ਮਸ਼ਹੂਰ ਪੰਜਾਬੀ ਗਾਇਕ ਮਾਸਟਰ ਸਲੀਮ ਦਾ ਰਿਸ਼ਤੇਦਾਰ ਚੋਰੀ ਦੇ ਮਾਮਲੇ ‘ਚ ਗਿਰੋਹ ਸਣੇ ਗ੍ਰਿਫ਼ਤਾਰ

ਜਲੰਧਰ : ਥਾਣਾ ਡਵੀਜ਼ਨ ਨੰ. 3 ਦੀ ਪੁਲਸ ਨੇ ਸ਼ਹਿਰ ‘ਚ ਚੋਰੀ ਅਤੇ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇਣ ਵਾਲੇ ਗਿਰੋਹ ਦਾ ਪਰਦਾਫਾਸ਼ ਕਰਦੇ ਹੋਏ ਗਿਰੋਹ ਦੇ 3 ਮੈਂਬਰਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਪੁਲਿਸ ਨੇ ਚੋਰੀ ਦੇ 3 ਮੋਟਰਸਾਈਕਲ, 4 ਮਹਿੰਗੇ ਸਾਈਕਲ, ਚੱਪਲਾਂ ਦੇ 35 ਡੱਬੇ, 2 ਐਲ.ਈ.ਡੀ. ਟੀ.ਵੀ., ਸਾਈਕਲ ਹਾਕਰ, ਤਾਲੇ ਤੋੜਨ ਵਾਲੇ ਔਜ਼ਾਰ ਬਰਾਮਦ ਕੀਤੇ ਗਏ ਹਨ। ਫੜੇ ਗਏ ਚੋਰਾਂ ਦੀ ਪਛਾਣ ਜੌਨ ਕੁਮਾਰ ਉਰਫ ਜੌਨੀ ਪੁੱਤਰ ਕਾਲਾ ਸਾਈਂ ਮਾਡਲ ਹਾਊਸ, ਰਾਜੇਸ਼ ਕੁਮਾਰ ਉਰਫ ਦੇਸੀ ਪੁੱਤਰ ਗੋਬਿੰਦ ਰਾਏ ਵਾਸੀ ਮਾਤਾ ਰਾਣੀ ਚੌਕ ਨੇੜੇ ਕਿਰਾਏਦਾਰ, ਅਮਨਦੀਪ ਸਿੰਘ ਉਰਫ ਮੋਨੂੰ ਪੁੱਤਰ ਸੁਖਪਾਲ ਸਿੰਘ ਵਾਸੀ ਰਾਮੇਸ਼ਵਰ ਕਲੋਨੀ ਵਜੋਂ ਹੋਈ ਹੈ। ਉਸ ਦਾ ਭਗੌੜਾ ਸਾਥੀ ਅਰੁਣ ਕੁਮਾਰ ਪੁੱਤਰ ਕਾਲਾ ਸਾਈਂ ਜੋ ਕਿ ਭਗੌੜਾ ਹੈ, ਨੂੰ ਜਲਦੀ ਹੀ ਗ੍ਰਿਫਤਾਰ ਕਰ ਲਿਆ ਜਾਵੇਗਾ।

ਥਾਣਾ ਇੰਚਾਰਜ ਗਗਨਦੀਪ ਸਿੰਘ ਸੇਖੋਂ ਨੇ ਦੱਸਿਆ ਕਿ ਵਿਵੇਕ ਸਹਿਗਲ ਪੁੱਤਰ ਸੁਸ਼ੀਲ ਸਹਿਗਲ ਵਾਸੀ 66 ਫੁੱਟੀ ਰੋਡ ਨੇ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਉਸ ਦੀ ਰੇਲਵੇ ਰੋਡ ’ਤੇ ਕੁੰਦਨ ਲਾਲ ਚਮਨ ਲਾਲ ਐਂਡ ਸੰਨਜ਼ ਨਾਂ ਦੀ ਸਾਈਕਲ ਦੀ ਦੁਕਾਨ ਹੈ। 4-5 ਜੂਨ ਦੀ ਰਾਤ ਨੂੰ ਅਣਪਛਾਤੇ ਚੋਰਾਂ ਨੇ ਉਸ ਦੀ ਦੁਕਾਨ ‘ਚੋਂ ਕਾਫੀ ਸਾਮਾਨ ਚੋਰੀ ਕਰ ਲਿਆ ਹੈ, ਜਿਸ ਦੇ ਆਧਾਰ ‘ਤੇ ਪੁਲਸ ਨੇ ਅਣਪਛਾਤੇ ਚੋਰਾਂ ਖਿਲਾਫ ਮਾਮਲਾ ਦਰਜ ਕਰ ਲਿਆ ਸੀ। ਪੁਲਿਸ ਨੇ ਤਫ਼ਤੀਸ਼ ਦੌਰਾਨ ਜੌਨ, ਅਮਨਦੀਪ ਸਿੰਘ ਉਰਫ਼ ਸੋਨੂੰ ਜੋ ਕਿ ਮਸ਼ਹੂਰ ਗਾਇਕ ਮਾਸਟਰ ਸਲੀਮ ਅਤੇ ਰਾਜੇਸ਼ ਦਾ ਰਿਸ਼ਤੇਦਾਰ ਹੈ, ਨੂੰ ਗ੍ਰਿਫ਼ਤਾਰ ਕਰ ਲਿਆ।

