ਗੁਰੂਗ੍ਰਾਮ ਦੇ ਲੋਕਾਂ ਲਈ ਖੁਸ਼ਖਬਰੀ, PM ਮੋਦੀ ਦਵਾਰਕਾ ਐਕਸਪ੍ਰੈਸ ਵੇਅ ਦੇਸ਼ ਨੂੰ ਅੱਜ ਕਰਨਗੇ ਸਮਰਪਿਤ

ਕਰੋੜਾਂ ਲੋਕਾਂ ਦੀ ਸਾਲਾਂ ਦੀ ਉਡੀਕ ਅੱਜ ਖਤਮ ਹੋਣ ਜਾ ਰਹੀ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅੱਜ ਦੁਪਹਿਰ ਕਰੀਬ 1 ਵਜੇ ਆਪਣੇ ਡ੍ਰੀਮ ਪ੍ਰੋਜੈਕਟ ਦਵਾਰਕਾ ਐਕਸਪ੍ਰੈਸ ਵੇਅ ਦੇ ਗੁਰੂਗ੍ਰਾਮ ਹਿੱਸੇ ਦਾ ਉਦਘਾਟਨ ਕਰਨਗੇ। ਇਸ ਦੇ ਲਈ ਉਹ ਦੁਪਹਿਰ 12 ਵਜੇ ਬਜਖੇੜਾ ਸਰਹੱਦ ਤੋਂ ਗੁਰੂਗ੍ਰਾਮ ਦੀ ਸਰਹੱਦ ‘ਤੇ ਦਾਖਲ ਹੋਣਗੇ। ਜਿੱਥੇ ਰਾਜ ਦੇ ਰਾਜਪਾਲ ਬੰਡਾਰੂ ਦੱਤਾਤ੍ਰੇਅ ਅਤੇ ਮੁੱਖ ਮੰਤਰੀ ਮਨੋਹਰ ਲਾਲ ਉਨ੍ਹਾਂ ਦਾ ਸਵਾਗਤ ਕਰਨਗੇ। ਇਸ ਤੋਂ ਬਾਅਦ ਪਿੰਡ ਬਸਾਈ ਦੇ ਸਾਹਮਣੇ ਐਕਸਪ੍ਰੈਸ ਵੇਅ ‘ਤੇ ਰੋਡ ਸ਼ੋਅ ਵੀ ਕਰਨਗੇ| ਫਿਰ ਉਹ ਸੈਕਟਰ-84 ਸਥਿਤ ਜਨ ਸਭਾ ਵਾਲੀ ਥਾਂ ‘ਤੇ ਲੋਕਾਂ ਨੂੰ ਸੰਬੋਧਨ ਕਰਨਗੇ।

ਦਿੱਲੀ ਦੇ ਮਹੀਪਾਲਪੁਰ ਵਿੱਚ ਸ਼ਿਵਮੂਰਤੀ ਦੇ ਸਾਹਮਣੇ ਤੋਂ ਲੈ ਕੇ ਖੇੜਕੀਦੌਲਾ ਟੋਲ ਪਲਾਜ਼ਾ ਦੇ ਨੇੜੇ 9,000 ਕਰੋੜ ਰੁਪਏ ਦੀ ਲਾਗਤ ਨਾਲ 29 ਕਿਲੋਮੀਟਰ ਲੰਬਾ ਦਵਾਰਕਾ ਐਕਸਪ੍ਰੈਸਵੇਅ ਬਣਾਇਆ ਜਾ ਰਿਹਾ ਹੈ। ਇਸ ਵਿੱਚੋਂ 18 ਕਿਲੋਮੀਟਰ ਦਾ ਹਿੱਸਾ ਗੁਰੂਗ੍ਰਾਮ ਵਿੱਚ ਪੈਂਦਾ ਹੈ, ਜਿਸਦਾ ਉਦਘਾਟਨ ਅੱਜ Pm ਮੋਦੀ ਦੁਆਰਾ ਕੀਤਾ ਜਾ ਰਿਹਾ ਹੈ|

ਉਦਘਾਟਨ ਸਮਾਰੋਹ ਵਿੱਚ ਰਾਜਪਾਲ ਅਤੇ ਮੁੱਖ ਮੰਤਰੀ ਤੋਂ ਇਲਾਵਾ ਕੇਂਦਰੀ ਸਰਫੇਸ ਰੋਡ ਟਰਾਂਸਪੋਰਟ ਅਤੇ ਹਾਈਵੇਜ਼ ਮੰਤਰੀ ਨਿਤਿਨ ਗਡਕਰੀ, ਸਥਾਨਕ ਸੰਸਦ ਮੈਂਬਰ ਅਤੇ ਕੇਂਦਰੀ ਰਾਜ ਮੰਤਰੀ ਰਾਓ ਇੰਦਰਜੀਤ ਸਿੰਘ ਮੁੱਖ ਤੌਰ ‘ਤੇ ਮੌਜੂਦ ਹੋਣਗੇ। ਉਦਘਾਟਨ ਸਮਾਰੋਹ ਵਾਲੀ ਥਾਂ ‘ਤੇ 36 ਸੈਕਟਰ ਬਣਾਏ ਗਏ ਹਨ। ਇਸ ਤੋਂ ਇਲਾਵਾ ਅੱਠ ਪਾਰਕਿੰਗ ਥਾਵਾਂ ਬਣਾਈਆਂ ਗਈਆਂ ਹਨ।

ਇਸ ਵਿੱਚ ਮੀਡੀਆ ਕਰਮੀਆਂ, ਸਰਕਾਰੀ ਵਾਹਨਾਂ ਅਤੇ ਵੀਆਈਪੀ ਵਾਹਨਾਂ ਦੇ ਦਾਖ਼ਲੇ ਲਈ ਵੱਖਰੀ ਪਾਰਕਿੰਗ ਬਣਾਈ ਗਈ ਹੈ। ਆਮ ਲੋਕਾਂ ਨੂੰ ਸਮਾਗਮ ਵਾਲੀ ਥਾਂ ‘ਤੇ ਪਹੁੰਚਣ ‘ਚ ਕਿਸੇ ਤਰ੍ਹਾਂ ਦੀ ਤਕਲੀਫ ਦਾ ਸਾਹਮਣਾ ਨਾ ਕਰਨਾ ਪਵੇ ਇਸ ਲਈ ਵੱਖਰੇ ਪ੍ਰਵੇਸ਼ ਦੁਆਰ ਬਣਾਏ ਗਏ ਹਨ। ਪ੍ਰਧਾਨ ਮੰਤਰੀ ਦੇ ਪ੍ਰੋਗਰਾਮ ਦਾ ਪ੍ਰਬੰਧ ਕਰਨ ਲਈ ਪੁਲਿਸ ਅਤੇ ਪ੍ਰਸ਼ਾਸਨ ਸਾਰੇ ਅਧਿਕਾਰੀਆਂ ਨੇ ਆਪਣੀਆਂ ਜ਼ਿੰਮੇਵਾਰੀਆਂ ਪੂਰੀਆਂ ਕਰਕੇ ਐਤਵਾਰ ਨੂੰ ਪ੍ਰਬੰਧਾਂ ਨੂੰ ਅੰਤਿਮ ਰੂਪ ਦੇ ਦਿੱਤਾ ਹੈ।