ਮੁਹਾਲੀ ਪੁਲਿਸ ਨੇ 2 ਮਹੀਨਿਆਂ ‘ਚ 106 ਨਸ਼ਾ ਤਸਕਰ ਕੀਤੇ ਗ੍ਰਿਫਤਾਰ, 4 ਲੱਖ ਦੀ ਡਰੱਗ ਮਨੀ ਬਰਾਮਦ

2 SEPTEMBER 2023:  ਕਈ ਪਿੰਡਾਂ ਸ਼ਹਿਰਾਂ ਦੇ ਨੌਜਵਾਨ ਨਸ਼ਿਆਂ ਦਾ ਸ਼ਿਕਾਰ ਹੋ ਰਹੇ ਹਨ, ਜਿਸ ਦੀ ਵਜ੍ਹਾ ਕਾਰਨ ਘਰਾਂ ਦੇ ਘਰ ਬਰਬਾਦ ਹੋ ਰਹੇ ਹਨ। ਓਥੇ ਹੀ ਹੁਣ ਮੁਹਾਲੀ ਪੁਲਿਸ ਨੇ 2 ਮਹੀਨਿਆਂ ਵਿੱਚ ਐਨਡੀਪੀਐਸ ਕੇਸ ਵਿੱਚ 106 ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਜ੍ਹਿਨਾਂ ਵਿੱਚੋਂ 18 ਔਰਤਾਂ ਹਨ। ਮੁਲਜ਼ਮਾਂ ਕੋਲੋਂ 4 ਲੱਖ 21 ਹਜ਼ਾਰ 40 ਰੁਪਏ ਦੀ ਡਰੱਗ ਮਨੀ ਬਰਾਮਦ ਹੋਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਨਸ਼ਾ ਤਸਕਰੀ ਦੇ ਮਾਮਲੇ ਵਿੱਚ ਔਰਤਾਂ ਦੀ ਸ਼ਮੂਲੀਅਤ ਤੇਜ਼ੀ ਨਾਲ ਵੱਧ ਰਹੀ ਹੈ। ਮੋਹਾਲੀ ਪੁਲਿਸ ਨੇ ਜਿਹੜੀਆਂ ਔਰਤਾਂ ਨੂੰ ਨਸ਼ਾ ਤਸਕਰੀ ਦੇ ਮਾਮਲੇ ਵਿੱਚ ਫੜਿਆ ਹੈ, ਉਨ੍ਹਾਂ ਦੇ ਪਤੀ ਜਾਂ ਤਾਂ ਨਸ਼ਾ ਤਸਕਰੀ ਕਰਦੇ ਹਨ ਜਾਂ ਫਿਰ ਉਨ੍ਹਾਂ ਦੇ ਪੁੱਤਰ।

ਪੁਲਿਸ ਵੱਲੋਂ ਹੁਣ ਤੱਕ ਫੜੇ ਗਏ ਨਸ਼ਿਆਂ ਦੇ ਮਾਮਲਿਆਂ ਦੇ ਅਧਿਐਨ ਤੋਂ ਇਹ ਗੱਲ ਸਾਹਮਣੇ ਆਈ ਹੈ ਕਿ ਨਸ਼ਿਆਂ ਦੇ ਆਦੀ ਜ਼ਿਆਦਾਤਰ ਅਮੀਰ ਘਰਾਣਿਆਂ ਦੇ ਨੌਜਵਾਨ ਹਨ। ਇਹ ਨੌਜਵਾਨ ਪਾਰਟੀਆਂ ਜਾਂ ਦੋਸਤਾਂ ਨਾਲ ਘੁੰਮਣ ਸਮੇਂ ਨਸ਼ੇ ਦੇ ਆਦੀ ਹੋ ਗਏ। ਏਡੀਜੀਪੀ ਲਾਅ ਐਂਡ ਆਰਡਰ ਅਰਪਿਤ ਸ਼ੁਕਲਾ ਨੇ ਕਿਹਾ ਕਿ ਪੁਲਿਸ ਟੀਮਾਂ ਖੇਪ ਭੇਜਣ ਵਾਲੇ ਪਾਕਿਸਤਾਨ ਸਥਿਤ ਕਿੰਗਪਿਨ ਸਮੇਤ ਹੋਰਾਂ ਦੀ ਭੂਮਿਕਾ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ।

