Ludhiana
ਸਕੂਲੀ ਵਿਦਿਆਰਥੀ ਘਰੋਂ ਹੀ ਆਨਲਾਈਨ ਕਰ ਰਹੇ ਨੇ ਪੜ੍ਹਾਈ, ਆਨਲਾਈਨ ਹੀ ਸਵਾਲ, ਜਵਾਬ ਟੈਸਟ ਵੀ ਆਨਲਾਈਨ
ਲੁਧਿਆਣਾ, 11 ਅਪਰੈਲ (ਸੰਜੀਵ ਸੂਦ): ਦੇਸ਼ ਭਰ ਦੇ ਵਿੱਚ ਕੋਰੋਨਾ ਵਾਇਰਸ ਕਰਕੇ ਜਿੱਥੇ ਸਕੂਲ ਕਾਲਜ ਯੂਨੀਵਰਸਿਟੀਆਂ ਆਦਿ ਬੰਦ ਨੇ ਉੱਥੇ ਹੀ ਲਾਕਡਾਊਨ ਕਰਕੇ ਹੁਣ ਬੱਚੇ ਵੀ ਘਰਾਂ ਚ ਰਹਿਣ ਲਈ ਮਜਬੂਰ ਹੋ ਰਹੇ ਹਨ। ਜਿਸ ਕਰਕੇ ਉਨ੍ਹਾਂ ਦੀ ਸਿੱਖਿਆ ਵੀ ਖਰਾਬ ਹੋ ਰਹੀ ਹੈ। ਜਿਸ ਕਰਕੇ ਪੰਜਾਬ ਸਕੂਲ ਸਿੱਖਿਆ ਬੋਰਡ ਅਤੇ ਹੋਰਨਾਂ ਸਿੱਖਿਆ ਸੰਸਥਾਵਾਂ ਵੱਲੋਂ ਵਿਦਿਆਰਥੀਆਂ ਦੀਆਂ ਆਨਲਾਈਨ ਕਲਾਸਾਂ ਸ਼ੁਰੂ ਕੀਤੀਆਂ ਗਈਆਂ ਹਨ। ਇਥੋਂ ਤੱਕ ਕਿ ਐਡਮਿਸ਼ਨਾਂ ਵੀ ਆਨਲਾਈਨ ਹੋ ਰਹੀਆਂ ਨੇ ਅਤੇ ਵਿਦਿਆਰਥੀਆਂ ਨੂੰ ਘਰੇ ਬੈਠੇ ਹੀ ਸਿੱਖਿਆ ਦਿੱਤੀ ਜਾ ਰਹੀ ਹੈ ਤਾਂ ਜੋ ਉਹ ਆਪਣਾ ਸਿਲੇਬਸ ਪੂਰਾ ਕਰ ਸਕੇ। ਸਕੂਲਾਂ ਵੱਲੋਂ ਆਨਲਾਈਨ ਕਲਾਸਾਂ ਲੈਣ ਦੀ ਸਮਾਂ ਸੀਮਾ ਵੀ ਤੈਅ ਕੀਤੀ ਗਈ ਹੈ। ਸਕੂਲਾਂ ਦੀ ਘੰਟੀ ਤਾਂ ਹੁਣ ਨਹੀਂ ਵਜਦੀ ਪਰ ਆਨਲਾਈਨ ਮੋਬਾਈਲ ਤੇ ਕਲਾਸਾ ਜ਼ਰੂਰ ਸ਼ੁਰੂ ਹੋ ਜਾਂਦੀਆਂ ਹਨ। ਜੋ ਵਿਦਿਆਰਥੀਆਂ ਦੀ ਜਮਾਤ ਮੁਤਾਬਕ ਚੱਲਦੀਆਂ ਹਨ।ਇੱਥੋਂ ਤੱਕ ਕਿ ਵਿਦਿਆਰਥੀ ਆਨਲਾਈਨ ਹੀ ਆਪਣੇ ਅਧਿਆਪਕਾਂ ਤੋਂ ਸਵਾਲ ਪੁੱਛ ਸਕਦੇ ਨੇ ਟੈਸਟ ਵੀ ਆਨਲਾਈਨ ਕਰਵਾਏ ਜਾ ਰਹੇ ਹਨ।