ਥਾਣਾ ਇੰਚਾਰਜ ਨੇ ਦੱਸਿਆ ਕਿ ਫੜੇ ਗਏ ਚੋਰਾਂ ਨੂੰ ਅਦਾਲਤ ‘ਚ ਪੇਸ਼ ਕਰਕੇ 2 ਦਿਨ ਦਾ ਰਿਮਾਂਡ ਹਾਸਲ ਕੀਤਾ ਹੈ ਅਤੇ ਪੁੱਛਗਿੱਛ ਦੌਰਾਨ ਵੱਡੀ ਬਰਾਮਦਗੀ ਹੋਈ ਹੈ। ਕਾਬੂ ਕੀਤੇ ਚੋਰਾਂ ਵੱਲੋਂ ਪੁੱਛਗਿੱਛ ਦੌਰਾਨ ਕੀਤੇ ਖੁਲਾਸੇ ਅਨੁਸਾਰ ਮਾਮਲਾ ਨੰ. 17 ਮਿਤੀ 1 ਮਾਰਚ 2023 ਨੂੰ ਥਾਣਾ ਨੰ. 3 ਵਿੱਚ ਮੁਲਜ਼ਮ ਅਰੁਣ ਕੁਮਾਰ ਪੁੱਤਰ ਕਾਲਾ ਸਾਈਂ ਨੂੰ ਨਾਮਜ਼ਦ ਕੀਤਾ ਗਿਆ ਹੈ, ਜਿਸ ਨੇ ਅਟਾਰੀ ਬਾਜ਼ਾਰ, ਫਗਵਾੜਾ ਗੇਟ ਬਾਜ਼ਾਰ, ਪੁਰਾਣੀ ਰੇਲਵੇ ਰੋਡ ਆਦਿ ਦੇ ਘਰਾਂ ਵਿੱਚ ਚੋਰੀਆਂ ਅਤੇ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦਿੱਤਾ ਹੈ। ਉਨ੍ਹਾਂ ਦੱਸਿਆ ਕਿ ਫੜੇ ਗਏ ਚੋਰਾਂ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਹੋਰ ਰਿਮਾਂਡ ਹਾਸਲ ਕੀਤਾ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਕਾਬੂ ਕੀਤੇ ਜੌਨ ਕੁਮਾਰ ਉਰਫ ਜੋਨੀ ਖ਼ਿਲਾਫ਼ ਥਾਣਾ 2 ਅਤੇ 4 ਵਿੱਚ ਪਹਿਲਾਂ ਵੀ ਚੋਰੀ ਅਤੇ ਲੁੱਟ-ਖੋਹ ਦੇ ਤਿੰਨ ਕੇਸ ਦਰਜ ਹਨ। ਰਾਜੇਸ਼ ਕੁਮਾਰ ਉਰਫ ਦੇਸੀ ਜਿਸ ‘ਤੇ ਸ਼ਹਿਰ ਦੇ ਵੱਖ-ਵੱਖ ਥਾਣਿਆਂ ‘ਚ ਚਾਰ ਕੇਸ ਦਰਜ ਹਨ। ਅਮਨਦੀਪ ਸਿੰਘ ਉਰਫ਼ ਸੋਨੂੰ ਖ਼ਿਲਾਫ਼ ਲੁਧਿਆਣਾ ਅਤੇ ਜਲੰਧਰ ਵਿੱਚ ਦੋ ਕੇਸ ਦਰਜ ਹਨ।