ਵਟਸਐਪ ਮੁਖੀ ਨੇ ਕੀਤੀ ਇਸ ਸਪਾਈਵੇਅਰ ’ਤੇ ਰੋਕ ਲਗਾਉਣ ਦੀ ਅਪੀਲ

ਵਟਸਐਪ ਦੇ ਮੁਖੀ ਵਿਲ ਕੈਥਕਾਰਟ ਨੇ ਕਿਹਾ ਹੈ ਕਿ ਮਨੁੱਖੀ ਅਧਿਕਾਰਾਂ ਦੇ ਹਨਨ ਲਈ ਪੇਗਾਸਸ ਦਾ ਇਸਤੇਮਾਲ ਬੰਦ ਹੋਣਾ ਚਾਹੀਦਾ ਹੈ। ਵਿਲ ਕੈਥਕਾਰਟ ਨੇ ਇਕ ਤੋਂ ਬਾਅਦ ਇਕ ਕਈ ਟਵੀਟ ਕੀਤੇ ਹਨ ਜਿਨ੍ਹਾਂ ’ਚ ਉਨ੍ਹਾਂ ਕਿਹਾ ਹੈ ਕਿ ਐੱਨ.ਐੱਸ.ਓ. ਦੇ ਪੇਗਾਸਸ ਦਾ ਇਸਤੇਮਾਲ ਵਿਸ਼ਵ ਪੱਧਰ ’ਤੇ ਮਨੁੱਖੀ ਅਧਿਕਾਰਾਂ ਦੇ ਹਨਨ ਲਈ ਹੋ ਰਿਹਾ ਹੈ, ਜਿਸ ਨੂੰ ਤੁਰੰਤ ਰੋਕਣਾ ਹੋਵੇਗਾ। ਕੈਥਕਾਰਟ ਦਾ ਇਹ ਬਿਆਨ ਪੇਗਾਸਸ ਸਾਫਟਵੇਅਰ ਰਾਹੀਂ ਕਰੀਬ 300 ਵੈਰੀਫਾਈਡ ਭਾਰਤੀ ਮੋਬਾਇਲ ਨੰਬਰਾਂ ਦੀ ਜਾਸੂਸੀ ਹੋਣ ਦੀ ਰਿਪੋਰਟ ਸਾਹਮਣੇ ਆਉਣ ਤੋਂ ਬਾਅਦ ਆਇਆ ਹੈ। ਜਿਨ੍ਹਾਂ 300 ਨੰਬਰਾਂ ਦੀ ਜਾਸੂਸੀ ਹੋਈ ਹੈ, ਉਨ੍ਹਾਂ ’ਚ ਸਰਕਾਰ ’ਚ ਸ਼ਾਮਲ ਮੰਤਰੀਆਂ, ਪ੍ਰਸਿੱਧ ਨੇਤਾਵਾਂ, ਵੱਡੇ ਪੱਤਰਕਾਰਾਂ ਤੋਂ ਇਲਾਵਾ ਵਕੀਲਾਂ, ਸਮਾਜਿਕ ਵਰਕਰਾਂ ਤੇ ਹੋਰ ਲੋਕਾਂ ਦੇ ਨੰਬਰ ਸ਼ਾਮਲ ਹਨ। ਭਾਰਤ ਦਾ ਵੀ ਨਾਂ ਦੁਨੀਆ ਦੇ ਉਨ੍ਹਾਂ 50 ਦੇਸ਼ਾਂ ਦੀ ਸੂਚੀ ’ਚ ਆਇਆ ਹੈ ਜਿੱਥੇ ਸਾਈਬਰ ਸਰਵਿਲਾਂਸ ਦੇ ਤੌਰ ’ਤੇ ਸਪਾਈਵੇਅਰ ਦਾ ਇਸਤੇਮਾਲ ਹੋ ਰਿਹਾ ਹੈ। ਸਾਲ 2019 ’ਚ ਭਾਰਤ ਸਮੇਤ ਦੁਨੀਆ ਦੇ ਕਈ ਪੱਤਰਕਾਰਾਂ ਅਤੇ ਸਮਾਜਿਕ ਵਰਕਰਾਂ ਦੇ ਵਟਸਐਪ ਖਾਤਿਆਂ ਨੂੰ ਹੈਕ ਕੀਤਾ ਗਿਆ ਸੀ ਤੇ ਉਸ ਹੈਕਿੰਗ ’ਚ ਵੀ ਪੇਗਾਸਸ ਦਾ ਨਾਂ ਸਾਹਮਣੇ ਆਇਆ ਸੀ, ਜਿਸ ਤੋਂ ਬਾਅਦ ਵਟਸਐਪ ਨੇ ਐੱਨ.