ਇਸ ਸਬੰਧੀ ਵਿਦਿਆਰਥੀਆਂ ਨੇ ਕਿਹਾ ਹੈ ਕਿ ਆਨਲਾਈਨ ਸਿੱਖਿਆ ਹਾਸਲ ਕਰਕੇ ਉਹ ਘਰਾਂ ਵਿੱਚ ਬੈਠੇ ਹੀ ਆਪਣਾ ਸਿਲੇਬਸ ਕਵਰ ਕਰ ਰਹੇ ਹਨ ਅਤੇ ਨਾਲ ਹੀ ਉਨ੍ਹਾਂ ਨੂੰ ਕੁਝ ਨਵਾਂ ਸਿੱਖਣ ਦਾ ਵੀ ਤਜਰਬਾ ਹੋ ਰਿਹਾ ਹੈ। ਵੱਖ ਵੱਖ ਜਮਾਤਾਂ ਵਿਚ ਪੜਨ ਵਾਲੇ ਵਿਦਿਆਰਥੀਆਂ ਨੇ ਦੱਸਿਆ ਕਿ ਵੱਖ ਵੱਖ ਵਿਸ਼ੇ ਦੇ ਅਧਿਆਪਕਾਂ ਵੱਲੋਂ ਉਨ੍ਹਾਂ ਦੇ ਵਟਸਐਪ ਗਰੁੱਪ ਬਣਾਏ ਗਏ ਨੇ ਅਤੇ ਇਨ੍ਹਾਂ ਗਰੁੱਪਾਂ ਦੇ ਵਿੱਚ ਫਿਰ ਆਨਲਾਈਨ ਪੜ੍ਹਾਈ ਕਰਵਾਈ ਜਾਂਦੀ ਹੈ। ਹਾਲਾਂਕਿ ਵਿਦਿਆਰਥੀਆਂ ਨੇ ਵੀ ਕਿਹਾ ਕਿ ਸਕੂਲ ਜਾ ਕੇ ਪੜ੍ਹਨ ਵਿੱਚ ਅਤੇ ਘਰ ਰਹਿ ਕੇ ਪੜ੍ਹਨ ਵਿੱਚ ਕਾਫ਼ੀ ਫਰਕ ਹੈ ਪਰ ਅਜਿਹੇ ਹਾਲਾਤਾਂ ਵਿੱਚ ਉਹ ਸਕੂਲ ਤਾਂ ਨਹੀਂ ਜਾ ਸਕਦੇ ਪਰ ਘਰ ਬੈਠੇ ਆਪਣਾ ਸਲੇਬਸ ਜ਼ਰੂਰ ਪੂਰਾ ਕਰ ਸਕਦੇ ਹਨ।
ਉਧਰ ਅਧਿਆਪਕਾਂ ਨੇ ਕਿਹਾ ਕਿ ਜਿੱਥੇ ਅਸੀਂ ਸਾਰੀਆਂ ਨਜ ਕਰੋਨਾ ਨਾਲ ਲੜਨਾ ਹੈ ਉੱਥੇ ਹੀ ਆਪਣੀ ਸਿੱਖਿਆ ਵੀ ਪੂਰੀ ਕਰਨੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਸਕੂਲਾਂ ਦੇ ਅਧਿਆਪਕਾਂ ਵੱਲੋਂ ਜੋ ਵੀ ਤਕਨੀਕ ਹੈ ਉਸ ਰਾਹੀਂ ਬੱਚਿਆਂ ਨੂੰ ਸਿੱਖਿਆ ਦਿੱਤੀ ਜਾ ਰਹੀ ਹੈ।
ਇਕ ਪਾਸੇ ਜਿੱਥੇ ਦੇਸ਼ ਨੂੰ ਬਚਾਉਣ ਲਈ ਲਗਾਤਾਰ ਵੱਖ ਵੱਖ ਮਹਿਕਮਿਆਂ ਵੱਲੋਂ ਉਪਰਾਲੇ ਕੀਤੇ ਜਾ ਰਹੇ ਨੇ ਉੱਥੇ ਹੀ ਦੂਜੇ ਪਾਸੇ ਅਜਿਹੇ ਹਾਲਾਤਾਂ ਚ ਸਿੱਖਿਆ ਵਿਭਾਗ ਵੱਲੋਂ ਵੀ ਆਪਣੇ ਵੱਲੋਂ ਉਪਰਾਲੇ ਕੀਤੇ ਜਾ ਰਹੇ ਹਨ ਤਾਂ ਜੋ ਵਿਦਿਆਰਥੀਆਂ ਨੂੰ ਸਿੱਖਿਆ ਤੋਂ ਵਾਂਝੇ ਨਾ ਰੱਖਿਆ ਜਾ ਸਕੇ।
