ਸਕੂਲ ਦੀ ਡਿੱਗੀ ਕੰਧ, ਹੇਠਾਂ ਬੈਠੇ ਵਿਦਿਆਰਥੀ ਹੋਏ ਜਖ਼ਮੀ

ਗੁਜਰਾਤ ਦੇ ਵਡੋਦਰਾ ‘ਚ ਸਕੂਲ ਦੀ ਕੰਧ ਡਿੱਗਣ ਦੀ ਖ਼ਬਰ ਸਾਹਮਣੇ ਆਈ ਹੈ |ਗੁਜਰਾਤ ਦੇ ਵਡੋਦਰਾ ‘ਚ ਸ਼੍ਰੀ ਨਰਾਇਣ ਸਕੂਲ ‘ਚ ਦੂਜੀ ਮੰਜ਼ਿਲ ‘ਤੇ ਇਕ ਕਮਰੇ ਦੀ ਕੰਧ ਡਿੱਗਣ ਨਾਲ ਚਾਰ ਬੱਚੇ ਜ਼ਖਮੀ ਹੋ ਗਏ। ਇਹ ਘਟਨਾ ਸੀਸੀਟੀਵੀ ਫੁਟੇਜ ‘ਚ ਕੈਦ ਹੋ ਗਈ ਹੈ । ਇਸ ‘ਚ 4 ਬੱਚੇ ਬੈਂਚ ਦੇ ਨਾਲ 10 ਫੁੱਟ ਹੇਠਾਂ ਡਿੱਗਦੇ ਦੇਖੇ ਗਏ। ਇੱਕ ਵਿਦਿਆਰਥੀ ਦੇ ਸਿਰ ਵਿੱਚ ਸੱਟ ਲੱਗੀ ਹੈ। ਤਿੰਨਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ।

ਇਹ ਘਟਨਾ 20 ਮਈ ਦੁਪਹਿਰ ਕਰੀਬ 12:30 ਵਜੇ ਵਾਪਰੀ ਸੀ । ਇਸ ਤੋਂ ਬਾਅਦ ਫਾਇਰ ਬ੍ਰਿਗੇਡ ਦੀ ਟੀਮ ਅਤੇ ਪੁਲਸ ਨੂੰ ਬੁਲਾਇਆ ਗਿਆ। ਪੁਲਿਸ ਕੰਧ ਡਿੱਗਣ ਦੇ ਕਾਰਨਾਂ ਦੀ ਜਾਂਚ ਕਰ ਰਹੀ ਹੈ। ਦੂਜੇ ਪਾਸੇ ਵਡੋਦਰਾ ਪੇਰੈਂਟਸ ਐਸੋਸੀਏਸ਼ਨ ਨੇ ਸ਼ਨੀਵਾਰ ਨੂੰ ਸਕੂਲ ਸੰਚਾਲਕ ਦੇ ਖਿਲਾਫ ਪ੍ਰਦਰਸ਼ਨ ਕਰਨ ਦਾ ਫੈਸਲਾ ਕੀਤਾ ਹੈ। ਇਸ ਸਬੰਧੀ ਮਾਮਲਾ ਵੀ ਦਰਜ ਕੀਤਾ ਜਾ ਸਕਦਾ ਹੈ।

ਪੁਲਸ ਨੇ ਜ਼ਖਮੀ ਬੱਚਿਆਂ, ਉਨ੍ਹਾਂ ਦੇ ਪਰਿਵਾਰ ਵਾਲਿਆਂ ਅਤੇ ਸਕੂਲ ਪ੍ਰਬੰਧਕਾਂ ਦੇ ਬਿਆਨ ਦਰਜ ਕਰ ਲਏ ਹਨ। ਘਟਨਾ ਤੋਂ ਬਾਅਦ ਸਿੱਖਿਆ ਵਿਭਾਗ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਅਜੇ ਤੱਕ ਕੋਈ ਬਿਆਨ ਨਹੀਂ ਦਿੱਤਾ ਗਿਆ ਹੈ। ਸਥਾਨਕ ਲੋਕਾਂ ਦਾ ਕਹਿਣਾ ਸੀ ਕਿ ਇਹ ਹਾਦਸਾ ਇਸ ਲਈ ਵਾਪਰਿਆ ਕਿਉਂਕਿ ਇਹ ਪੁਰਾਣੀ ਇਮਾਰਤ ਸੀ। ਹਾਲਾਂਕਿ ਸਕੂਲ ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਉਨ੍ਹਾਂ ਕੋਲ ਸਾਰੇ ਜ਼ਰੂਰੀ ਦਸਤਾਵੇਜ਼ ਮੌਜੂਦ ਹਨ।

