ਭਾਰਤ ਆ ਰਹੇ ਜਹਾਜ਼ ‘ਤੇ ਈਰਾਨੀ ਡਰੋਨ ਨੇ ਕੀਤਾ ਹਮਲਾ

24 ਦਸੰਬਰ 2023:  ਹਿੰਦ ਮਹਾਸਾਗਰ ‘ਚ ਭਾਰਤ ਆ ਰਹੇ ਇਕ ਮਾਲਵਾਹਕ ਜਹਾਜ਼ ‘ਤੇ ਈਰਾਨੀ ਡਰੋਨ ਨੇ ਹਮਲਾ ਕੀਤਾ। ਅਮਰੀਕੀ ਰੱਖਿਆ ਵਿਭਾਗ ਨੇ ਇਹ ਦਾਅਵਾ ਕੀਤਾ ਹੈ। ਅਮਰੀਕੀ ਰਿਪੋਰਟਾਂ ਮੁਤਾਬਕ ਕੈਮ ਪਲੂਟੋ ਨਾਮ ਦੇ ਜਹਾਜ਼ ‘ਤੇ ਸ਼ਨੀਵਾਰ ਸਵੇਰੇ 10 ਵਜੇ ਹਮਲਾ ਕੀਤਾ ਗਿਆ। ਉਸ ਸਮੇਂ ਜਹਾਜ਼ ਅਮਰੀਕਾ ਦੇ ਸੰਪਰਕ ਵਿੱਚ ਸੀ।

ਸਾਊਦੀ ਅਰਬ ਤੋਂ ਤੇਲ ਲੈ ਕੇ ਭਾਰਤ ਆ ਰਿਹਾ ਇਹ ਜਹਾਜ਼ ਜਾਪਾਨ ਦਾ ਸੀ ਅਤੇ ਲਾਇਬੇਰੀਆ ਦੇ ਝੰਡੇ ਹੇਠ ਚੱਲ ਰਿਹਾ ਸੀ। ਹਮਲੇ ਦੇ ਸਮੇਂ, ਜਹਾਜ਼ ਪੋਰਬੰਦਰ ਤੱਟ ਤੋਂ 217 ਸਮੁੰਦਰੀ ਮੀਲ (ਲਗਭਗ 400 ਕਿਲੋਮੀਟਰ) ਦੂਰ ਸੀ। ਇਹ ਖੇਤਰ ਭਾਰਤ ਦੇ ਵਿਸ਼ੇਸ਼ ਆਰਥਿਕ ਖੇਤਰ (EEZ) ਤੋਂ ਬਾਹਰ ਆਉਂਦਾ ਹੈ।

ਇਸ ਦੌਰਾਨ, ਨਿਊਜ਼ ਏਜੰਸੀ ਏਐਨਆਈ ਦੇ ਅਨੁਸਾਰ, ਸ਼ਨੀਵਾਰ ਨੂੰ ਲਾਲ ਸਾਗਰ ਵਿੱਚ ਇੱਕ ਗੈਬੋਨੀਜ਼ ਝੰਡੇ ਵਾਲੇ ਤੇਲ ਟੈਂਕਰ ਐਮ/ਵੀ ਸਾਈਬਾਬਾ ਉੱਤੇ ਇੱਕ ਡਰੋਨ ਦੁਆਰਾ ਹਮਲਾ ਕੀਤਾ ਗਿਆ। ਜਹਾਜ਼ ਵਿੱਚ ਚਾਲਕ ਦਲ ਦੇ 25 ਮੈਂਬਰ ਵੀ ਸਵਾਰ ਸਨ। ਭਾਰਤੀ ਜਲ ਸੈਨਾ ਨੇ ਕਿਹਾ ਹੈ ਕਿ ਸਾਰੇ ਸੁਰੱਖਿਅਤ ਹਨ।

ਦਰਅਸਲ, ਅਮਰੀਕੀ ਫੌਜ ਨੇ ਕਿਹਾ ਸੀ ਕਿ ਸ਼ਨੀਵਾਰ ਰਾਤ ਲਗਭਗ 10:30 ਵਜੇ, ਹੂਤੀ ਬਾਗੀਆਂ ਨੇ ਲਾਲ ਸਾਗਰ ਵਿੱਚ ਭਾਰਤੀ ਝੰਡੇ ਵਾਲੇ ਗੈਬੋਨ ਤੇਲ ਟੈਂਕਰ ਐਮ/ਵੀ ਸਾਈਬਾਬਾ ‘ਤੇ ਵੀ ਡਰੋਨ ਨਾਲ ਹਮਲਾ ਕੀਤਾ। ਹਾਲਾਂਕਿ, ਭਾਰਤੀ ਜਲ ਸੈਨਾ ਨੇ ਇਸ ਗੱਲ ਨੂੰ ਰੱਦ ਕਰ ਦਿੱਤਾ ਹੈ ਕਿ ਜਹਾਜ਼ ਭਾਰਤੀ ਝੰਡੇ ਵਾਲਾ ਸੀ। ਇਹ ਹਮਲਾ ਯਮਨ ਦੀ ਸਲੀਫ ਬੰਦਰਗਾਹ ਤੋਂ ਲਗਭਗ 45 ਨੌਟੀਕਲ ਮੀਲ ਦੱਖਣ-ਪੱਛਮ ਵਿਚ ਬਾਬ ਅਲ-ਮੰਡਾਬ ਸਟ੍ਰੇਟ ਨੇੜੇ ਹੋਇਆ।