ਉੜੀਸਾ: ਤਿੰਨ ਰੇਲ ਗੱਡੀਆਂ ਦੀ ਆਪਸ ‘ਚ ਹੋਈ ਭਿਆਨਕ ਟੱਕਰ, 238 ਲੋਕਾਂ ਦੀ ਮੌਤ, 900 ਜ਼ਖਮੀ

ਉੜੀਸਾ ਦੇ ਬਾਲਾਸੋਰ ‘ਚ ਸ਼ੁੱਕਰਵਾਰ ਸ਼ਾਮ ਨੂੰ ਹੋਏ ਰੇਲ ਹਾਦਸੇ ‘ਚ 238 ਲੋਕਾਂ ਦੀ ਮੌਤ ਹੋ ਗਈ। ਇਸ ਹਾਦਸੇ ‘ਚ 900 ਤੋਂ ਵੱਧ ਯਾਤਰੀ ਜ਼ਖਮੀ ਹੋ ਗਏ। ਰੇਲਵੇ ਮੁਤਾਬਕ 650 ਲੋਕਾਂ ਨੂੰ ਹਸਪਤਾਲ ‘ਚ ਭਰਤੀ ਕਰਵਾਇਆ ਗਿਆ ਹੈ। ਇਹ ਹਾਦਸਾ ਬਾਲਾਸੋਰ ਦੇ ਬਹਿੰਗਾ ਬਾਜ਼ਾਰ ਸਟੇਸ਼ਨ ਨੇੜੇ ਸ਼ਾਮ ਕਰੀਬ 7 ਵਜੇ ਵਾਪਰਿਆ।

ਰੇਲਵੇ ਮੁਤਾਬਕ ਕੋਲਕਾਤਾ-ਚੇਨਈ ਕੋਰੋਮੰਡਲ ਐਕਸਪ੍ਰੈੱਸ ਅਤੇ ਯਸ਼ਵੰਤਪੁਰ-ਹਾਵੜਾ ਐਕਸਪ੍ਰੈੱਸ ਬਹੰਗਾ ਸਟੇਸ਼ਨ ਨੇੜੇ ਪਟੜੀ ਤੋਂ ਉਤਰ ਗਈਆਂ। ਇਸ ਤੋਂ ਬਾਅਦ ਕੋਰੋਮੰਡਲ ਐਕਸਪ੍ਰੈਸ ਰੇਲਗੱਡੀ ਨੇੜੇ ਟ੍ਰੈਕ ‘ਤੇ ਖੜ੍ਹੀ ਮਾਲ ਗੱਡੀ ਨਾਲ ਟਕਰਾ ਗਈ।

ਰੇਲਵੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਯਸ਼ਵੰਤਪੁਰ-ਹਾਵੜਾ ਐਕਸਪ੍ਰੈੱਸ ਪਟੜੀ ਤੋਂ ਉਤਰ ਗਈ ਸੀ। ਇਸ ਦੇ ਕੁਝ ਡੱਬੇ ਦੂਜੇ ਟ੍ਰੈਕ ‘ਤੇ ਪਲਟ ਗਏ ਅਤੇ ਦੂਜੇ ਪਾਸੇ ਤੋਂ ਆ ਰਹੀ ਸ਼ਾਲੀਮਾਰ-ਚੇਨਈ ਕੋਰੋਮੰਡਲ ਐਕਸਪ੍ਰੈੱਸ ਨਾਲ ਟਕਰਾ ਗਏ। ਇਸ ਤੋਂ ਬਾਅਦ ਕੋਰੋਮੰਡਲ ਟਰੇਨ ਦੀਆਂ ਕੁਝ ਬੋਗੀਆਂ ਵੀ ਪਟੜੀ ਤੋਂ ਉਤਰ ਗਈਆਂ। ਇਹ ਬੋਗੀਆਂ ਇਕ ਹੋਰ ਟ੍ਰੈਕ ‘ਤੇ ਮਾਲ ਗੱਡੀ ਨਾਲ ਟਕਰਾ ਗਈਆਂ। ਕੁਝ ਬੋਗੀਆਂ ਮਾਲ ਗੱਡੀ ਦੇ ਉੱਪਰ ਚੜ੍ਹ ਗਈਆਂ।

