ਕਪਿਲ ਸ਼ਰਮਾ ਦਾ ਨਵਾਂ ਕਾਮੇਡੀ ਸ਼ੋਅ,OTT ਪਲੇਟਫਾਰਮ ‘ਤੇ ਕੀਤਾ ਜਾਵੇਗਾ ਸਟ੍ਰੀਮ

17 ਨਵੰਬਰ 2023: ਆਪਣੇ ਸ਼ੋਅ ਤੇ ਪ੍ਰੋਜੈਕਟਾਂ ਨੂੰ ਪ੍ਰਮੋਟ ਕਰਨ ਲਈ ਵਰਤਮਾਨ ’ਚ ਕਲਾਕਾਰ ਵੱਖ-ਵੱਖ ਤਰਕੀਬਾਂ ਅਪਣਾਉਂਦੇ ਹਨ। ਕਾਮੇਡੀਅਨ ਤੇ ਅਦਾਕਾਰ ਕਪਿਲ ਸ਼ਰਮਾ ਨੇ ਹਾਲ ਹੀ ਵਿੱਚ ਸੋਸ਼ਲ ਮੀਡੀਆ ਰਾਹੀਂ ਲੋਕਾਂ ਨੂੰ ਦੱਸਿਆ ਕਿ ਉਹ ਆਪਣਾ ਘਰ ਬਦਲਣ ਜਾ ਰਹੇ ਹਨ। ਹਾਲਾਂਕਿ ਕਪਿਲ ਦੀ ਅਸਲ ਵਿੱਚ ਆਪਣਾ ਘਰ ਬਦਲਣ ਦੀ ਕੋਈ ਯੋਜਨਾ ਨਹੀਂ ਹੈ ਸਗੋਂ ਉਨ੍ਹਾਂ ਨੇ ਆਪਣੇ ਨਵੇਂ ਸ਼ੋਅ ਦੀ ਪ੍ਰਮੋਸ਼ਨ ਨੂੰ ਲੈ ਕੇ ਇਹ ਗੱਲ ਕਹੀ ਸੀ।

ਦਰਅਸਲ ਕਪਿਲ ਡਿਜੀਟਲ ਪਲੇਟਫਾਰਮ ’ਤੇ ਆਪਣਾ ਨਵਾਂ ਸ਼ੋਅ ਲਿਆ ਰਹੇ ਹਨ। ਮੰਗਲਵਾਰ ਨੂੰ ਉਨ੍ਹਾਂ ਨੇ ਇੰਸਟਾਗ੍ਰਾਮ ’ਤੇ ਆਪਣੇ ਨਵੇਂ ਸ਼ੋਅ ਦਾ ਪਹਿਲਾ ਪ੍ਰੋਮੋ ਸਾਂਝਾ ਕੀਤਾ। ਇਸ ’ਚ ਉਹ ਕਹਿੰਦੇ ਹਨ ਕਿ ਘਰ ਬਦਲਿਆ ਹੈ ਪਰਿਵਾਰ ਨਹੀਂ। ਖਾਸ ਗੱਲ ਇਹ ਹੈ ਕਿ ਉਨ੍ਹਾਂ ਦੇ ਨਵੇਂ ’ਚ ਵੀ ਉਨ੍ਹਾਂ ਦੇ ਪੁਰਾਣੇ ਸ਼ੋਅ ਨਾਲ ਜੁੜੇ ਕਲਾਕਾਰ ਕ੍ਰਿਸ਼ਨਾ ਅਭਿਸ਼ੇਕ, ਕੀਕੂ ਸ਼ਾਰਦਾ, ਰਾਜੀਵ ਠਾਕੁਰ ਤੇ ਅਰਚਨਾ ਪੂਰਣ ਸਿੰਘ ਵੀ ਹੋਣਗੇ। ਹਾਲਾਂਕਿ ਨਿਰਮਾਤਾਵਾਂ ਦਾ ਦਾਅਵਾ ਹੈ ਕਿ ਇਹ ਉਨ੍ਹਾਂ ਦੇ ਪੁਰਾਣੇ ਸ਼ੋਅ ਦਾ ਕਪਿਲ ਸ਼ਰਮਾ ਸ਼ੋਅ ਨਾਲ ਅਲੱਗ ਹੋਵੇਗਾ।

