ਪਿੰਡਾਂ ’ਚ ਵੀ ਹੁਣ 25 ਦਿਨਾਂ ’ਚ ਬੁੱਕ ਹੋਵੇਗਾ LPG ਸਿਲੰਡਰ

ਪਿੰਡਾਂ ’ਚ LPG ਸਿਲੰਡਰ ਬੁਕਿੰਗ ਨੂੰ ਲੈ ਕੇ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਹੁਣ ਪਿੰਡਾਂ ਦੇ ਖਪਤਕਾਰ ਵੀ 25 ਦਿਨਾਂ ਬਾਅਦ LPG ਸਿਲੰਡਰ ਦੀ ਰਿਫ਼ਿਲ ਬੁਕ ਕਰਵਾ ਸਕਣਗੇ।

ਕੇਂਦਰ ਸਰਕਾਰ ਨੇ ਪਿੰਡਾਂ ਲਈ ਲਾਗੂ 45 ਦਿਨਾਂ ਵਾਲੇ ਨਿਯਮ ਨੂੰ ਖ਼ਤਮ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਹੁਣ ਸ਼ਹਿਰਾਂ ਅਤੇ ਪਿੰਡਾਂ ਵਿੱਚ LPG ਰਿਫ਼ਿਲ ਬੁਕਿੰਗ ਲਈ ਇੱਕੋ ਜਿਹੇ ਨਿਯਮ ਲਾਗੂ ਹੋਣਗੇ।

ਦੱਸਿਆ ਜਾ ਰਿਹਾ ਹੈ ਕਿ ਪਹਿਲਾਂ ਪਿੰਡਾਂ ਵਿੱਚ ਰਹਿਣ ਵਾਲੇ ਖਪਤਕਾਰਾਂ ਨੂੰ ਇੱਕ ਰਿਫ਼ਿਲ ਬੁਕ ਕਰਨ ਤੋਂ ਬਾਅਦ ਅਗਲੀ ਬੁਕਿੰਗ ਲਈ 45 ਦਿਨਾਂ ਦੀ ਉਡੀਕ ਕਰਨੀ ਪੈਂਦੀ ਸੀ। ਹੁਣ ਇਹ ਪਾਬੰਦੀ ਹਟਾ ਦਿੱਤੀ ਗਈ ਹੈ ਅਤੇ 25 ਦਿਨਾਂ ਬਾਅਦ ਮੁੜ ਸਿਲੰਡਰ ਬੁਕ ਕੀਤਾ ਜਾ ਸਕੇਗਾ।

ਕੇਂਦਰ ਸਰਕਾਰ ਵੱਲੋਂ ਨਵਾਂ ਨਿਯਮ ਤੁਰੰਤ ਪ੍ਰਭਾਵ ਨਾਲ ਲਾਗੂ ਕਰਨ ਦੇ ਹੁਕਮ ਦਿੱਤੇ ਗਏ ਹਨ। ਸਰਕਾਰ ਮੁਤਾਬਕ LPG ਦੀ ਸਪਲਾਈ ਵਿੱਚ ਸੁਧਾਰ ਅਤੇ ਪੈਂਡਿੰਗ ਬੁਕਿੰਗ ਘਟਣ ਤੋਂ ਬਾਅਦ ਇਹ ਫ਼ੈਸਲਾ ਲਿਆ ਗਿਆ ਹੈ।

ਗੌਰਤਲਬ ਹੈ ਕਿ ਮਾਰਚ 2026 ਵਿੱਚ LPG ਸਪਲਾਈ ’ਤੇ ਪਏ ਦਬਾਅ ਕਾਰਨ ਰਿਫ਼ਿਲ ਬੁਕਿੰਗ ਨੂੰ ਲੈ ਕੇ ਕੁਝ ਪਾਬੰਦੀਆਂ ਲਗਾਈਆਂ ਗਈਆਂ ਸਨ। ਹੁਣ ਸਪਲਾਈ ਦੀ ਸਥਿਤੀ ਸੁਧਰਨ ਤੋਂ ਬਾਅਦ ਇਨ੍ਹਾਂ ਪਾਬੰਦੀਆਂ ਵਿੱਚ ਢਿੱਲ ਦਿੱਤੀ ਗਈ ਹੈ।

ਇਸ ਦੇ ਨਾਲ ਹੀ ਕਮਰਸ਼ੀਅਲ LPG ਸਿਲੰਡਰ ਦੀ ਕੀਮਤ ਵਿੱਚ ਵੀ 11 ਰੁਪਏ 50 ਪੈਸੇ ਦਾ ਵਾਧਾ ਹੋਇਆ ਹੈ।

ਉੱਥੇ ਹੀ 5 ਕਿਲੋ ਵਾਲਾ ਛੋਟਾ LPG ਸਿਲੰਡਰ ਵੀ 2 ਰੁਪਏ ਮਹਿੰਗਾ ਹੋ ਗਿਆ ਹੈ ਅਤੇ ਇਸ ਦੀ ਕੀਮਤ ਹੁਣ 764 ਰੁਪਏ ਹੋ ਗਈ ਹੈ।

ਯਾਨੀ ਇੱਕ ਪਾਸੇ ਘਰੇਲੂ LPG ਬੁਕਿੰਗ ਨੂੰ ਲੈ ਕੇ ਪਿੰਡਾਂ ਦੇ ਖਪਤਕਾਰਾਂ ਨੂੰ ਰਾਹਤ ਮਿਲੀ ਹੈ, ਉੱਥੇ ਦੂਜੇ ਪਾਸੇ ਕਮਰਸ਼ੀਅਲ ਅਤੇ ਛੋਟੇ ਸਿਲੰਡਰ ਦੀਆਂ ਕੀਮਤਾਂ ਵਿੱਚ ਵਾਧਾ ਕੀਤਾ ਗਿਆ ਹੈ।