ਮਾਰੂਤੀ ਸੁਜ਼ੂਕੀ ਨੇ ਵੇਚੀਆਂ 2.5 ਕਰੋੜ ਕਾਰਾਂ, ਭਾਰਤ ‘ਚ ਹਰ ਤੀਸਰੀ ਕਾਰ ਹੈ ਮਾਰੂਤੀ

ਕਾਰਾਂ ਦੀ ਗੱਲ ਕਰੀਏ ਤਾਂ ਭਾਰਤ ਵਿੱਚ ਮਾਰੂਤੀ ਸਭ ਤੋਂ ਵੱਡੀ ਕਾਰ ਨਿਰਮਾਤਾ ਕੰਪਨੀ ਹੈ ਜੋ 1983 ਤੋਂ ਆਪਣਾ ਕਾਰੋਬਾਰ ਕਰ ਰਹੀ ਹੈ। ਨਵੇਂ ਸਾਲ ਦੀ ਸ਼ੁਰੂਆਤ ਵਿੱਚ ਹੀ ਕੰਪਨੀ ਨੇ ਇੱਕ ਅਹਿਮ ਉਪਲਬਧੀ ਹਾਸਲ ਕੀਤੀ ਹੈ। 9 ਜਨਵਰੀ 2023 ਨੂੰ ਮਾਰੂਤੀ ਸੁਜ਼ੂਕੀ ਇੰਡੀਆ ਨੇ ਦੱਸਿਆ ਕਿ ਕੰਪਨੀ ਨੇ 25 ਮਿਲੀਅਨ ਭਾਵ 2.5 ਕਰੋੜ ਕਾਰਾਂ ਵੇਚਣ ਦੇ ਟੀਚੇ ਨੂੰ ਪ੍ਰਾਪਤ ਕਰ ਲਿਆ ਹੈ।

ਤੁਹਾਨੂੰ ਦੱਸ ਦੇਈਏ ਕਿ ਕਿਸੇ ਵੀ ਕਾਰ ਨਿਰਮਾਤਾ ਵੱਲੋਂ ਵੇਚੀਆਂ ਗਈਆਂ ਕਾਰਾਂ ਦੇ ਮੁਕਾਬਲੇ ਇਹ ਸਭ ਤੋਂ ਵੱਡੀ ਸੰਖਿਆ ਹੈ। ਇੱਕ ਅੰਦਾਜ਼ੇ ਮੁਤਾਬਕ ਦੇਸ਼ ਵਿੱਚ ਹੁਣ ਤੱਕ ਕੁੱਲ ਯਾਤਰੀ ਕਾਰਾਂ ਦੀ ਗਿਣਤੀ 7 ਕਰੋੜ ਦੇ ਕਰੀਬ ਹੈ। ਇਸ ਹਿਸਾਬ ਨਾਲ ਦੇਸ਼ ‘ਚ ਹਰ ਤੀਜੀ ਕਾਰ ਮਾਰੂਤੀ ਦੀ ਹੀ ਹੈ। ਮਾਰੂਤੀ ਨੇ ਆਪਣੀ ਸ਼ੁਰੂਆਤ ਦਸੰਬਰ 1983 ਵਿੱਚ ਮਾਰੂਤੀ 800 ਨਾਲ ਕੀਤੀ ਸੀ ਅਤੇ ਇਸ ਤੋਂ ਬਾਅਦ ਇਹ ਪਿੱਛੇ ਨਹੀਂ ਮੁੜੀ। ਇਸ ਸਮੇਂ ਕਿਸੇ ਕਿਸੇ ਅਮੀਰ ਭਾਰਤੀ ਕੋਲ ਆਪਣੀ ਕਾਰ ਹੁੰਦੀ ਸੀ। ਜਿਸਦਾ ਸਾਫ ਮਤਲਬ ਸੀ ਕਿ ਲੋਕਾਂ ਕੋਲ ਆਪਣੀਆਂ ਕਾਰਾਂ ਨਾ-ਮਾਤਰ ਹੁੰਦੀਆਂ ਸਨ। ਇਨ੍ਹਾਂ 40 ਸਾਲਾਂ ਵਿੱਚ, ਭਾਰਤੀ ਕਾਰ ਉਦਯੋਗ ਵਿੱਚ ਵਾਧਾ ਹੋਇਆ ਅਤੇ ਸਮੇਂ ਦੇ ਨਾਲ ਭਾਰਤੀ ਗਾਹਕਾਂ ਦੀਆਂ ਤਰਜੀਹਾਂ ਵੀ ਬਦਲ ਗਈਆਂ।