ਐੱਸ.ਓ. ਗਰੁੱਪ ’ਤੇ ਮੁਕੱਦਮਾ ਵੀ ਕੀਤਾ ਸੀ।

ਕੈਥਕਾਰਟ ਨੇ ਟਵਿਟਰ ’ਤੇ ਕਈ ਟਵੀਟ ਰਾਹੀਂ ਮਨੁੱਖੀ ਅਧਿਕਾਰਾਂ ਲਈ ਕੰਮ ਕਰਨ ਵਾਲਿਆਂ, ਟੈਕਨਾਲੋਜੀ ਕੰਪਨੀਆਂ ਅਤੇ ਸਰਕਾਰਾਂ ਨੂੰ ਅਪੀਲ ਕੀਤੀ ਹੈ ਕਿ ਪੇਗਾਸਸ ਸਪਾਈਵੇਅਰ ਦੀ ਦੁਰਵਰਤੋਂ ਨੂੰ ਰੋਕਣ ਲਈ ਸਾਰਿਆਂ ਇਕੱਠੇ ਹੋਣਾ ਪਵੇਗਾ। ਵਿਲ ਕੈਥਕਾਰਟ ਦਾ ਕਹਿਣਾ ਹੈ ਕਿ ਇੰਟਰਨੈੱਟ ਦੀ ਸਕਿਓਰਿਟੀ ਲਈ ਇਹ ਇਕ ਚਿਤਾਵਨੀ ਹੈ। ਮੋਬਾਇਲ ਨੰਬਰ ਅਰਬਾਂ ਲੋਕਾਂ ਦਾ ਪ੍ਰਾਈਮਰੀ ਕੰਪਿਊਟਰ ਹੈ ਜਿਸ ਵਿਚ ਲੋਕ ਆਪਣਾ ਨਿੱਜੀ ਡਾਟਾ ਰੱਖਦੇ ਹਨ ਅਤੇ ਨਿੱਜੀ ਗੱਲਾਂ ਕਰਦੇ ਹਨ। ਸਰਕਾਰ ਅਤੇ ਕੰਪਨੀਆਂ ਨੂੰ ਲੋਕਾਂ ਦੀ ਸੁਰੱਖਿਆ ਲਈ ਅੱਗੇ ਆਉਣਾ ਹੋਵੇਗਾ ਅਤੇ ਲੋਕਾਂ ਦੀ ਸੁਰੱਖਿਆ ਯਕੀਨੀ ਕਰਨੀ ਹੋਵੇਗੀ। ਵਿਲ ਕੈਥਕਾਰਟ ਨੇ ਕਿਹਾ ਕਿ ਸਾਨੂੰ ਐੱਨ.ਐੱਸ.ਓ. ਗਰੁੱਪ ਨੂੰ ਜਵਾਬਦੇਹ ਠਹਿਰਾਉਣ ਲਈ ਹੋਰ ਜ਼ਿਆਦਾ ਕੰਪਨੀਆਂ ਅਤੇ ਸਰਕਾਰਾਂ ਦੀ ਲੋੜ ਹੈ। ਅਸੀਂ ਇਕ ਵਾਰ ਫਿਰ ਤੋਂ ਗੈਰ-ਜ਼ਿੰਮੇਵਾਰ ਨਿਗਰਾਨੀ ਤਕਨੀਕ ਦੇ ਇਸਤੇਮਾਲ ’ਤੇ ਗਲੋਬਲ ਰੋਕ ਲਗਾਉਣ ਦੀ ਅਪੀਲ ਕਰਦੇ ਹਾਂ।