਰਨ ਲਈ, ਰੇਲਵੇ ਵਿਸਟਾਡੋਮ ਕੋਚਾਂ ਵਾਲੀਆਂ ਟਰੇਨਾਂ ਦੀ ਗਿਣਤੀ ਵਧਾ ਰਿਹਾ ਹੈ। ਰੇਲਵੇ ਡਵੀਜ਼ਨ ਫ਼ਿਰੋਜ਼ਪੁਰ ਵੱਲੋਂ 19 ਅਕਤੂਬਰ ਤੋਂ ਕਸ਼ਮੀਰ ਵਾਦੀ ਵਿੱਚ ਵਿਸਟਾਡੋਮ ਕੋਚ ਰੇਲਗੱਡੀ ਚਲਾਉਣ ਜਾ ਰਹੀ ਹੈ। ਸੈਲਾਨੀ ਕੋਚ ‘ਚ ਬੈਠ ਕੇ ਹੀ ਘਾਟੀ ਦੀ ਖੂਬਸੂਰਤੀ ਦਾ ਆਨੰਦ ਲੈ ਸਕਣਗੇ।

ਟਰੇਨ ‘ਚ ਬੈਠ ਕੇ ਸੈਲਾਨੀ ਘਾਟੀ ਦੇ ਖੂਬਸੂਰਤ ਨਜ਼ਾਰਿਆਂ ਨੂੰ ਦੇਖ ਸਕਦੇ ਹਨ ਅਤੇ ਇਸ ਯਾਤਰਾ ਨੂੰ ਯਾਦਗਾਰ ਬਣਾ ਸਕਦੇ ਹਨ… ਇਸ ਮਕਸਦ ਲਈ ਰੇਲਵੇ ਨੇ ਵਿਸਟਾਡੋਮ ਕੋਚ ਚਲਾਉਣ ਦਾ ਫੈਸਲਾ ਕੀਤਾ ਹੈ। ਟਰੇਨ ਦੀ ਛੱਤ ਪਾਰਦਰਸ਼ੀ ਹੈ। ਇਸ ਨਾਲ ਯਾਤਰੀ ਬਾਹਰ ਦਾ ਨਜ਼ਾਰਾ ਆਸਾਨੀ ਨਾਲ ਦੇਖ ਸਕਣਗੇ। ਕਾਲਕਾ-ਸ਼ਿਮਲਾ ਰੇਲਵੇ ਟ੍ਰੈਕ ‘ਤੇ ਵੀ ਇਸੇ ਤਰ੍ਹਾਂ ਦੀ ਟਰੇਨ ਚੱਲਦੀ ਹੈ।

ਕਸ਼ਮੀਰ ਘਾਟੀ ‘ਚ ਚੱਲਣ ਵਾਲੀ ਵਿਸਟਾਡੋਮ ਕੋਚ ਟਰੇਨ ਦਾ ਕਿਰਾਇਆ ਵੱਖ-ਵੱਖ ਸਟੇਸ਼ਨਾਂ ‘ਤੇ ਤੈਅ ਕੀਤਾ ਗਿਆ ਹੈ। ਰੇਲਵੇ ਸਟੇਸ਼ਨਾਂ ਬਡਗਾਮ ਅਤੇ ਅਵੰਤੀਪੁਰਾ ਵਿਚਕਾਰ ਘੱਟੋ ਘੱਟ ਕਿਰਾਇਆ 425 ਰੁਪਏ (ਜੀਐਸਟੀ ਅਤੇ ਹੋਰ ਖਰਚਿਆਂ ਨੂੰ ਛੱਡ ਕੇ) ਨਿਰਧਾਰਤ ਕੀਤਾ ਗਿਆ ਹੈ, ਜਦੋਂ ਕਿ ਬਡਗਾਮ ਅਤੇ ਬਨਿਹਾਲ ਵਿਚਕਾਰ ਯਾਤਰਾ ਲਈ ਵੱਧ ਤੋਂ ਵੱਧ ਕਿਰਾਇਆ 535 ਰੁਪਏ ਹੋਵੇਗਾ। ਵਿਸਟਾਡੋਮ ਕੋਚ ਵਿੱਚ 40 ਆਰਾਮਦਾਇਕ ਸੀਟਾਂ ਹਨ।

ਇਹ ਟਰੇਨ ਸਵੇਰੇ ਬਡਗਾਮ ਤੋਂ ਬਨਿਹਾਲ ਤੱਕ ਚੱਲੇਗੀ। ਸਵੇਰੇ 09:10 ਵਜੇ ਬਡਗਾਮ ਤੋਂ ਰਵਾਨਾ ਹੋਵੇਗੀ। ਰਸਤੇ ਵਿੱਚ ਇਹ ਸ਼੍ਰੀਨਗਰ, ਅਵੰਤੀਪੁਰਾ, ਅਨੰਤਨਾਗ ਅਤੇ ਕਾਜੀਗੁੰਡ ਵਿੱਚ ਰੁਕੇਗੀ। ਸਵੇਰੇ 11:05 ਵਜੇ ਬਨਿਹਾਲ ਰੇਲਵੇ ਸਟੇਸ਼ਨ ਪਹੁੰਚੇਗਾ। ਇਹ ਬਨਿਹਾਲ ਤੋਂ ਸ਼ਾਮ ਨੂੰ 04:50 ‘ਤੇ ਵਾਪਸ ਆਵੇਗੀ ਅਤੇ ਉਸੇ ਸਟੇਸ਼ਨਾਂ ਤੋਂ ਹੁੰਦੀ ਹੋਈ ਸ਼ਾਮ 06:35 ‘ਤੇ ਬਡਗਾਮ ਰੇਲਵੇ ਸਟੇਸ਼ਨ ਪਹੁੰਚੇਗੀ। ਖਾਸ ਗੱਲ ਇਹ ਹੈ ਕਿ ਸਰਦੀਆਂ ‘ਚ ਵੀ ਸੈਲਾਨੀ ਟਰੇਨ ‘ਚ ਬੈਠ ਕੇ ਬਰਫ ਨਾਲ ਢੱਕੇ ਪਹਾੜਾਂ ਨੂੰ ਦੇਖ ਸਕਣਗੇ।
ਘਾਟੀ ‘ਚ ਟਰੇਨ ਬਿਜਲੀ ‘ਤੇ ਚੱਲੇਗੀ
ਰੇਲਵੇ ਅਧਿਕਾਰੀਆਂ ਮੁਤਾਬਕ ਕਸ਼ਮੀਰ ਘਾਟੀ ਵਿੱਚ ਬਿਜਲੀਕਰਨ ਦਾ ਕੰਮ ਪੂਰਾ ਹੋ ਗਿਆ ਹੈ। 19 ਅਕਤੂਬਰ ਨੂੰ ਪਹਿਲੀ ਟਰੇਨ ਇਲੈਕਟ੍ਰਿਕ ਇੰਜਣ ‘ਤੇ ਚੱਲੇਗੀ। ਹੁਣ ਇੱਥੇ ਡੀਜ਼ਲ ਦੀਆਂ ਗੱਡੀਆਂ ਨਹੀਂ ਚੱਲਣਗੀਆਂ। ਬਿਜਲੀ ‘ਤੇ ਚੱਲਣ ਵਾਲੀਆਂ ਟਰੇਨਾਂ ਦੀ ਰਫਤਾਰ ਵਧੇਗੀ ਅਤੇ ਸਮੇਂ ਦੀ ਬਚਤ ਹੋਵੇਗੀ।