ਤੁਹਾਡੀ ਜਾਣਕਾਰੀ ਲਈ ਦੱਸ ਦੇਈਏ ਕਿ ਕੰਪਨੀ ਨੇ 2006 ਵਿੱਚ ਹੀ ਭਾਰਤ ਵਿੱਚ 50 ਲੱਖ ਕਾਰਾਂ ਵੇਚੀਆਂ ਸਨ। ਉਦੋਂ ਤੱਕ ਕੰਪਨੀ ਸਿਰਫ ਵੈਗਨਆਰ, ਸਵਿਫਟ ਅਤੇ ਆਲਟੋ ਵਰਗੇ ਮਾਡਲ ਹੀ ਵੇਚਦੀ ਸੀ ਪਰ ਇਸ ਤੋਂ ਬਾਅਦ ਕੰਪਨੀ ਨੇ ਬਾਜ਼ਾਰ ‘ਚ ਨਵੇਂ ਮਾਡਲ ਲਾਂਚ ਕਰਨੇ ਸ਼ੁਰੂ ਕਰ ਦਿੱਤੇ। ਫਿਰ ਕੰਪਨੀ ਨੇ CNG ਵਿੱਚ ਕਦਮ ਰੱਖਿਆ ਅਤੇ ਅਗਸਤ 2010 ਤੱਕ, ਕੰਪਨੀ CNG ਤਕਨਾਲੋਜੀ ਦੀ ਪੇਸ਼ਕਸ਼ ਕਰਨ ਵਾਲੀਆਂ ਪਹਿਲੀਆਂ ਕੰਪਨੀਆਂ ਵਿੱਚੋਂ ਇੱਕ ਬਣ ਗਈ ਸੀ। ਸੀਐਨਜੀ ਕਿੱਟ, ਛੋਟੇ ਅਤੇ ਕਿਫ਼ਾਇਤੀ ਵਿਕਲਪਾਂ ਦੀ ਵਧਦੀ ਪ੍ਰਸਿੱਧੀ ਕਾਰਨ, ਕੰਪਨੀ ਨੇ ਫਰਵਰੀ 2012 ਤੱਕ 10 ਮਿਲੀਅਨ ਕਾਰਾਂ ਵੇਚਣ ਦਾ ਰਿਕਾਰਡ ਬਣਾਇਆ ਸੀ। ਇਹ ਅੰਕੜਾ ਜੁਲਾਈ 2019 ਤੱਕ ਦੁੱਗਣਾ ਹੋ ਗਿਆ।

ਦੇਸ਼ ਵਿੱਚ ਕਈ ਕਾਰ ਕੰਪਨੀਆਂ ਹਨ ਅਤੇ ਮੁਕਾਬਲੇਬਾਜ਼ੀ ਵੀ ਬਹੁਤ ਤੇਜ਼ ਹੈ। ਪਰ ਫਿਰ ਵੀ ਮਾਰੂਤੀ ਸਭ ਤੋਂ ਅੱਗੇ ਹੈ। ਕੰਪਨੀ ਆਪਣੇ 17 ਮਾਡਲ ਵੇਚਦੀ ਹੈ। ਕੰਪਨੀ ਦਾ ਪੋਰਟਫੋਲੀਓ ਵੀ ਤਗੜਾ ਹੈ ਜਿਸ ਵਿੱਚ ਕੰਪਨੀ ਲਗਾਤਾਰ ਬਦਲਾਅ ਕਰ ਰਹੀ ਹੈ। ਕੰਪਨੀ ਨੇ ਹਾਲ ਹੀ ‘ਚ ਕੁਝ ਵੱਡੀਆਂ ਕਾਰਾਂ ਲਾਂਚ ਕੀਤੀਆਂ ਹਨ, ਜਿਨ੍ਹਾਂ ‘ਚ ਗ੍ਰੈਂਡ ਵਿਟਾਰਾ ਸ਼ਾਮਲ ਹੈ। ਇਹ ਮਾਰੂਤੀ ਦਾ ਪਹਿਲਾ ਮਜ਼ਬੂਤ ​​ਹਾਈਬ੍ਰਿਡ SUV ਮਾਡਲ ਹੈ। ਇਸ ਤੋਂ ਇਲਾਵਾ ਕੰਪਨੀ ਨੇ ਹਾਲ ਹੀ ‘ਚ ਬ੍ਰੇਜ਼ਾ, ਜਿਮਨੀ ਅਤੇ ਫ੍ਰੈਂਕਸ SUV ਨੂੰ ਲਾਂਚ ਕੀਤਾ ਹੈ।