ਬਹਾਨਾਗਾ ਸਟੇਸ਼ਨ ‘ਤੇ ਪਹੁੰਚਣ ‘ਤੇ ਦੋਵਾਂ ਟਰੇਨਾਂ ‘ਚ 3 ਘੰਟੇ ਦਾ ਫਰਕ ਸੀ ਪਰ ਉਹ ਇਕੱਠੇ ਆ ਗਈਆਂ।
ਟਰੇਨ ਨੰਬਰ 12864 ਬੈਂਗਲੁਰੂ – ਹਾਵੜਾ ਸੁਪਰਫਾਸਟ ਐਕਸਪ੍ਰੈਸ 1 ਜੂਨ ਨੂੰ ਸਵੇਰੇ 7:30 ਵਜੇ ਬੈਂਗਲੁਰੂ ਦੇ ਯਸ਼ਵੰਤਪੁਰ ਸਟੇਸ਼ਨ ਤੋਂ ਰਵਾਨਾ ਹੋਈ। ਇਸ ਨੇ 2 ਜੂਨ ਨੂੰ ਰਾਤ ਕਰੀਬ 8 ਵਜੇ ਹਾਵੜਾ ਪਹੁੰਚਣਾ ਸੀ। ਇਹ ਆਪਣੇ ਨਿਰਧਾਰਤ ਸਮੇਂ ਤੋਂ 3.30 ਘੰਟੇ ਦੀ ਦੇਰੀ ਨਾਲ 06:30 ਵਜੇ ਭਦਰਕ ਪਹੁੰਚੀ। ਅਗਲਾ ਸਟੇਸ਼ਨ ਬਾਲਾਸੋਰ ਸੀ, ਜਿੱਥੇ ਰੇਲਗੱਡੀ 4 ਘੰਟੇ ਦੀ ਦੇਰੀ ਨਾਲ 7:52 ‘ਤੇ ਪਹੁੰਚਣੀ ਸੀ।

ਜਦੋਂ ਕਿ ਰੇਲਗੱਡੀ ਨੰਬਰ 12841 ਸ਼ਾਲੀਮਾਰ-ਚੇਨਈ ਕੇਂਦਰੀ ਕੋਰੋਮੰਡਲ ਐਕਸਪ੍ਰੈਸ 2 ਜੂਨ ਨੂੰ ਹੀ 3:20 ਵਜੇ ਹਾਵੜਾ ਤੋਂ ਰਵਾਨਾ ਹੋਈ ਸੀ। ਇਹ 3 ਜੂਨ ਨੂੰ ਸ਼ਾਮ 4:50 ਵਜੇ ਚੇਨਈ ਸੈਂਟਰਲ ਪਹੁੰਚਦੀ ਹੈ। ਇਹ ਸਮੇਂ ‘ਤੇ ਸ਼ਾਮ 6:37 ‘ਤੇ ਬਾਲਾਸੋਰ ਪਹੁੰਚੀ। ਅਗਲਾ ਸਟੇਸ਼ਨ ਭਦਰਕ ਸੀ ਜਿੱਥੇ ਟਰੇਨ ਨੇ 7:40 ‘ਤੇ ਪਹੁੰਚਣਾ ਸੀ। ਪਰ 7 ਵਜੇ ਦੇ ਕਰੀਬ ਦੋਵੇਂ ਟਰੇਨਾਂ ਬਹਿਨਗਾ ਬਜ਼ਾਰ ਸਟੇਸ਼ਨ ਨੇੜੇ ਆਹਮੋ-ਸਾਹਮਣੇ ਹੋ ਗਈਆਂ ਤਾਂ ਇਹ ਹਾਦਸਾ ਵਾਪਰ ਗਿਆ।