ਨਸ਼ਿਆਂ ਦੀ ਲੜੀ ਨੂੰ ਤੋੜਨ ਲਈ ਪੰਜਾਬ ਸਰਕਾਰ ਨੇ ਐਵਾਰਡ ਸਕੀਮ ਸ਼ੁਰੂ ਕੀਤੀ ਹੈ। ਜੇਕਰ ਕੋਈ ਗੁਪਤ ਸੂਚਨਾ ਦਿੰਦਾ ਹੈ ਅਤੇ ਉਸ ਦੀ ਸੂਚਨਾ ‘ਤੇ ਨਸ਼ਾ ਬਰਾਮਦ ਹੁੰਦਾ ਹੈ ਜਾਂ ਨਸ਼ਾ ਤਸਕਰ ਫੜਿਆ ਜਾਂਦਾ ਹੈ ਤਾਂ ਇਨਾਮ ਦਿੱਤਾ ਜਾਵੇਗਾ। ਸੂਚਨਾ ਦੇਣ ਵਾਲੇ ਦਾ ਨਾਮ ਗੁਪਤ ਰੱਖਿਆ ਜਾਵੇਗਾ।

ਪੰਜਾਬ ਪੁਲਿਸ ਨੇ ਐਨ.ਡੀ.ਪੀ.ਐਸ ਐਕਟ ਤਹਿਤ ਵਿਸ਼ੇਸ਼ਤਾ ਪ੍ਰੋਗਰਾਮ ਸ਼ੁਰੂ ਕੀਤਾ ਹੈ, ਜਿਸ ਤਹਿਤ ਜੋ ਵੀ ਨਸ਼ਾ ਤਸਕਰ ਫੜਿਆ ਜਾਵੇਗਾ, ਉਸ ਦੀ ਜਾਇਦਾਦ ਜ਼ਬਤ ਕਰ ਲਈ ਜਾਵੇਗੀ। ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਗ੍ਰਿਫ਼ਤਾਰੀਆਂ ਹੋਣ ਦੀ ਸੰਭਾਵਨਾ ਹੈ। ਜ਼ੀਰਕਪੁਰ-13 ਸਿਟੀ ਖਰੜ-11 ਸੋਹਾਣਾ-2 ਲਾਲੜੂ-5 ਡੇਰਾਬੱਸੀ-7 ਸਦਰ ਖਰੜ-4 ਹੰਡੇਸਰਾ-6 ਬਲੌਂਗੀ-7 ਸਿਟੀ ਕੁਰਾਲੀ-4 ਫੇਜ਼-1-2 ਫੇਜ਼-11-3 ਢਕੌਲੀ-6 ਬਲਾਕ ਮਾਜਰੀ-2 ਮਾਜਰੀ-2 ਸਦਰ ਕੁਰਾਲੀ ਵਿੱਚ ਦੋ ਕੇਸ ਦਰਜ ਕੀਤੇ ਗਏ ਹਨ। ਅਫੀਮ- 29 ਕਿਲੋ 22 ਗ੍ਰਾਮ, ਹੈਰੋਇਨ- 1 ਕਿਲੋ 393 ਗ੍ਰਾਮ, ਕੋਕੀਨ- 147 ਗ੍ਰਾਮ, ਚਰਸ- 600 ਗ੍ਰਾਮ, ਗਾਂਜਾ- 73.17 ਕਿਲੋ, ਨਸ਼ੀਲੀਆਂ ਗੋਲੀਆਂ- 11 ਹਜ਼ਾਰ 80

ਐਸਐਸਪੀ ਮੁਹਾਲੀ ਸੰਦੀਪ ਗਰਗ ਨੇ ਨਸ਼ਾ ਵਿਰੋਧੀ ਹੈਲਪਲਾਈਨ ਨੰਬਰ 8054100112 ਅਤੇ ਈਮੇਲ ਆਈਡੀ ssp.mohali .druginfo@gmail.com ਜਾਰੀ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਨਸ਼ਾ ਤਸਕਰਾਂ ਅਤੇ ਸ਼ਹਿਰ ਵਿੱਚ ਕਿਤੇ ਵੀ ਵੇਚੇ ਜਾ ਰਹੇ ਨਸ਼ੇ ਬਾਰੇ ਜਾਣਕਾਰੀ ਇਸ ਨੰਬਰ ਜਾਂ ਈਮੇਲ ‘ਤੇ ਦਿੱਤੀ ਜਾ ਸਕਦੀ ਹੈ।