ਪ੍ਰਤਾਪ ਬਾਜਵਾ ਦੇ ਕੈਪਟਨ ਤੇ ਸਿੱਧੂ ਤੋਂ ਬਾਅਦ ਹੁਣ ਲੱਗਣ ਲੱਗੇ ਹੋਰਡਿੰਗ

ਪੰਜਾਬ ਵਿਚ ਕੈਪਟਨ ਅਮਰਿੰਦਰ ਸਿੰਘ ਅਤੇ ਨਵਜੋਤ ਸਿੰਘ ਸਿੱਧੂ ਦੇ ਸਮਰਥਕਾਂ ਦਰਮਿਆਨ ਹੋਰਡਿੰਗ ਲਾਉਣ ਦੇ ਚੱਲ ਰਹੇ ਮੁਕਾਬਲੇ ਤੋਂ ਬਾਅਦ ਹੁਣ ਮਲੋਟ ਲੰਬੀ ਵਿਖੇ ਪ੍ਰਤਾਪ ਸਿੰਘ ਬਾਜਵਾ ਦੇ ਹੋਰਡਿੰਗ ਵੀ ਲਾਏ ਜਾ ਰਹੇ ਹਨ। ਮਲੋਟ ਵਿਖੇ ਇਕੋ ਨਾਅਰਾ ਕੈਪਟਨ ਦੁਬਾਰਾ ਦੇ ਲੱਗੇ ਹੋਰਡਿੰਗਾਂ ਦੇ ਨਾਲ ਮਲੋਟ ਵਿਖੇ ਪ੍ਰਤਾਪ ਸਿੰਘ ਬਾਜਵਾ ਦੇ 4 ਥਾਵਾਂ ’ਤੇ ਹੋਰਡਿੰਗ ਲਾਏ ਗਏ ਹਨ ਜਿਨ੍ਹਾਂ ਉਪਰ ਮਿਸ਼ਨ-2022, ਸਾਡਾ ਸਭ ਦਾ ਨਾਅਰਾ ਸਾਨੂੰ ਸਭ ਨੂੰ ਪੰਜਾਬ ਪਿਆਰਾ ਲਿਖਿਆ ਹੋਇਆ ਹੈ। ਇਨ੍ਹਾਂ ਹੋਰਡਿੰਗਾਂ ਉਪਰ ਮੁੱਖ ਆਗੂਆਂ ਵਿਚੋਂ ਰਾਹੁਲ ਗਾਂਧੀ ਅਤੇ ਪ੍ਰਤਾਪ ਸਿੰਘ ਬਾਜਵਾ ਦੀਆਂ ਫੋਟੋਆਂ ਲੱਗੀਆਂ ਹਨ। ਜਦ ਕਿ ਪਹਿਲੀ ਲਾਈਨ ਵਿਚ ਛੋਟੀਆਂ-ਛੋਟੀਆਂ ਫੋਟੋਆਂ ਮਰਹੂਮ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ, ਰਾਜੀਵ ਗਾਂਧੀ, ਸੋਨੀਆਂ ਗਾਂਧੀ ਅਤੇ ਪ੍ਰਿਅੰਕਾ ਗਾਂਧੀ ਦੀਆਂ ਤਸਵੀਰਾਂਲੱਗੀਆਂ ਹਨ। ਇਸ ਤੋਂ ਇਲਾਵਾ ਇਹ ਹੋਰਡਿੰਗ ਲਵਾਉਣ ਵਾਲੇ ਨੌਜਵਾਨਾਂ ਦੀਆਂ ਤਸਵੀਰਾਂ ਹਨ। ਇਨ੍ਹਾਂ ਵਿਚ ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਅਤੇ ਪ੍ਰਦੇਸ਼ ਪ੍ਰਧਾਨ ਸੁਨੀਲ ਜਾਖੜ ਨੂੰ ਕੋਈ ਥਾਂ ਨਹੀਂ ਦਿੱਤੀ ਅਤੇ ਨਾ ਹੀ ਲੰਬੀ ਮਲੋਟ ਵਿਚ ਪਿਛਲੇ ਚਾਰ ਸਾਲਾਂ ਤੋਂ ਸਰਗਰਮ ਕਿਸੇ ਆਗੂ, ਵਿਧਾਇਕ/ਹਲਕਾ ਇੰਚਾਰਜ ਜਾਂ ਬਲਾਕ ਪ੍ਰਧਾਨ ਦੀ ਤਸਵੀਰ ਲੱਗੀ ਹੈ।