ਗੈਸ ਟੈਂਕਰ ‘ਤੇ ਟਰਾਲੇ ਵਿੱਚ ਹੋਈ ਭਿਆਨਕ ਦੀ ਟੱਕਰ,ਤਿੰਨ ਲੋਕ ਜ਼ਿੰਦਾ ਸੜੇ

ਅਜਮੇਰ ਦੇ ਰਾਣੀ ਬਾਗ ਰਿਜ਼ੋਰਟ ਨੇੜੇ ਸ਼ੁੱਕਰਵਾਰ ਤੜਕੇ ਇੱਕ ਵੱਡਾ ਹਾਦਸਾ ਵਾਪਰਿਆ। ਦੱਸਿਆ ਜਾ ਰਿਹਾ ਹੈ ਕਿ ਇੱਥੇ ਇੱਕ ਗੈਸ ਟੈਂਕਰ ਅਤੇ ਇੱਕ ਟਰੱਕ ਟਰਾਲੇ ਦਰਮਿਆਨ ਜ਼ਬਰਦਸਤ ਟੱਕਰ ਹੋ ਗਈ। ਹਾਦਸੇ ‘ਚ ਤਿੰਨ ਲੋਕ ਜ਼ਿੰਦਾ ਸੜ ਗਏ। ਚਾਰ ਲੋਕ ਗੰਭੀਰ ਜ਼ਖਮੀ ਦੱਸੇ ਜਾ ਰਹੇ ਹਨ। ਟੱਕਰ ਤੋਂ ਬਾਅਦ ਧਮਾਕਾ ਵੀ ਹੋਇਆ, ਜਿਸ ਕਾਰਨ ਗੈਸ ਟੈਂਕਰ ਨੂੰ ਅੱਗ ਲੱਗ ਗਈ। ਇਸ ਕਾਰਨ ਅੱਗ ਕਰੀਬ 400 ਮੀਟਰ ਤੱਕ ਸੜਕ ਅਤੇ ਆਸਪਾਸ ਦੇ ਇਲਾਕੇ ਵਿੱਚ ਫੈਲ ਗਈ। ਹਾਈਵੇਅ ‘ਤੇ ਚੱਲ ਰਹੇ ਦੋ ਟਰੱਕ ਅਤੇ ਕਈ ਦੋਪਹੀਆ ਵਾਹਨ ਵੀ ਇਸ ਦੀ ਲਪੇਟ ‘ਚ ਆ ਗਏ। ਮਿਸਰੀਪੁਰਾ ਅਤੇ ਗਰੀਬ ਨਵਾਜ਼ ਕਲੋਨੀ ਸਮੇਤ ਚਾਰੇ ਪਾਸੇ ਫੈਲੀ ਅੱਗ ਕਾਰਨ 10 ਤੋਂ ਵੱਧ ਘਰਾਂ ਨੂੰ ਵੀ ਅੱਗ ਲੱਗ ਗਈ। ਮਰਨ ਵਾਲਿਆਂ ਵਿੱਚ ਸੰਗਮਰਮਰ ਦੇ ਪੱਥਰਾਂ ਨੂੰ ਲੈ ਕੇ ਜਾਣ ਵਾਲੇ ਗੈਸ ਟੈਂਕਰ ਅਤੇ ਟਰਾਲੇ ਦੋਵਾਂ ਦੇ ਡਰਾਈਵਰ ਸ਼ਾਮਲ ਹਨ। ਜ਼ਖ਼ਮੀਆਂ ਨੂੰ ਜੇਐਲਐਨ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ।

ਕਲੈਕਟਰ-ਐਸਪੀ ਨੇ ਰਾਤ ਇੱਕ ਵਜੇ ਤੋਂ ਰਾਹਤ ਕਾਰਜ ਸ਼ੁਰੂ ਕਰ ਦਿੱਤੇ
ਦੇਰ ਰਾਤ ਵਾਪਰੇ ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਕਲੈਕਟਰ ਅੰਸ਼ਦੀਪ ਅਤੇ ਐਸਪੀ ਚੂਨਾਰਾਮ ਜਾਟ ਮੌਕੇ ’ਤੇ ਪੁੱਜੇ ਅਤੇ ਰਾਤ ਇੱਕ ਵਜੇ ਤੋਂ ਬਚਾਅ ਕਾਰਜ ਕਰਵਾਇਆ। ਸਥਾਨਕ ਪੁਲਿਸ ਸਟੇਸ਼ਨ, ਫਾਇਰ ਬ੍ਰਿਗੇਡ, ਐਂਬੂਲੈਂਸ ਨੇ ਮੌਕੇ ‘ਤੇ ਰਾਤ ਨੂੰ ਬਚਾਅ ਕਾਰਜ ਕੀਤੇ। ਮੌਕੇ ‘ਤੇ ਮੌਜੂਦ ਵਾਹਨ ਚਾਲਕਾਂ ਅਨੁਸਾਰ ਅੱਗ ਲੱਗਣ ਕਾਰਨ ਹਾਈਵੇਅ ਕਾਫੀ ਸਮੇਂ ਤੱਕ ਜਾਮ ਰਿਹਾ। ਸੁਰਾਨਾ ਪੋਲ ਫੈਕਟਰੀ ਦੇ ਚਸ਼ਮਦੀਦ ਚੌਕੀਦਾਰ ਹੁਸੈਨ ਖਾਨ ਨੇ ਦੱਸਿਆ ਕਿ ਧਮਾਕੇ ਦੀ ਆਵਾਜ਼ ਦੂਰ-ਦੂਰ ਤੱਕ ਸੁਣਾਈ ਦਿੱਤੀ।