ਪੁਲਵਾਮਾ ਹਮਲੇ ਦਾ ਦੋਸ਼ੀ ਔਰੰਗਜ਼ੇਬ ਪਾਕਿਸਤਾਨ ‘ਚ ਅਗਵਾ

10 ਦਸੰਬਰ 2023: ਪੁਲਵਾਮਾ ਵਿੱਚ ਸੀਆਰਪੀਐਫ ਦੇ ਕਾਫ਼ਲੇ ਉੱਤੇ ਹਮਲੇ ਦੇ ਮਾਮਲੇ ਵਿੱਚ ਦੋਸ਼ੀ ਔਰੰਗਜ਼ੇਬ ਆਲਮਗੀਰ ਨੂੰ ਸ਼ੁੱਕਰਵਾਰ ਨੂੰ ਇਸਲਾਮਾਬਾਦ ਤੋਂ ਬੰਦੂਕਧਾਰੀਆਂ ਨੇ ਅਗਵਾ ਕਰ ਲਿਆ ਸੀ। ਔਰੰਗਜ਼ੇਬ ਬਾਈਕ ‘ਤੇ ਹਾਫਿਜ਼ਾਬਾਦ ਤੋਂ ਡੇਰਾ ਗਾਜ਼ੀ ਗੁਲਾਮ ਜਾ ਰਿਹਾ ਸੀ।

ਔਰੰਗਜ਼ੇਬ ਦੀ ਬਾਈਕ ਸੁੰਨਸਾਨ ਇਲਾਕੇ ਤੋਂ ਬਰਾਮਦ ਹੋਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਕੁਝ ਕਾਰ ਸਵਾਰ ਉਸ ਨੂੰ ਲੈ ਕੇ ਭੱਜ ਗਏ। ਬਹਾਵਲਪੁਰ ਦਾ ਔਰੰਗਜ਼ੇਬ ਕੁਝ ਸਮੇਂ ਤੋਂ ਹਾਫਿਜ਼ਾਬਾਦ ਵਿਚ ਗੁਪਤ ਰੂਪ ਵਿਚ ਰਹਿ ਰਿਹਾ ਸੀ। ਭਾਰਤ ਨੇ ਜੈਸ਼-ਏ-ਮੁਹੰਮਦ ਦੇ ਅੱਤਵਾਦੀ ਔਰੰਗਜ਼ੇਬ ਨੂੰ ਅੱਤਵਾਦ ਵਿਰੋਧੀ UAPA ਕਾਨੂੰਨ ਦੇ ਤਹਿਤ ਲੋੜੀਂਦਾ ਘੋਸ਼ਿਤ ਕੀਤਾ ਹੈ। 2019 ਵਿੱਚ, ਪੁਲਵਾਮਾ ਹਮਲੇ ਵਿੱਚ ਸੀਆਰਪੀਐਫ ਦੇ 40 ਜਵਾਨ ਸ਼ਹੀਦ ਹੋਏ ਸਨ।

ਪਾਕਿਸਤਾਨ ‘ਚ ਫੰਡ ਜਮ੍ਹਾ ਕਰਵਾ ਕੇ ਕਸ਼ਮੀਰ ਭੇਜਦਾ ਸੀ
ਪੁਲਵਾਮਾ ਹਮਲੇ ਦਾ ਮਾਸਟਰਮਾਈਂਡ ਔਰੰਗਜ਼ੇਬ ਪਾਕਿਸਤਾਨ ਵਿੱਚ ਅੱਤਵਾਦੀ ਸੰਗਠਨ ਜੈਸ਼ ਲਈ ਫੰਡ ਇਕੱਠਾ ਕਰਦਾ ਸੀ ਅਤੇ ਅੱਤਵਾਦੀ ਗਤੀਵਿਧੀਆਂ ਲਈ ਕਸ਼ਮੀਰ ਭੇਜਦਾ ਸੀ। ਔਰੰਗਜ਼ੇਬ ਆਈਐਸਆਈ ਨਾਲ ਸਾਜ਼ਿਸ਼ ਰਚ ਕੇ ਜੰਮੂ-ਕਸ਼ਮੀਰ ਵਿੱਚ ਅਫਗਾਨ ਅੱਤਵਾਦੀਆਂ ਦੀ ਘੁਸਪੈਠ ਕਰਨ ਦੀਆਂ ਘਟਨਾਵਾਂ ਵਿੱਚ ਵੀ ਸ਼ਾਮਲ ਸੀ।