ਇਸਰੋ ਨੇ ਬ੍ਰਿਟੇਨ ਦੇ 36 ਸੈਟੇਲਾਈਟ ਕੀਤੇ ਲਾਂਚ,ਕੁੱਲ ਵਜ਼ਨ 5805 ਕਿਲੋਗ੍ਰਾਮ

ਇੰਡੀਅਨ ਸਪੇਸ ਰਿਸਰਚ ਆਰਗੇਨਾਈਜੇਸ਼ਨ (ਇਸਰੋ) ਨੇ ਐਤਵਾਰ ਯਾਨੀ 26 ਮਾਰਚ ਨੂੰ ਇੱਕੋ ਸਮੇਂ 36 ਯੂਕੇ ਸੈਟੇਲਾਈਟ ਲਾਂਚ ਕੀਤੇ। ਭੇਜੇ ਗਏ ਸਾਰੇ ਸੈਟੇਲਾਈਟਾਂ ਦਾ ਕੁੱਲ ਵਜ਼ਨ 5805 ਕਿਲੋਗ੍ਰਾਮ ਹੈ। ਇਸ ਮਿਸ਼ਨ ਦਾ ਨਾਂ LVM3-M3/OneWeb India-2 ਰੱਖਿਆ ਗਿਆ ਹੈ। ਇਨ੍ਹਾਂ ਨੂੰ ਸਵੇਰੇ 9.00 ਵਜੇ ਸਤੀਸ਼ ਧਵਨ ਪੁਲਾੜ ਕੇਂਦਰ ਸ਼੍ਰੀਹਰੀਕੋਟਾ ਦੇ ਪੁਲਾੜ ਅੱਡੇ ਤੋਂ ਲਾਂਚ ਕੀਤਾ ਗਿਆ।

ਇਸ ਵਿੱਚ ਇਸਰੋ ਦੇ 43.5 ਮੀਟਰ ਲੰਬੇ LVM3 ਰਾਕੇਟ (GSLV-MK III) ਦੀ ਵਰਤੋਂ ਕੀਤੀ ਗਈ। ਇਹ ਇਸਰੋ ਦਾ ਸਭ ਤੋਂ ਭਾਰੀ ਰਾਕੇਟ ਹੈ। ਇਸ ਨੇ ਇੱਕ ਹੋਰ ਲਾਂਚਪੈਡ ਤੋਂ ਉਡਾਣ ਭਰੀ। ਇਸ ਲਾਂਚ ਪੈਡ ਤੋਂ ਚੰਦਰਯਾਨ-2 ਮਿਸ਼ਨ ਸਮੇਤ ਪੰਜ ਸਫਲ ਲਾਂਚ ਕੀਤੇ ਜਾ ਚੁੱਕੇ ਹਨ। LVM3 ਤੋਂ ਚੰਦਰਯਾਨ-2 ਮਿਸ਼ਨ ਸਮੇਤ ਲਗਾਤਾਰ ਪੰਜ ਸਫਲ ਮਿਸ਼ਨ ਲਾਂਚ ਕੀਤੇ ਗਏ ਹਨ। ਇਹ ਇਸਦੀ ਛੇਵੀਂ ਸਫਲ ਉਡਾਣ ਹੈ।

ਅਮਰੀਕਾ, ਜਾਪਾਨ ਸਮੇਤ 6 ਕੰਪਨੀਆਂ ਦੀ ਹਿੱਸੇਦਾਰੀ ਹੈ
OneWeb ਲਈ ਇਸਰੋ ਦੀ ਵਪਾਰਕ ਇਕਾਈ ਨਿਊਸਪੇਸ ਇੰਡੀਆ ਲਿਮਟਿਡ (NSIL) ਦਾ ਇਹ ਦੂਜਾ ਮਿਸ਼ਨ ਸੀ। ਨੈੱਟਵਰਕ ਐਕਸਿਸ ਐਸੋਸੀਏਟਿਡ ਲਿਮਿਟੇਡ ਭਾਵ OneWeb ਇੱਕ ਯੂਕੇ ਅਧਾਰਤ ਸੰਚਾਰ ਕੰਪਨੀ ਹੈ। ਇਸ ਦੀ ਮਲਕੀਅਤ ਬ੍ਰਿਟਿਸ਼ ਸਰਕਾਰ, ਭਾਰਤ ਦੀ ਭਾਰਤੀ ਐਂਟਰਪ੍ਰਾਈਜ਼ਿਜ਼, ਫਰਾਂਸ ਦੀ ਯੂਟਲਸੈਟ, ਜਾਪਾਨ ਦੀ ਸਾਫਟਬੈਂਕ, ਅਮਰੀਕਾ ਦੀ ਹਿਊਜ਼ ਨੈੱਟਵਰਕਸ ਅਤੇ ਦੱਖਣੀ ਕੋਰੀਆ ਦੀ ਰੱਖਿਆ ਕੰਪਨੀ ਹੈਨਵਾ ਦੀ ਹੈ। ਇਹ ਸੈਟੇਲਾਈਟ ਅਧਾਰਤ ਸੇਵਾ ਪ੍ਰਦਾਨ ਕਰਨ ਵਾਲੀ ਇੱਕ ਸੰਚਾਰ ਕੰਪਨੀ ਹੈ। ਇਸ ਦਾ ਮੁੱਖ ਦਫਤਰ ਲੰਡਨ ਵਿੱਚ ਹੈ।