ਕਪਿਲ ਦੇ ਸ਼ੋਅ ‘ਚ ਫਾਰਮੈਟ ਤੋਂ ਲੈ ਕੇ ਘਰ ਤੱਕ ਕਈ ਬਦਲਾਅ ਹੋਣਗੇ ਪਰ ਟਰਾਫੀ ਉਹੀ ਰਹੇਗੀ। ਪ੍ਰੀਮੀਅਰ ਦੀ ਤਰੀਕ ਦਾ ਅਜੇ ਐਲਾਨ ਨਹੀਂ ਕੀਤਾ ਗਿਆ ਹੈ ਪਰ ਉਨ੍ਹਾਂ ਦੇ ਨਵੇਂ ਸ਼ੋਅ ਦਾ ਪ੍ਰੋਮੋ ਸ਼ੇਅਰ ਕੀਤਾ ਗਿਆ ਹੈ, ਜਿਸ ‘ਚ ਕਾਮੇਡੀਅਨ ਇਸ ਨਾਲ ਜੁੜੀਆਂ ਕੁਝ ਅਹਿਮ ਗੱਲਾਂ ਦੱਸਦੇ ਹੋਏ ਨਜ਼ਰ ਆ ਰਹੇ ਹਨ।

ਨੈੱਟਫਲਿਕਸ ਦੁਆਰਾ ਜਾਰੀ ਕੀਤੇ ਗਏ ਪ੍ਰੋਮੋ ਵਿੱਚ ਕਪਿਲ ਸ਼ਰਮਾ ਆਪਣੇ ਮੈਨੇਜਰ ਨੂੰ ਆਦੇਸ਼ ਦਿੰਦੇ ਨਜ਼ਰ ਆ ਰਹੇ ਹਨ ਕਿ ਜੇਕਰ ਘਰ ਨਵਾਂ ਹੈ ਤਾਂ ਸਾਰਾ ਸਮਾਨ ਵੀ ਨਵਾਂ ਹੋਵੇਗਾ। ਉਹ ਘਰੋਂ ਪੁਰਾਣਾ ਫਰਿੱਜ ਕੱਢਣ ਲਈ ਕਹਿੰਦਾ ਹੈ। ਜਦੋਂ ਉਹ ਫਰਿੱਜ ਖੋਲ੍ਹਦਾ ਹੈ ਤਾਂ ਉਸ ਵਿਚ ਅਰਚਨਾ ਸਿੰਘ ਪੂਰਨ ਬੈਠੀ ਹੁੰਦੀ ਹੈ, ਜਿਸ ਨੂੰ ਦੇਖ ਕੇ ਕਾਮੇਡੀਅਨ ਹੈਰਾਨ ਰਹਿ ਜਾਂਦੇ ਹਨ। ਉਹ ਆਪਣੇ ਮੈਨੇਜਰ ਨੂੰ ਕਹਿੰਦਾ ਹੈ, “ਉਨ੍ਹਾਂ ਨੂੰ ਕਿਸਨੇ ਬੁਲਾਇਆ ਹੈ? ਫਰਿੱਜ ਪੁਰਾਣਾ ਹੈ ਅਤੇ ਇਸ ਦੇ ਅੰਦਰ ਦਾ ਸਮਾਨ ਵੀ ਪੁਰਾਣਾ ਹੈ।” ਫਿਰ ਕਪਿਲ ਸ਼ਰਮਾ ਦੀ ਨਜ਼ਰ ਰਾਜੀਵ ਠਾਕੁਰ ‘ਤੇ ਪਈ । ਬਾਅਦ ਵਿੱਚ ਜਦੋਂ ਉਹ ਡੱਬਾ ਖੋਲ੍ਹਦਾ ਹੈ ਤਾਂ ਉਸ ਵਿੱਚ ਕੀਕੂ ਸ਼ਾਰਦਾ ਬੈਠਾ ਹੁੰਦਾ ਹੈ ਅਤੇ ਉਹ ਦੱਸਦਾ ਹੈ ਕਿ ਕ੍ਰਿਸ਼ਨਾ ਅਭਿਸ਼ੇਕ ਵੀ ਇੱਥੇ ਮੌਜੂਦ ਹਨ।