ਪ੍ਰਿੰਸੀਪਲ ਨੇ ਦਿੱਤੀ ਜਾਣਕਾਰੀ

ਸਕੂਲ ਦੀ ਪ੍ਰਿੰਸੀਪਲ ਰੂਪਲਬੇਨ ਸ਼ਾਹ ਨੇ ਦੱਸਿਆ ਕਿ ਸਾਨੂੰ ਅਚਾਨਕ ਬਹੁਤ ਤੇਜ਼ ਆਵਾਜ਼ ਸੁਣਾਈ ਦਿੱਤੀ। ਇਸ ਤੋਂ ਬਾਅਦ ਜਦੋਂ ਅਸੀਂ ਕੰਧ ਡਿੱਗਣ ਵਾਲੀ ਥਾਂ ‘ਤੇ ਪਹੁੰਚੇ ਤਾਂ ਪਤਾ ਲੱਗਾ ਕਿ 4 ਬੱਚੇ ਜ਼ਖਮੀ ਹੋਏ ਹਨ। ਇਕ ਬੱਚੇ ਦੇ ਸਿਰ ‘ਤੇ ਟਾਂਕੇ ਲੱਗੇ ਹਨ। ਬੱਚਿਆਂ ਦੇ ਸਾਈਕਲ ਮਲਬੇ ਹੇਠ ਦੱਬ ਗਏ। ਸਾਨੂੰ ਅੰਦਾਜ਼ਾ ਨਹੀਂ ਸੀ ਕਿ ਅਜਿਹੀ ਘਟਨਾ ਵਾਪਰੇਗੀ।

ਜਿਸ ਸਕੂਲ ਦੀ ਕੰਧ ਡਿੱਗੀ ਉਸ ਦੀ ਉਚਾਈ ਕਰੀਬ 20 ਫੁੱਟ ਸੀ। ਬੱਚੇ ਕਾਨਫਰੰਸ ਹਾਲ ਦੇ ਉੱਪਰ ਪਹਿਲੀ ਮੰਜ਼ਿਲ ‘ਤੇ ਬੈਠੇ ਸਨ ਅਤੇ ਕੰਧ ਦੇ ਬਿਲਕੁਲ ਪਿੱਛੇ ਇੱਕ ਸ਼ੈੱਡ ਸੀ। ਬੱਚੇ 10 ਫੁੱਟ ਦੀ ਉਚਾਈ ਤੋਂ ਡਿੱਗ ਪਏ ਪਰ ਇਸ ਸ਼ੈੱਡ ਕਾਰਨ ਗੰਭੀਰ ਸੱਟਾਂ ਲੱਗਣ ਤੋਂ ਬਚਾਅ ਹੋ ਗਿਆ। ਹਾਲਾਂਕਿ ਕੰਧ ਦਾ ਕੁਝ ਮਲਬਾ ਬੱਚੇ ਦੇ ਸਿਰ ‘ਤੇ ਡਿੱਗ ਗਿਆ, ਜਿਸ ਨਾਲ ਉਹ ਜ਼ਖਮੀ ਹੋ ਗਿਆ। ਬੱਚੇ ਦੇ ਸਿਰ ‘ਤੇ ਤਿੰਨ ਟਾਂਕੇ ਲੱਗੇ ਹਨ।